ބާސެލޯނާގެ ޒުވާންތަރި އޮސްމާން ޑެމްބެލޭ މަސައްކަތް ކޮށްފިނަމަ އޭނާ ކުޅޭ ޕޮޒިޝަންގައި ދުނިޔޭގެ އެންމެ މޮޅު ކުޅުންތެރިޔާއަށް ވެވޭނެކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފިއެވެ.

ސެވިޔާއާއި ދެކޮޅަށް ލަލީގާގައި ނުކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމެއްގައި ޑެމްބެލޭ އާއި ބެހޭގޮތުން ޒަވީއަށް ވަނީ ސުވާލު ކުރިމަތިވެފައެވެ. ޒަވީ ބުނީ ޓީމުގެ ކުޅުމުގައި ޑެމްބެލޭ ބަރާބަރަށް ބައިވެރިވެ، މަސައްކަތް ކުރަމުން އަންނަ ކަމަށެވެ. އަދި އޭނާއާއި މެދު އެއްވެސް ޝަކުވާއެއްވެސް ނެތް ކަމަށެވެ.

މި ސީޒަން ނިމުމާއެކު ކުރިއަށް އޮތް ޓްރާންސްފަރ މާކެޓުގައި ޑެމްބެލޭ ބާސެލޯނާ ދޫކޮށްލާފާނެކަމުގެ ބިރު މިހާރު ވަނީ ހީވެފައެވެ. ޒަވީ ބުނީ އެއީ ޑެމްބެލޭ އަމިއްލައަށް ނިންމާނެ ކަމެއް ކަމަށެވެ. ނަމަވެސް މަސައްކަތް ކޮށްފިނަމަ އޭނާ ކުޅޭ ޕޮޒިޝަންގައި ދުނިޔޭގެ އެންމެ މޮޅު ކުޅުންތެރިޔާއަށް ވެވޭނެކަމަށެވެ. އަދި ޑެމްބެލޭ އަކީ ޓީމުގައި ތަފާތުދައްކާ، ޓީމަށް ވަރަށް މުހިންމު ކުޅުންތެރިއެއްގެ ގޮތުގައި ޒަވީ ފާހަގަ ކުރިއެވެ.

އިންޓަރނޭޝަނަލް ބްރޭކަށްފަހު ބާސެލޯނާއިން މިރޭ ސެވިޔާ އާއި ދެކޮޅަށް ނުކުންނައިރު، ދެޓީމުގެވެސް އަމާޒު އޮތީ ލީގު ތާވަލުގެ ދެވަނަ ޔަގީން ކުރުމަށެވެ. ޒަވީ ބުނީ މިއީ ބާސެލޯނާއަށް ފައިނަލެއް ކަހަލަ މެޗެއް ކަމަށެވެ. އަދި ޓީމުން މިހާރު ދައްކަމުން އަންނަ ރަނގަޅު ކުޅުމަށް ބަލައި އެކަން ކާމިޔާބުވާނެ ކަމަށް ގަބޫލުކުރާ ކަމަށެވެ.

ލީގު ތާވަލުގެ އެއްވަނައިގައި ރެއާލް މެޑްރިޑް އޮތީ 66 ޕޮއިންޓު ހޯދައިގެންނެވެ. 57 ޕޮއިންޓާއެކު ދެވަނައިގައި ސެވިޔާ އޮތްއިރު، ތިންވަނައިގައި ބާސެލޯނާ އޮތީ 54 ލިބިގެންނެވެ. އެހެންކަމުން ތާވަލުގެ ދެވަނައަށް އެރުމަށްޓަކައި މި މެޗުން މޮޅުވުން ބާސެލޯނާއަށް މަޖުބޫރެވެ. އޭރުން ފައިދާ ގޯލާއެކު ބާސެލޯނާއަށް ތާވަލުގެ ދެވަނައަށް ޖެހިލެވޭނެއެވެ.

ޒަވީ ބުނީ ސެވިޔާއިން މިވަގުތު އޮތީ އެންމެ ރަނގަޅު ފޯމުގައި ނޫން ނަމަވެސް އެޓީމަކީ ކޮންމެ ފަދަ ނަތީޖާ އެއްވެސް ނެރެވިދާނެ ޓީމެއް ކަމަށެވެ. އަދި އެޓީމުގެ ކޯޗުގެ މޮޅުކަން ފާހަގަކޮށް ޒަވީ ވަނީ ސެވިޔާއަކީ ތަފާތު މޮޅު ޓީމެއްގެ ގޮތުގައި ފާހަގަކޮށްފައެވެ. ތާވަލުގެ ދެވަނައިގައި ޓީމު އޮތީ އޭގެ ހެއްކެއްކަމަށް ޒަވީ ބުންޏެވެ.

ސެވިޔާއިން ލަލީގާގައި އެންމެ ފަހުން ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. ބާކީ ހަތަރު މެޗުންވެސް އެޓީމު ވަނީ ނަތީޖާ ނުނެރެވި އެއްވަރުވެފައެވެ. ބާސެލޯނާ ލީގުގައި އެންމެ ފަހުން ކުޅުނު ފަސް މެޗުވެސް ކާމިޔާބު ކުރިއެެވެ.