ކާމިޔާބު ކައިވެންޏަކަށް ރައީސް މައުމޫނުގެ ލަފާ "އެހެން ދިމަދިމާލަށް ނުބަލާ"
ކައިވެނި ކުރުމަށްފަހު ވަރިކުރުމެއް، ވަކިވުމެއް އޮވެގެން ނުވާނެ ކަމަށް ވެސް ރައީސް މައުމޫނު ވިދާޅުވި
ރައީސް މައުމޫނު އާއި އަނބިކަނބަލުން ނަސްރީނާ އިބްރާހީމް
ރައީސް މައުމޫނާއި ނަސްރީނާގެ ދުވަސްވީ ކައިވެނީގެ ކާމިޔާބީގެ ހަގީގީ ސިއްރަކީ އެކަކު އަނެކަކަށް އިޚްލާސްތެރިވުމާއި "އެހެން ދިމާލަކަށް ނުބެއްލެވުން" ކަމުގައި ރައީސް މައުމޫނު ވިދާޅުވެއްޖެއެވެ.
މައުމޫނު ވިދާޅުވީ އެމަނިކުފާނު ވެސް ނަސްރީނާވެސް އެހެން ދިމަދިމާލަކަށް ނުބައްލަވާ ކަމުގައެވެ.
"އަޅުގަނޑު ދަންނަވާނީ، ދެމީހުންގެ އިޚްލާސްތެރި ކަމޭ، ދިމަދިމާލަށް ބެލުން ކަހަލަ ކަމެއް އަޅުގަނޑު ނުކުރަން، ނަސްރީނާވެސް ނުކުރޭ،" މައުމޫނު ވިދާޅުވިއެވެ.
ނަސްރުގެ ދުވަހުގެ މުނާސަބަތުގައި، ދައުލަތުގެ މީޑިއާ ޕީއެސްއެމް އަށް ދެއްވި ބަސްދީގަތުމެއްގައި 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުގެ ތަޖުރިބާތައް ހިއްސާ ކުރެއްވުމަށް ރައީސް މައުމޫނާއި އަނބިކަނބަލުން ނަސްރީނާ އިބްރާހިމް އެކުގައި ދެއްވި ބަސްދީގަތުމެއް، ނަސްރީނާ ވިދާޅުވީ، ނޮވެމްބަރު 3 ގެ ހާދިސާގެ ތަޖުރިބާގެ ތެރެއިންވެސް ދެބޭފުޅުންގެ ގުޅުން އިތުރަށް "ގާތްވި" ކަމަށެވެ.
1969 ގައި ކުރެއްވި ދެކަނބަލުންގެ ކައިވެންޏަށް 55 އަހަރު ފުރުން ދާދި ފަހުން ފާހަގަ ކޮށްފައިވާއިރު، އެކުގައި އެހާ ދިގު މުއްތެއްގައި އުޅުއްވުނު ސަބަބާ ބެހޭ ގޮތުން މައުމޫނު ވިދާޅުވީ، އެހެން މީހުންނަށް ވާހެން އެ ދެބޭފުޅުން ވެސް އެހެން ދިމަދިމާލަށް ނުބައްލަވާތީ ވަރަށް ރަނޅަކަށް އެކުގައި އުޅުއްވުނު ކަމުގައެވެ.
މައުމޫނު ވިދާޅުވީ، ވަރަށް ކުރިންސުރެ އަޒުމު ކަނޑައަޅުއްވާފައި އޮތީ، ކައިވެނީގެ މަތީގައި ދެމިހުންނެވުމަށް ކަމަށެވެ.
"ވަރަށް ކުރިންސުރެ އަޒުމު ކަނޑައަޅާފައި އޮންނަ ކަމެއް، ދެން އަޅުގަނޑުގެ ތައުލީމުގެ ގޮތުންވެސް ކަންނޭގެ، ކައިވެންޏަކީ އަބަދަށްޓަކާ ކުރާ ކަމެކޭ،" މައުމޫނު ވިދާޅުވިއެވެ.
ކައިވެނި ކުރުމަށްފަހު ވަރިކުރުމެއް، ވަކިވުމެއް އޮވެގެން ނުވާނެ ކަމަށް ވެސް ރައީސް މައުމޫނު ވިދާޅުވިއެވެ.
މައުމޫނު ފާހަގަ ކުރެއްވި ގޮތުގައި ކައިވެނީގައި ދިމާވާ ކޮންމެ މައްސަލަ އަކީ ވާހަކަ ދައްކައިގެން ސުލްހަވެރިކަމާއެކު ހައްލުކުރެވޭނެ ކަންކަން ކަމުގައެވެ.
"އެ ގޮތައް ހައްލުކުރާނީ އެއްގޮތަކަށްވެސް ވަކިވާން ހިތައް އަރުވާކަށް ނުވާނެ،" މައުމޫނު ވިދާޅުވިއެވެ.
މައުމޫނޫ ވިދާޅުވީ ދެބޭފުޅުންވެސް މިއަދާ ޖެހެންދެންވެސް ތިއްބެވީ އެކުގައި އުޅުއްވުމުގެ އަޒުމުގައި ކަމަށެވެ.
ރައީސް މައުމޫނާ ބެހޭ ގޮތުން ނަސްރީނާ ވިދާޅުވީ، މައުމޫނަކީ އަބަދުވެސް ކަންކަމަށް ކެރިވަޑައިގަންނަވާ ބޭފުޅެއް ކަމަށެވެ.
ނަސްރީނާގެ އެ ވާހަކަ ފުޅަށް އިޝާރާތް ކުރައްވާ މައުމޫނު ވެސް ވިދާޅުވީ، "ނަސްރީނާ އަކީ ވަރަށް ހިތްވަރުގަދަ މީހެއް" ކަމަށެވެ. އެކަމުގެ ސަބަބުން ވަރަށް ހިތްވަރު ލިބިވަޑައިގަންނަވާ ކަމަށް މައުމޫނު ވިދާޅުވިއެވެ.
