ސިޔާސީ ކަންކަމަށް ވުރެ ޤައުމީ އުސޫލުތަކަށް އަބަދުވެސް އިސްކަން ދޭން ވާނެ ކަމަށް ނިޝާން އިއްޒުއްދީންގެ އިއްޒަތުގެ ވެރިޔާ، ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.
ނޮވެމްބަރު 3ގެ ހާދިސާ އަކީ ރާއްޖެ އަށް ދިމާވީ އެންމެ ބިރުވެރި އެއް ހާދިސާކަމަށް އެ މަނިކުފާނު ވަނީ ފާހަގަކުރައްވާފައެވެ. އެ ހަނދާން އާ ކުރާ އިރު އެ ނަސްރު ލިބުނީ މާތް ﷲގެ ހަޒްރަތުންކަން ހަނދުމަކުރުމަށް އެ މަނިކުފާނު ގޮވާލެއްވިއެވެ. ﷲގެ ހަޒްރަތުން މެނުވީ ނަސްރު ލިބުމެއް ނުވާކަން އެއީ ޤަބޫލުކުރަން ޖެހޭ ވަރަށް ބޮޑު ހަގީގަތެއް ކަމަށް އެ މަނިކުފާނު ވިދާޅުވިއެވެ. އެކަން ކީރިތި ޤުރުއާންގައި ވެސް ﷲ ވަނީ އަންގަވާފައި ކަމަށް އެ މަނިކުފާނު ވަނީ ފާހަގަކުރައްވާފައެވެ. އެހެންކަމުން އަޅުގަނޑުމެންގެ ހިތްތަކުގެ އީމާންކަން ވަރުގަދަކުރުމަށް އެ މަނިކުފާނު ގޮވާލެއްވިއެވެ. އެކަން ކުރަންޖެހޭ އެއް ސަބަބަކީ އަމިއްލަ ސަލާމަތާއި ރައްކާތެރިކަން ކަމަށް ރައީސް މައުމޫން ވަނީ ވިދާޅުވެފައެވެ.
ނޮވެމްބަރު 3ގެ އުދުވާނީ ހަމަލާ އިން ލިއްބައިދޭ އިބުރަތްތަކާއި، ފިލާވަޅުތަކެއް ހުރިކަމަށް ފާހަގަކުރައްވާ އޭގެ ތަފްސީލްތަކަށް އެ މަނިކުފާނު ވަނީ އަލިއަޅުވާލައްވާފައެވެ. އޭގެ ތެރެއިން އެއްކަމަކީ ނުގުނޑާ ފަދަ އަޒުމެއްގައި ދިވެހިންގެ އެއްބައިވަންތަކަން ޤާއިމްކުރުމުގެ މުހިންމުކަން ކަމަށް ރައީސް މައުމޫން ވިދާޅުވިއެވެ. ދުނިޔޭގެ ކަންކަން ބަދަލުވަމުންދާ ގޮތަކުން ރާއްޖޭގެ ޤައުމީ މަޝްރަހަށް ބަދަލުތަކެއް އައި ނަމަވެސް އަދި ރާއްޖޭގެ ޤާނޫނުތަކާއި ޤަވާއިދުތައް ޒަމާނާއި އެކު ބަދަލު އައި ނަމަވެސް އެ އެއްބައިވަންތަކަން ބަދަލުވެގެން ނުވާނެ ކަމަށް ރައީސް މައުމޫން ވިދާޅުވިއެވެ.
ޤާނޫނުތަކާއި ޤަވާއިދުތަކަށް ބަދަލު އައި ނަމަވެސް، ރާއްޖޭގައި ސިޔާސީ ޕާޓީތަކެއް އުފެދި ހިނގަމުން ދިޔަ ނަމަވެސް، މިއިން އެއްވެސް ކަމެއްގެ ސަބަބުން އަޅުގަނޑުމެންގެ ޤައުމީ ވަހުދަތަށް އުނިކަމެއް އައިސްގެން ނުވާނެ. ޤައުމީ ވަހުދަތަކީ އަބަދުވެސް ސިޔާސީ ކަންކަމަށް ވުރެ އިސްކަން ދޭންޖެހޭނެ އުސޫލުތަކެއް. ނޮވެމްބަރު 3ގެ ޙާދިސާ ހިނގަމުން ދިޔަ އިރުވެސް އަޅުގަނޑުމެންނަށް ފެނިފައި ވަނީ ދިވެހިންގެ އެއްބައިވަންތަ ކަމުގެ ވަރުގަދަ މަންޒަރުތައް. ސަރުކާރާއި މެދު ހިތްހަމަ ނުޖެހިފައި ތިބި މަދު ބަޔަކު ތިބި ނަމަވެސް. އެ ދުވަހު އެންމެންވެސް ތިބީ ސަރުކާރާއި އެކީގަ. ރާއްޖެ އަށް ހަމަލަދިން ދުޝްމިނުންނަށް އެއްވެސް ދިވެއްސެއްގެ ފަރާތުން ކުޑަވެސް އެހީތެރިކަމެއް އެ ދުވަހަކު ނުލިބުނު. އެންމެ ކުޑަމިނުން ހޫނު ދުވަހެއްގަ ބޯލާނެ ފެން ތައްޓެއްހާ ހިސާބުވެސް ނުލިބުނު.ކުރީގެ ރައީސް މައުމޫން އަބްދުލް ޤައްޔޫމް
ޤައުމުގެ މިނިވަންކަމަށްޓަކާ ހަށިގަނޑާއި ފުރާނައިން ޤުރުބާންވާން ކެރުމަކީ ދިވެހިންގެ ވަރަށް ފުނަށް ބިންވަޅު ނެގިފައިވާ ކަމެއްކަމަށް ރައީސް މައުމޫން ވަނީ ވިދާޅުވެފައެވެ. ނޮވެމްބަރު 3ގެ ހާދިސާއިން ދިވެހިންގެ އަތުގައި ގިނަ ވަސީލަތްތަކާއި ހަތިޔާރުތައް ނެތް ނަމަވެސް، ދިވެހިން އެކަމާއި ކުރިމަތިލީ ވަރަށް ގަދަ ހިތްވަރާއި އެކުގައިކަން އެނގޭ ކަމަށެވެ. އެ ހާދިސާ ހިނގި އިރުވެސް އަދި ފަހުންވެސް، ދިވެހި ސިޔާދަތައް ތާއީދުކުރާ، އެކުވެރި ޤައުމުތަކާއި، ބައިނަލްއަޤުވާމީ ޖަމާޢަތްތަކަށް ޝުކުރު ދެމެހެއްޓުމަކީ ވެސް އެ ދުވަހުން ލިބޭ ފިލާވަޅެއް ކަަމަށް އެ މަނިކުފާނު ވިދާޅުވިއެވެ. އެގޮތުން ނަޞްރުގެ ދުވަހު އެހީތެރިވެދިން ޤައުމުތަކާއި ޖަމިއްޔާތަކުގެ އަގުވަޒަންކުރަންޖެހޭކަމުގައިވެސް އެމަނިކުފާނު ވިދާޅުވިއެވެ.
ރައީސް މައުމޫން ދިވެހި ޤައުމު އިސްލާމްވީއްސުރެ، ދިވެހި ރާއްޖެ އޮތީ އިސްލާމީ އުއްމަތުގެ ރޫޙާނީ ވިންދު ޖަހާ ގުނަވަނެއްގެ ގޮތުގައިކަމަށް ވިދާޅުވެ، ފަލަސްތީނުގެ އުޚުއްވަތްތެރި ރައްޔިތުން، އަދި ވަކިން ޙާއްސަކޮށް ޣައްޒާގެ ރައްޔިތުން ތަހައްމަލުކުރަމުންދާ އިސްރާއިލުގެ ލާއިންސާނީ އަނިޔާ ކުށްވެރިކޮށް ފަލަސްތީނުގެ ޖިހާދަށް ތާއީދުކުރުމުގައި ދިވެހިން ދެމިތިބުމަށް ދިވެހިންނަށް އިލްތިމާސްކުރައްވަމުންނެވެ.
