ބާސާއިން ލަކަޒޭޓް ވެސް ގެންނަނީ!

ހިލޭ އެއްބަސްވުމެއްގެ ދަށުން އާސެނަލްގެ ފޯވާޑް ލަކަޒޭޓް ގެންނަން ބާސެލޯނާއިން މަސައްކަތް ފަށައިފިއެވެ.

ހިލޭ އެއްބަސްވުމެއްގެ ދަށުން އާސެނަލްގެ އޮބާމަޔަން ގެނެސް, އޭގެ ފައިދާ ބާސާއަށް ދަނީ ވަރަށް ބޮޑަށް ކުރަމުންނެވެ. އޮބާމަޔަން އަންނަނީ ބާސެލޯނާގައި ތަފާތު ދައްކަމުންނެވެ. އެހެންކަމުން ބާސެލޯނާގެ ވިސްނުން މިހާރުހުރީ އާސެނަލްގައި އޮބާމަޔަންއާއެކު ކުރިއަށް ކުޅުނު ލަކަޒޭޓްވެސް ކުރިއަށް އޮތް ސީޒަނަށް ގެންނަން ކަމަށް ރިޕޯރޓްތައް ބުނެއެވެ. ލަކަޒޭޓް އާސެނަލްއާއެކު ހަދާފައިވާ އެއްބަސްވުން މިސީޒަންގެ ނިޔަލަށް ހަމަވާނެއެވެ. އޭނާ ދޫކޮށްލަން ކޯޗު އާޓެޓާ ހުރީ ތައްޔާރަށެވެ. އެކަމަކު ލަކަޒޭޓް ހޯދުމަށް އޭނާގެ ކުރީގެ ކްލަބް ލިޔޯން ޝައުޤުވެރިވެއެވެ.

ބާސެލޯނާގެ ޝައުޤުވެރިކަން ބޮޑީ ހާލާންޑްއާއި, ސަލާހުގެ އިތުރުން ލެވާންޑޮސްކީއަށެވެ. އެކަމަކު އެކުޅުންތެރިންގެ އަގު ބޮޑުވުމުން, ބާސާ މިހާރު އޮތް ހާލަތަށް ބަލާއިރު އެންމެ ފަސޭހަ އަދި ޚަރަދު ކުޑަގޮތަކީ ލަކަޒޭޓް ގެނައުމެވެ.