ރިޔާނީ ބޭނުންވަނީ އަންހެނުންނަށް އެމީހުން ބޭނުން ކޮންމެ ކަމެއް ކުރެވޭނެ ކަން ބުނެދޭން

މަޖްދާ އަލް-ރިޔާނީއަކީ ލީބިޔާއަށް އުފަން އުމުރުން 29 އަހަރުގެ ކުޅަދާނަ އަންހެނެކެވެ. އޭނާއަކީ ދިރިއުޅުމަށް އެތައް މަސައްކަތެއް ކުރަމުންދާ މީހެކެވެ. އޭނާއަށް ތަފާތު އެކި ހުނަރުތައް ލިބިގެންވާއިރު އޭނާ ގެންދަނީ އެ ހުނަރުތަކުގެ ބޭނުން އެންމެ ފުރިހަމަ ގޮތުގައި ހިފަމުންނެވެ.

އޭނާއަކީ ކްލިނިކަލް ނިއުޓްރިޝަން ސްޕެޝަލިސްޓެއްގެ އިތުރުން، ލީބިޔާގެ ރޭޑިއޯ ސްޓޭޝަނެއްގައި ސިއްހީ ޕްރޮގްރާމުތައް ހުށަހެޅުންތެރިއެއްގެ އިތުރުން ކުރެހުންތެރިއެކެވެ. ރިޔާނީ އުޅެ ބޮޑުވި މުޖުތަމައުގައި އަންހެނުންނަށް ކުރެވޭނީ ވަކި މަސައްކަތްތަކެއް ކަމުގައި ވަނީ ކަނޑައަޅައި ނިންމާފައެވެ. އެހެންނަމަވެސް ރިޔާނީ ބޭނުންވަނީ އަންހެނުންނަށް ކުރެވޭނެ މަސައްކަތްތަކަށް ވަކި ލިމިޓެއް ނެތްކަން އަންގައިދޭށެވެ.

އޭނާ ބުނީ އޭނާއާ އެންމެ ގާތްކޮށް އުޅޭ މީހުންނަކީ ހުރިހާ ކަމަކަށްވެސް ވަރަށް ހިތްވަރުދޭ ބައެއް ކަމަށެވެ. އެހެންނަމަވެސް އޭނާ އެކުރާ މަސައްކަތްތައް ކުރާތީ އެކި މީހުންގެ ފަރާތުން ފާޑުކިޔުންތައް އަމާޒުވާކަމުގައި އޭނާ ބުނެފައިވެއެވެ.

މުޖުތަމައަށް ނިކުމެ، އިންޓަރވިއުތައް ދީ ހަދާއިރު މުޖުތަމައު އިން އެކި ގޮންޖެހުންތައް ކުރިމަތިވުމަކީ އުނދަގޫ ކަމެއް ކަމަށް އޭނާ ބުނެފައި ވެއެވެ.

އެހެންނަމަވެސް މިފަދަ ފާޑުކިޔުންތަކުގެ ސަބަބުން އޭނާގެ މަސައްކަތް ހުއްޓާނުލާނެ ކަމަށް ރިޔާނީ ބުނެފައިވެއެވެ. ފާޑުކިޔުންތަކުގެ ސަބަބުން އިތުރަށް ކުރިއަށްދިއުމަށް ލިބެނީ ހިތްވަރެއް ކަމުގައި ރިޔާނީ ކިޔައިދިނެވެ.

ރިޔާނީގެ އަވަދިނެތިއުޅޭ ދިރިއުޅުމުގެ ތެރެއިން އޭނާ ގެންދަނީ ކުރެހުމުގެ ވޯކްޝޮޕްތައް ހިންގަމުންނެވެ. މި ވޯކްޝޮޕްއަށް އެކި އުމުރުފުރާތަކުގެ އަންހެނުންގެ ފަރާތުން އެއްބާރުލުން ލިބެމުން ދެއެވެ.

އޭނާ ބުނީ ބިޒީ ދިރިއުޅުމެއްގެ ތެރެއިން ގިނަ މަސައްކަތްތަކެއް ކުރުމަކީ ވަރަށް އުނދަގޫ ކަމެއް ކަމަށެވެ. އެހެންނަމަވެސް ކުރާ ހިތުން ކަމެއް ކުރާނަމަ އެކަމަކަށް ވަގުތު ހޯދައިގެން އެކަމެއް ކުރާނެ ކަމުގައި އޭނާ ބުނެފައިވެއެވެ.