ނޭޓޯގެ ފައުޖުތައް ރަޝިއާ ބޯޑަރުކައިރީ އޮތް ޕޮލެންޑަށް

ބޯލްޓިކް ސަރަހައްދަށް ރަޝިއާއިން އަތުވެދާނެ ނުރައްކަލަކަށް ފިޔަވަޅު އެޅުމުގެ ގޮތުން ނޭޓޯއިން ފޮނުވާ އެކި ގައުމުތަކުގެ ސިފައިންގެ ތެރެއިން އެމެރިކާން ފޮނުވި ސިފައިންގެ ފުރަތަމަ ފައުޖަށް ޕޮލެންޑުން ބުރާސްފަތި ދުވަހު މަރުހަބާ ކިޔައިފިއެވެ.

ރަޝިއާގެ ދެކުނުން ބޯލްޓިކް ކަނޑުގައި އޮންނަ ކަލިންގްރެޑާއި 57 ކިލޯމީޓަރު ދުރުން އޮންނަ އޯޒޭޝްގައި ގާއިމްވާ ނޭޓޯގެ ފައުޖުގައި އެމެރިކާގެ 900 ސިފައިންނާއި އިނގިރޭސިވިލާތުގެ 150 ސިފައިން އަދި ރޫމޭނިއާގެ 120 ސިފައިންހިމެނޭނެއެވެ.

ކަލިނިންގްރެޑަކީ މޮސްކޯއިން އެތަނުގައި ނިއުކްލިއަރ މިސައިލާއި އެސް-400 އިގެ މިސައިލުން ދިފާއުވާ ނިޒާމެއް ގާއިމްކޮށްފައިވާ ތަނެކެވެ.

ވެރިރަށް ވޯސޯގެ އުތުރުން 220 ކިލޯމީޓަރު ދުރުގައި އޮންނަ އޯޒޭޝްއަށް ދިޔަ ފައުޖަށް މަރުހަބާ ކިޔަމުން ނޭޓޯ ސުޕްރީމް އެލައިޑް ކޮމާންޑަރ ޔޫރަޕް، ޖެނެރަލް ކަރޓިސް ސްކެޕަރޮއްޓީ ހާމަ ކުރެއްވި ގޮތުގައި، މި ފައުޖު ޕޮލެންޑްގައި ރުކުރުވާލުން ދައްކުވައިދެނީ ނޭޓޯގެ ބަދަހިކަމާއި ވަރުގަދަ އަޒުމާއި ދުޝްމަނުންނަށް ދެވޭ ވަރުގަދަ މެސެޖެއްކަމަށެވެ.

ރަޝިއާގެ ފަރާތުން އައިސްދާނެ ނުރައްކަލަކުން ސަލާމަތްވުމަށް ނޭޓޯގެ ފައުޖުތައް ފޮނުވައިދނުމަށް ޕޮލެންޑުން އެދެމުންދާތާ އެތައް ދުވަހެއް ވެއްޖެއެވެ.

ވަކިން ޚާއްސަކޮށް 2014 ވަނަ އަހަރު ރަޝިއާއިން ޔޫކްރެއިންގެ ކްރައިމިއާ ހިފި ފަހުން ޕޮލޭންޑުން ގެންދިއައީ އެކަމަށް ބާރުއަޅަމުންނެވެ.

ޕޮލޭންޑްގެ ރައީސްއަންޖްރޭޖް ޑޫޑާ ވިދާޅުވީ މިއީ އެތައް ޖީލުތަކަކުން ކުރަމުން އައި އުއްމީދެއްކަމަށާއި މިއީ ތާރީޚީ ވަގުތުކޮޅެއް ކަމަށެވެ.

ރަޝިއާއިން 2016 ވަނަ އަހަރު މެއިމަހު ވަނީ ނޭޓޯއިން ޕޮލޭންޑް ނުވަތަ ބޯލްޓިކްގެ ގައުމުތަކުގައި ރުކުރުވާލައިފިނަމަ އެ ގައުމުން ހުޅަނގާ ދެކުނު ފަޅީގައި އިތުރު ޑިވިޝަންތަކެއް ގާއިމްކޮށް ފައުޖުތައް އަލުން ފޮނުވާނެ ކަމުގެ އިންޒާރު ދީފައެވެ.

ސޯވިއެޓް ޔޫނިއަންގެ ދުވަސްވަރު އެކުވެރިކޮށް އޮތް ގައުމުތަކުން އެގައުމުތަކުގެ ހިމާޔަތަށް ނޭޓޯގެ ފައުޖުތައް ގެނައުމުން ރަޝިއާއިން އޮތީ ރަތަށް އަރާފައެވެ.