ސްޕެއިންގެ ބާސެލޯނާއަށް ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް ކްލަބުގައި ހުރި ދުވަސްވީ ކުޅުންތެރިންގެ މުސާރަ ދަށްކުރުމުގެ މަސައްކަތް އެކްލަބުން ފަށައިފިއެވެ.

މުސާރަ ދަށްކުރުމަށްޓަކައި ބާސެލޯނާއިން މަޝްވަރާކުރާނެކަމަށް ރިޕޯޓުކޮށްފައިވާ ކުޅުންތެރިންނަކީ ޖެރާޑް ޕީކޭ، ޖޯޑީ އަލްބާ އަދި ސާޖިއޯ ބުސްކެޓްސްއެވެ. މިހާރުގެ އެގްރިމެންޓަށް ބަލާނަމަ މިއަންނަ ސީޒަންގެ ތެރޭގައި މިކުޅުންތެރިންނަށް ގާތްގަނޑަކަށް 100 މިލިއަން ޔޫރޯ ކްލަބުން ހޭދަކުރަން ޖެހޭނެއެވެ. އެއީ މި ކުޅުންތެރިންގެ މުސާރައާއި، ޑިލޭޑް ޕޭމެންޓްސް އަދި ބޯނަސްގެ ގޮތުގައެވެ.

މި ކުޅުންތެރިންގެ މުސާރައިން ބައެއް އުނިކުރެވިއްޖެ ނަމަ ނުވަތަ ޕޭމެންޓް ލަސް ކުރުމަށް ކުޅުންތެރިން އެއްބަސްވެއްޖެ ނަމަ ބާސެލޯނާއަށް މިއަހަރުގެ ސަމާ ޓްރާންސްފާގައި ރަނގަޅު ކުޅުންތެރިންތަކެއް ގަތުމުގެ ފުރުސަތު އޮންނާނެއެވެ. އެހެންކަމުން ޓީމުން އަންނަނީ އެކަމަށްޓަކައި ގިނަ މަސައްކަތްތަކެއް ކުރަމުންނެވެ.

ޓީމުން މަސައްކަތް ކުރަމުން އަންނަ ގޮތަށް މި ކުޅުންތެރިންގެ މުސާރައަށް ބަދަލުގެންނަން އެކުޅުންތެރިން އެއްބަސް ނުވެއްޖެނަމަ ފައިނޭންޝިއަލް ފެއަރޕްލޭގެ ބިރު ބާސާއަށް އެބައޮތެވެ. ބާސާއިން އަންނަނީ އާލިން ހާލަންޑް އަދި ރޮބާޓް ލެވަންޑޯސްކީ ފަދަ ބޮޑެތި ކުޅުންތެރިންނަށް ކަޅި އަޅަމުންނެވެ.

ބާސާގެ ޚަރަދުތައް ކުޑަ ކުރުމަށްޓަކައި ކްލަބުގެ ރައީސް ޔޮއާން ލަޕޯޓާ އަންނަނީ ގިނަ މަސައްކަތްތަކެއް ކުރަމުންނެވެ. ނަމަވެސް މިކަމަށް ސީދާ ހައްލެއް އަދި ނުލިބެއެވެ.

މި ކުޅުންތެރިންގެ މުސާރަ ކުޑަ ކުރުމަކީ ބާސެލޯނާގެ ސްޕޯޓިންގ ޑިރެކްޓަރ މެތިއު އަލެމަނީއަށް ފަސޭހަ ކަމަކަށް ނުވާނެއެވެ. މި ތިން ކުޅުންތެރިންވެސް ވަނީ ޓީމުގެ މާލީ ހާލަތަށް ބަލައި އެމީހުންގެ ޕޭމެންޓުތައް ޑިލޭ ކުރުމަށް މީގެ ކުރިންވެސް އެއްބަސްވެފައެވެ. އަދި ބޯނަސްއިން ބައެއް ކަނޑާލުމަށްވެސް އެކުޅުންތެރިން އޭރު އެއްބަސްވިއެވެ. ނަމަވެސް ސީދާ މުސާރަ ކުޑަ ކުރުމަށް ބާސާއިން މަސައްކަތްކުރާ މިއީ ފުރަތަމަ ފަހަރެވެ.

ޓީމުގެ ދުވަސްވީ މިޑްފީލްޑަރު ބުސްކެޓްސްގެ ކޮންޓްރެކްޓް ހަމަވާނީ 2023 ވަނަ އަހަރުއެވެ. އެހެންކަމުން ކޮންޓްރެކްޓް އިތުރުކޮށް، ޕޭމެންޓް ފަހުން ދައްކާގޮތަށް އޭނާ އެއްބަސް ކުރުވިދާނެކަމަށް ބެލެވެއެވެ. ނަމަވެސް ޕީކޭގެ ކޮންޓްރެކްޓް ހަމަވާނީ 2024 ވަނަ އަހަރުއެވެ. ކޮންޓްރެކްޓް ހަމަވާއިރު އޭނާއަށް 37 އަހަރު ވާނެއެވެ. އަލްބާގެ ކޮންޓްރެކްޓް ހަމަވާއިރު އޭނާއަށްވެސް 35 އަހަރު ވާނެއެވެ.

އެހެންކަމުން މި ދެ ކުޅުންތެރިން މިޑީލަށް އެއްބަސް ކުރުވުމަކީ ބާސެލޯނާއަށް ފަސޭހަ ކަމަކަށް ނުވާނެއެވެ. ނަމަވެސް ޑިފެންޑަރު ސަމިއުލް އުމްޓިޓީގެ ފަރާތުން ނަމޫނާ ނަގައިގެން މި ކުޅުންތެރިންވެސް މުސާރަ ކުޑަ ކުރުމަށް އެއްބަސްވުމަކީ މިވަގުތު ޓީމަށް އެންމެ ފައިދާ ބޮޑު ގޮތެވެ.