ދިވެހި ރާއްޖެ ދިފާއު ކުރުމަށްޓަކައި އިންޑިއާ ސިފައިން ބޭނުންވާ ވާހަކަ ރަޖީވް ގާނދީ އަށް ދެންނެވިން: ރައީސް މައުމޫނު
އަސްކަރީ އެހީއަށް އެދިވަޑައިގަތުމާއެކު ބޮޑު ވަޒީރު ރަޖީވް ގާނދީ ވަގުތުން ފިޔަވަޅު އެޅުއްވި
އޮޕަރޭޝަން "ކެކްޓަސް" ގައި ބައިވެރިވި އިންޑިއާ ސިފައިން ދިވެހި ސިފައިންނާއެކު ރާއްޖޭގެ އަސްކަރީ މައިމަރުކަޒުގެ ކުރިމަތީގައި، ނޮވެމްބަރު 1988
1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާ އާ ގުޅިގެން ދިވެހި ރާއްޖެ ދިފާޢު ކުރުމަށްޓަކައި އިންޑިއާ ސިފައިން ބޭނުންވާ ވާހަކަ އޭރުގެ އިންޑިއާގެ ބޮޑުވަޒީރު ރަޖީވް ގާނދީ އަށް ދެންނެވި ކަމަށް ރައީސް މައުމޫނު ވިދާޅުވެއްޖެއެވެ.
ހާދިސާ ހިނގިތާ 36 އަހަރު ފަހުން ދައުލަތުގެ މީޑިއާ ޕީއެސްއެމް އަށް ދެއްވި ބަސްދީގަތުމެއްގައި އެދުވަހުގެ ކަންކަން ހިނގައިދިޔަ ގޮތް ވަރަށް ތަފްސީލުކޮށް ހާމަކޮށްދެއްވަމުން، އާދިއްތަ ދުވަހު، އޭރުގެ ކޮމާންޑަރ އިން ޗީފް މައުމޫނު ވިދާޅުވީ، އޭރު ދިވެހިރާއްޖެއިން ޚާރިޖީ ސިޔާސަތު ގެންގުޅުނު ގޮތުން ހުރިހާ ގައުމަކުންވެސް ރާއްޖެއަށް ހެޔޮ އެދޭކަން، ހާދިސާ އާ ގުޅިގެން ހާމަވި ކަމަށާއި، އެހެން ނަމަވެސް ރާއްޖެއާ އިންޑިއާ އާ ދެމެދު އޮތް ގާތް ގުޅުމުގެ ސަބަބުން އެންމެ ފުރަތަމަ އެހީއަށް އެދިވަޑަގަތީ އިންޑިއާ އިން ކަމަށެވެ.
މައުމޫނު ފާހަގަ ކުރެއްވި ގޮތުގައި، ރާއްޖޭން ގެންގުޅުނު ސިޔާސަތުގެ ސަބަބުން ހާދިސާ ހިނގި ދަނޑިވަޅަކީ އިންޑިއާ އާ އޮތް ގުޅުން އިތުރަށް ބަދަހިވަމުން އައި ދަނޑިވަޅެއް ކަމަށެވެ.
"އެހީ އަށް އެދޭއިރުވެސް އެންމެ ފުރަތަމަ އެހީއަށް އެދޭނީވެސް އިންޑިއާ އިން ކަމަށް އެންމެންނަށްވެސް ގަބޫލު ކުރެވޭނެ،" މައުމޫނު ވިދާޅުވިއެވެ.
މައުމޫނު ވިދާޅުވީ އޭރު އިންޑިއާގެ ބޮޑުވަޒީރު ކަމުގައި ހުންނެވި ރަޖީވް ގާނދީ އަކީ އެމަނިކުފާނާ ވަރަށް ގާތް ބޭފުޅެއް ކަމަށާއި އެހެން ކަމުން ވަގުތުން އެމަނިކުފާނަށް ފޯނުކޮށް އެހީތެރިކަމަށް އެދިވަޑައިގަތީ ކަމަށެވެ.
"އެމަނިކުފާނަށް ދެންނެވިން އަޅުގަނޑުމެން މިކަހަލަ ހާލެއްގައޭ މިއުޅެނީ، އެހެން ވީމާ އަޅުގަނޑުމެން ބޭނުންވެއޭ އިންޑިއާގެ އަސްކަރީ އެހީތެރިކަން،" މައުމޫނު ފާހަގަ ކުރެއްވިއެވެ. "މައުނަވީ ގޮތުން ވާ އެހީއެއް ނޫން، އިންޑިއާ ސިފައިން ބޭނުންވެޔޭ، އަޅުގަނޑުމެންގެ ގައުމު ދިފާއު ކުރުމަށްޓަކައި."
ރައީސް މައުމޫނު ވިދާޅުވީ، އެކަމަށް އެދިވަޑައިގަތުމާއެކު ބޮޑު ވަޒީރު ރަޖީވް ގާނދީ ވަގުތުން ފިޔަވަޅު އެޅުއްވި ކަމަށެވެ.
ބޮޑުވަޒީރުގެ އެންގެވުމަކަށް ފޮނުވި ސިފައިންނަށް އާދެވުނީ ނޮވެމްބަރު 3 ވަނަ ދުވަހުގެ ރޭގަނޑު ކަމަށް މައުމޫނު ވިދާޅުވިއެވެ.
"އޮޕަރޭޝަން ކެކްޓަސް" ގެ ނަމުގައި ރާއްޖެ އަށް ފޮނުވި އިންޑިއާ ސިފައިންނަށް އޯޑަރު ދީފައި އޮތީ އެންމެ އިސްކަމެއް ދީގެން ރައީސް މައުމޫނުގެ ސަލާމަތް ކަށަވަރު ކުރުން ކަމަށްވެސް މައުމޫނު ވިދާޅުވިއެވެ.
"ރޭގަނޑު 9 ޖެހިއިރު އެމީހުން ހުޅުލެއަށް ފައިބާފައި، އިސްކޮށް ހުންނެވި ބޭފުޅަކު ބްރިގޭޑިއާ ފާރޫގް ބުލްސަރާ އަޅުގަނޑަށް ފޯނު ކުރައްވާފައި ވިދާޅުވި ތިމަންނާމެން މިތިބީ އައިހޭ، އިންޑިއާ ސަރުކާރުން އަންގާފައި އޮތީ ފުރަތަމަ މައުމޫނުގެ ހިމާޔަތް ކަށަވަރު ކޮށްދޭށޭ، އެހެންވީމާ ތިމަންނަމެން މިތިބީ ހުޅުލޭގައޭ، މައުމޫނު ތިހުރީ މާލޭގައޭ، މިތަނަށް އަންނާށޭ،" މައުމޫނު ވިދާޅުވިއެވެ. "އަޅުގަނޑު ދެންނެވިން އަޅުގަނޑަކަށް ނުދެވޭނެއޭ، އަނެއްކާ ކަނޑު ހުރަސްކޮށްފައި، ރައްކާތެރިކަމެއް ވެސް ނޫނޭ، ތިބޭފުޅުން ވަޑައިގަންނަވާށޭ."
މައުމޫނު އެގޮތައް އެދިވަޑައިގަތުމުން ލަހެއް ނުވެ އިންޑިއާ ސިފައިން މާލެ އައި ކަމަށް މައުމޫނު ވިދާޅުވިއެވެ. އަދި ހުންނެވި ގެއިން ނުކުމެ ވަޑައިގެން ސިފައިންގެ އަށް ބަދަލުވެވަޑައިގަތީ އިންޑިއާ ސިފައިންގެ އިރުޝާދުގެ މަތިން، އެމީހުންގެ ހިމާޔަތުގައި ކަމަށް މައުމޫނު ވިދާޅުވިއެވެ.
"އެހެން ވީމާ އެރޭ ފަތިހު އަޅުގަނޑުމެން އެމީހުންގެ ހިމާޔަތުގައި، ކާރުގައި، ސިފައިންގެއަށް ދިޔައީ،" މައުމޫނު ވިދާޅުވިއެވެ.
ރައީސް މައުމޫނު އެ ދުވަސް ސިފަކުރެއްވީ "ވަރަށް ބިރުވެރި، ނުރައްކާތެރި" ދުވަހެއްގެ ގޮތުގައެވެ.
