ބޭނުންވަނީ އަދިވެސް ރެއާލް މެޑްރިޑްގައި މަޑުކުރަން ކަމަށް އެ ޓީމަށް ކުޅޭ ބްރެޒިލްގެ ލެފްޓް ބެކް މާސެލޯ ބުނެފިއެވެ.

އުމުރުން 34 އަހަރުގެ މާސެލޯ ރެއާލާއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ. އެއާއެކު އޭނާ އެ ކުލަބް ދޫކޮށްލާނެ ކަމުގެ އަޑުތަކެއް ވަނީ ފެތުރިފައެވެ.

ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި މާސެލޯގެ ވިސްނުމަކީ އަދިވެސް ރެއާލްގައި މަޑުކުރުމެވެ. އާނާ ބޭނުންވަނީ ރެއާލާއެކު ކުރިއަށް ދާށެވެ. އަދި އެއީ އޭނާ 50،000 ފަހަރު ބުނެފައިވާ ވާހަކައެއް ކަމަށެވެ. އެކަމާ ގުޅޭ ގޮތުން ޔުއެފާ ޗެމްޕިއަންސް ލީގުގެ ފައިނަލަށްފަހު އޭނާ ރެއާލާ ވާހަކަ ދައްކާނެ ކަމަށް ވެސް މާސެލޯ ބުނެފައިވެއެވެ.

ފްލުމިނެންސް އިން ސީނިއާ ކެރިއަރު ފެށި މާސެލޯ ރެއާލަށް ބަދަލުވީ 2007 ވަނަ އަހަރުއެވެ. އޭގެ ފަހުން ރެއާލާއެކު މިވީ 16 އަހަރުގެ ތެރޭގައި މާސެލޯ ވަނީ އެ ޓީމަށް 386 މެޗު ކުޅެދީފައެވެ. އަދި އޭނާ ވަނީ އެ ޓީމަށް 26 ލަނޑު ޖަހައިދީފައެވެ. އަދި އޭނާ ވަނީ 16 އަހަރުގެ ތެރޭގައި ރެއާލާއެކު 24 ތައްޓެއް ހޯދާފައެވެ. އޭނާ އަކީ ރެއާލްގެ އެންމެ ކާމިޔާބު އެއް ކުޅުންތެރިޔާއެވެ.

މާސެލޯ ވަނީ ރެއާލާއެކު ސްޕެނިޝް ލީގު ހަ ފަހަރު، ކޮޕާ ޑެލްރޭ ދެ ފަހަރު، ސްޕެނިޝް ސުޕަ ކަޕް ފަސް ފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު އަދި ފީފާ ކުލަބް ވޯލްޑް ކަޕް ހަތަރު ފަހަރު ހޯދާފައެވެ.