ރައީސް މައުމޫން ހައްޔަރު ކުރެއްވީ އެމަނިކުފާނު ކުށެއް ނުކުރައްވާ ހުންނަވައިގެން ނޫން: ރައީސް ޔާމީން
11 މެއި 2022 | ބުދަ 02:07ސުޕްރީމް ކޯޓުގެ ތެރެއިން ދައުލަތް ވައްޓާލުމަށް އެންމެ އިސް މޭއިސްތިރިއަކަށް ހުންނެވީ ކުރީގެ ރައީސް މައުމޫން
ރައީސް މައުމޫން ހައްޔަރުކުރައްވާފައިވަނީ 2018 ވަނަ އަހަރުގެ ފެބްރުއަރީ މަހުގެ 5 ވަނަ ދުވަހުގެ ރޭ
ޕީޕީއެމްގެ ވެރިކަމުގައި ކުރީގެ ރައީސް މައުމޫން އަބްދުލްޤައްޔޫމް ހައްޔަރު ކުރެއްވީ އެމަނިކުފާނު ކުށެއް ނުކުރައްވާ ހުންނަވައިގެން ނޫން ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ވިދާޅުވެއްޖެއެވެ.
ޕީޕީއެމްގެ ފަރާތުން ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީއަށް ވާދަ ކުރާ ޕީޕީއެމްގެ ކެންޑިޑޭޓްގެ ކެމްޕޭން ޖަލްސާގައި އަންގާރަ ދުވަހު ވާހަކަފުޅު ދައްކަވަމުން ޔާމީން ވިދާޅުވީ ރައީސް މައުމޫން ހައްޔަރު ކުރެއްވީ އެމަނިކުފާނު ކުށެއް ނުކުރައްވާ ހުންނަވައިގެން ނޫން ކަމަށާއި އެމަނިކުފާނު ހައްޔަރު ކުރެއްވީ ދައުލަތުގެ ހައްޤަށް އަރައިގެންނެވުމުން ކަމަށެވެ.
ސުޕްރީމް ކޯޓުގެ ތެރެއިން ދައުލަތް ވައްޓާލުމަށް އެންމެ އިސް މޭއިސްތިރިއަކަށް ހުންނެވީ ކުރީގެ ރައީސް މައުމޫން ކަމަށް ޔާމީން ތުހުމަތު ކުރެއްވިއެވެ. އެގޮތަށް އަމަލު ކުރެއްވުމުން ހައްޔަރު ކުރަން މަޖުބޫރު ވެވަޑައިގަތް ކަމަށާއި އެއީ ރައީސް ޔާމީންގެ އަމިއްލަފުޅު ނިންމެވުމެއް ނޫން ކަމަށް ވެސް ވިދާޅުވިއެވެ.
ރައީސް ޔާމީންގެ ވެރިކަމުގައި ރައީސް މައުމޫން ހައްޔަރުކުރައްވާފައިވަނީ 2018 ވަނަ އަހަރުގެ ފެބްރުއަރީ މަހުގެ 5 ވަނަ ދުވަހުގެ ރޭގައެވެ.
އެއަށްފަހު ރައީސް މައުމޫން އެއް އަހަރާއި ހަތް މަހާއި ހަ ދުވަހަށް ޖަލަށްލުމަށް ކްރިމިނަލް ކޯޓުން ހުކުމް ކުރީ އެމަނިކުފާނުގެ މައްޗަށް އުފުލި އަދުލު އިންސާފު ގާއިމްކުރަން ހުރަސް އެޅުމުގެ ދައުވާއާ ގުޅިގެންނެވެ.
އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރާއި ގުޅިގެން ސަރުކާރު ވައްޓާލަން އުޅުމުގެ ތުހުމަތުގައި ރައީސް މައުމޫން ހައްޔަރުކޮށް ޓެރަރިޒަމްގެ ދައުވާ ވެސް އުފުލާފައިވެއެވެ. އަދި އެމަނިކުފާނު ޝަރީއަތް ނިމެންދެން ރިމާންޑް ޖަލެއްގައި ބެހެއްޓުމަށް އަމުރުކުރުމާއެކު އެމަނިކުފާނު އޭރު މާފުށީ ޖަލަށް ވަނީ ބަދަލު ކޮށްފައެވެ. ނަމަވެސް ސިއްހީ ހާލުކޮޅު ހުންނެވި ގޮތުން އާއިލާއިން ތަކުރާރުކޮށް އެދުމުން ދޫނިދޫ ޖަލަށް އޭރު ބަދަލުކުރިއެވެ.
ރައީސް މައުމޫނު މައްޗަށް ދައުވާކޮށްފައި ވަނީ ގާނޫނާ ހިލާފަށް ވެރިކަން ވައްޓާލަން ރައްޔިތުންގެ މަޖިލީހުގެ މެމްބަރުންނަށް ރިޝްވަތުގެ ގޮތުގައި ފައިސާ ދީ އަދި އިތުރު މެމްބަރުންތަކަކަށް ފައިސާ ދޭން އުޅޭ ކަމަށް ބުނާ މައްސަލަ އާއި ފަނޑިޔާރުންގެ މަސައްކަތައް ނުފޫޒު ނުފޫޒު ފޯރުވައި ވަކި ގޮތަކަށް ހުކުމް ނެރުމަށް ފަނޑިޔާރުންނަށް ރިޝްވަތު ދިން މައްސަލައާ ގުޅޭ ހެކި މައުމޫނު އަބްދުލް ގައްޔޫމް ގެންގުޅުނު ކަމަށް ބުނާ ފޯނެއްގައި ހުރެދާނެ ކަމަށް ބެލެވޭތީ ފޯނު ދިނުމަށް އެދުމުން ފޯނު ނުދީގެން ކަމަށް ބުނާއިރު، މައުމޫނު ހަވާލުކުރައްވާފައިނުވަނީ ކޮން ފޯނެއް ކަމެއް އަދި ހޯދާ ނުފެނިފައި ވަނީ ކޮން ފޯނެއް ކަމެއް ބަޔާންކޮށް އެ ފޯނާ ބެހޭ އެއްވެސް މައުލޫމާތެއް އެ މައްސަލަ ހުށައެޅިއިރު ދައުލަތުން އޭރު ބުނެދީފައެއް ނުވެއެވެ.
ރައީސް މައުމޫނުގެ ޖަލު ހުކުމް ބާތިލްކޮށްފައިވަނީ 2018 ވަނަ އަހަރުގެ އޮގަސްޓް މަހުގެ ތެރޭގައެވެ. އެމަނިކުފާނު އޭރު ބަންދުގައި ހުންނެވިއިރުވެސް ވިދާޅުވަމުން ގެންދެވީ އެއްވެސް ޖިނާއީ ކުށެއް ކުރައްވާފައި ނުވާނެ ކަމަށެވެ.
