އިނގިރޭސި ވިލާތުގެ ކޮންޒަވޭޓިވް ޕާޓީއަށް އޯވަރޯލް މެޖޯރިޓީ ގެއްލޭނެ ކަމަށް ބެލެވެން ފަށައިފި

އިނގިރޭސި ވިލާތުގައި ބުރާސްފަތި ދުވަހުބޭއްވުނު އާންމު އިންތިޚާބު ނިމި ވޯޓު ގުނަން ފަށާފައިވާއިރު ވެރިކަން ކުރަމުންދާ ބޮޑު ވަޒީރު ތެރީސާ މޭ ގެ ޕާޓީއަށް ގާނޫނު ހަދާ މަޖިލީހުގައި އެންމެ ގިނަ ގޮނޑި ކާމިޔާބު ކުރެވޭނެ ކަމަށް ބެލެވުނަސް، އޯވަރޯލް މެޖޯރިޓީ ގެއްލޭނެ ކަމަށް ބެލެވެން ފަށައިފިއެވެ.

ކޮންޒަވޭޓިވް ޕާޓީއަށް އޯވަރޯލް މެޖޯރިޓީ ނުވަތަ އެހެން ހުރިހާ ޕާޓީއަކަށް ލިބޭނެ ގޮނޑިއަށް ވުރެ މަަދުން ލިބޭނެ ކަމަށް ބީބީސީ އިން ފޯކާސްޓް ކުރާއިރު މިކަން ވެގެން ދާނީ ބޮޑު ވަޒީރު ތެރީސާ މޭ އަށް ކުރިމަތިވެވަޑައިގަންނަވާ ލަދުވެތި ކަމަކަށެވެ. ތެރީސާ މޭ އަވަސް އިންތިޚާބަކަށް ގޮވާލެއްވީ އިނގިރޭސިވިލާތް, ޔޫރަޕްގެ އިއްތިހާދުން (އީޔޫ)، ވަކިވުމުގެ މަޝްވަރާތަކަށް އެކަމަނާގެ ސަރުކާރުގެ ބާރު ޕާލަމެންޓްގައި އިތުރަށް ވަރުގަދަ ކުރެއްވުމުގެ ބޭނުންފުޅުގައެވެ.

މައި އިދިކޮޅު ޕާޓީގެ ލީޑަރު ޖެރެމީ ކޯބިން ބޮޑު ވަޒީރު މޭ ގެ އިސްތިއުފާ އަށް ގޮވާލައްވާފައިވާއިރު، މޭ ވިދާޅުވެފައި ވަނީ އަކަމަނާގެ ޕާޓީ ޔޫކޭގައި "ހަމަޖެހުން" ގާއިމު ކުރައްވާނެ ކަމަށެވެ.

ވޯޓުގެ ދާއިމީ ނަތީޖާ ހުކުރު ދުވަހު މެންދުރުހާއިރު އިއުލާން ކުރެވޭނެ ކަމަށް ބެލެވެއެވެ.

އިނގިރޭސި ވިލާތުގެ ގާނޫނު ހަދާ މަޖިލީހަށް 650 މެމްބަރުން ހޮވާއިރު، ވޯޓު ލުމުގެ ހައްގު ލިބިފައި ވަނީ 45.8 މިލިއަން މީހުންނަށެވެ. ގާނޫނު ހަދާ މަޖިލީހުގައި އޮވާރޯލް މެޖޯރިޓީއެއް ހޯދަން 326 ގޮނޑި ބޭނުންވާއެވެ.

އެގްޒިޓް ޕޯލް ނުވަތަ ވޯޓުލުމަށް ދާ މީހުންގެ ހިޔާލު ހޯދުމުގެ ބަހަަށް ބަލާއިރު ކޮންޒަވޭޓިވް ޕާޓީ އަށް 318 ގޮނޑި ލިބޭނެއެވެ. ލޭބާ ޕާޓީއަށް 267 ގޮނޑި ލިބޭނެއެވެ. އެސްއެންޕި އަށް 32 ގޮނޑި ލިބޭނެ ކަމަށް ބެލެވޭއިރު ލިބަރަލް ޑިމޮކްރޭޓުން އަށް 11 ގޮނޑި ލިބޭނެއެވެ.