ފްރާންސް ލީގުގައި ރޭ ރަށުން ބޭރުގައި މޮންޓެޕިއޭއާ ދެކޮޅަށް ކުޅުނު މެޗު ފަސޭހަކަމާއެކު ޕެރިސް ސެއިންޓް ޖާމަން (ޕީއެސްޖީ) ކާމިޔާބުކޮށްފިއެވެ.

ރޭގެ މެޗުން ޕީއެސްޖީ މޮޅުވީ 4-0 ންނެވެ. މެޗުގައި ޕީއެސްޖީގެ ފުރަތަމަ ދެލަނޑުވެސް އެޓީމަށް ކާމިޔާބުކޮށްދިނީ ލިއޮނެލް މެސީއެވެ. ފުރަތަމަ ހާފުގެ 26 ވަނަ މިނެޓުގައި އެންހެލް ޑިމާއިރާ ވަނީ ޕީއެސްޖީގެ ތިން ވަނަ ލަނޑު ޖަހައިފައެވެ.

ޕީއެސްޖީގެ ހަތަރު ވަނަ ލަނޑު ޖެހީ މެޗުގެ 60 ވަނަ މިނެޓުގައި ލިބުނު ޕެނަލްޓީއަކުން ކީލިއަން އެމްބާޕޭއެވެ. މި ޕެނަލްޓީން ލަނޑު ޖަހައި ހެޓްރިކް ހެދުމުގެ ފުުރުސަތު މެސީއަށް އޮތް ނަމަވެސް، އޭނާ ވަނީ އެމްބާޕޭއަށް ފުރުސަތު ދީފައެވެ. މި ލަނޑާއެކު އެމްބާޕޭ ވަނީ ލީގުގެ އެންމެ ގިނަ ލަނޑު މިހާތަަނަށް ޖެހި ކުޅުންތެރިޔާއަށް ވެފައެވެ. އެމްބާޕޭ ވަނީ ލީގުގައި މިހާތަނަށް 25 ލަނޑު ޖަހާފައެވެ. ދެ ވަނައަށް އެންމެ ގިނަ ލަނޑު ޖަހާފައިވާ މޮނާކޯގެ ބެން ޔެޑާ ވަނީ 24 ލަނޑު ޖަހާފައެވެ.

ޕީއެސްޖީން ވަނީ މި ފަހަރުގެ ލީގު ޗެމްޕިއަންކަން ވެސް ހޯދާފައެވެ. ލީގުގައި ކުޅުނު 37 މެޗުން އެ ޓީމު 83 ޕޮއިންޓު ހޯދާފައިވެއެވެ. ލީގުގެ ދެ ވަނަ މަޤާމުގައި އޮތް މޮނާކޯއަށް 37 މެޗުން ލިބިފައިވަނީ 68 ޕޮއިންޓެވެ.