ސައޫދީއާއި ތުރުކީގެ ގުޅުން ރަނގަޅުކުރުމަށް ދެގައުމުގެ ވެރިން ވައުދުވެވަޑައިގެންފި
30 އެޕްރީލު 2022 | ހޮނިހިރު 02:37ސައޫދީ އަރަބިއްޔާގެ ނޫސްވެރިޔާ ޖަމާލު ޚާޝޮގްޖީ، ތުރުކީގައި ހުންނަ ސައުދީ ކޮންސިޔުލޭޓްގައި މަރާލި ހާދިސާއާ ގުޅިގެން ދެ ގައުމުގެ ގުޅުން ވަނީ ވަރަށް ބޮޑަށް ހީނަރުވެފައި
ތުރުކީގެ ރައީސްއާއި ސައޫދީ ރަސްގެފާނު
ސައޫދީ އަރަބިއްޔާއާއި ތުރުކީގެ ގުޅުން ކުރިން އޮތްގޮތަށް އިއާދަކުރައްވާނެކަމަށް، ސައޫދީ އަރަބިއްޔާގެ ވަލީ އަހުދު މުހައްމަދު ބިން ސަލްމާންއާއި ތުރުކީގެ ރައީސް ތައްޔިބު އުރުދުޣާން ވައުދުވެވަޑައިގެންފިއެވެ.
ސައޫދީ އަރަބިއްޔާގެ ނޫސްވެރިޔާ ޖަމާލު ޚާޝޮގްޖީ, ތުރުކީގައި ހުންނަ ސައޫދީ ކޮންސިޔުލޭޓްގައި މަރާލި ހާދިސާއާ ގުޅިގެން ދެ ގައުމުގެ ގުޅުން ވަނީ ވަރަށް ބޮޑަށް ހީނަރުވެފައެވެ. ޚާޝޮގްޖީގެ މަރަށްފަހު އުރުދުޣާން ސައޫދީއަށް ކުރައްވާ ފުރަތަމަ ދަތުރުފުޅުގައި އެގައުމުގެ ވަލީ އަހުމަދު މުހައްމަދު ބިން ސަލްމާންއާ ވަނީ ބައްދަލުކުރައްވާފައެވެ.
ސައޫދީގެ ސްޓޭޓް ނިއުސް އެޖެންސީ (އެސްޕީއޭ)ން އާންމުކޮށްފައިވާ ފޮޓޯތަކުގައި އުރުދުޣާން، މުހައްމަދު ބިން ސަލްމާންއާ ބައްދަލުކުރައްވާ ފޮޓޯތައް ހިމެނެއެވެ. މުހައްމަދު ބިން ސަލްމާނަކީ ޚާޝޮގްޖީ މަރާލުމުގެ އަޑީގައި ހުންނެވި ބޭފުޅާކަމަށް އެމެރިކާގެ އިންޓެލިޖެންސް އޮފިޝަލުން ގެންދަވަނީ ތަކުރާރުކޮށް ވިދާޅުވަމުންނެވެ. އެކަން ސައޫދީން އަންނަނީ ދޮގުކުރަމުންނެވެ.
މިބައްދަލުކުރެއްވުމުގައި ދެ ގައުމުގެ ގުޅުން އެކި ދާއިރާތަކުން ބަދަހި ކުރެވޭނެ ގޮތްތަކާ ގުޅޭގޮތުން މަޝްވަރާކުރައްވާފައިވާކަމަށް އެސްޕީއޭން ވަނީ ރިޕޯޓްކޮށްފައެވެ.
ތުރުކީގެ ސްޓޭޓް މީޑިޔާއިން އާންމުކޮށްފައިވާ ފޮޓޯތަކުގައި ސައޫދީ ރަސްގެފާނާ އުރުދުޣާން ބައްދަލުކުރައްވާ ފޮޓޯތައް ހިމެނެއެވެ. އުރުދުޣާން ސައޫދީއަށް ވަޑައިގެންނެވީ ހުކުރު ދުވަހުއެވެ. ވަރުގަދަ ސެކިޔުރިޓީއަކާއެކު އުރުދުޣާން ސައުދީއަށް ވަޑައިގެންނެވީ އުމްރާގެ އަޅުކަން އަދާކުރެއްވުމަށެވެ.
ސައޫދީއަށް ފުރާވަޑައިގަތުމުގެ ކުރިން އުރުދުޣާން ވަނީ ދެގައުމުގެ ގުޅުން އަލުން ބަދަހިކުރެއްވުމަށް އުންމީދުކުރައްވާކަމަށް ވިދާޅުވެފައެވެ. އަދި އެކި ދާއިރާތަކުން ގުޅުން ބަދަހިކުރެވޭނެކަމަށް ގަބޫލުކުރައްވާކަމަށް ވިދާޅުވިއެވެ. އޭގެތެރޭގައި ޑިފެންސާއި ފައިނޭންސްގެ ދާއިރާ ހިމެނެއެވެ.
