ގުރައިދޫ މަރުކަޒުގައި 2020 ވަނަ އަހަރާއި ހަމައަށް ސައިކިއޭޓްރިސްޓަކު ހުރި: ޖެންޑަރ މިނިސްޓްރީ

ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި ސައިކިއޭޓްރިސްޓެއް ނުހުންނަތާ ނުވަ އަހަރުވެފައިވާ ކަމަށް އެޗްއާރްސީއެމުން ބުނުމާއި ގުޅިގެން ޖެންޑަރ މިނިސްޓްރީން އެކަން ދޮގުކޮށްފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޖެންޑަރ މިނިސްޓްރީގެ ޕާމަނަންޓް ސެކްރެޓަރީ ޒައުފިޝާން އަބްދުﷲ ކަމާލުއްދީން ވިދާޅުވީ ފެބްރުއަރީ 2020 އާއި ހަމައަށް ސައިކިއޭޓްރިސްޓެއް ހުރި ކަމަށާއި އޭގެ ފަހުން ވެސް ޚިދުމަތް މެދުނުކެނޑި ފޯރުކޮށްދީފައިވާ ކަމަށެވެ. އެގޮތުން އައިޖީއެމްއެޗްއާ އެކު މަސައްކަތްކޮށް، އެ ޚިދުމަތް ފޯރުކޮށްދިން ކަމަށް އޭނާ ވިދާޅުވިއެވެ.

Advertisement

ފަލަސުރުޚީ ޕްރޮގްރާމުގައި ވާހަކަދައްކަވަމުން ޖެންޑަރ މިނިސްޓްރީގެ ޑިރެކްޓަރ އޮފް ކުއަލިޓީ އެޝިއުރަންސް އެންޑް މެނޭޖްމަންޓް އޮފް ސްޓޭޓް ކެއަރ އިންސްޓިޓިއުޝަންސް އައިޝަތު ނާޒް ވިދާޅުވީ އެންމެ ފަހުން އެޗްއާރްސީއެމުން ހުށަހަޅާފައިވާ ރިޕޯޓުގައި 30 ރިކޮމަންޑޭޝަން ވާއިރު، މިއަހަރުގެ ރިޕޯޓްގައި 6 ރިކޮމަންޑޭޝަނެއް ހުށަހަޅާފައިވާ ކަމަށެވެ. މިކަމުން ވެސް މަރުކަޒަށް ގެނައި ބަދަލުތައް ނުވަތަ ކަންތައްތައް ހާސިލްވި މިންވަރު އެނގިގެން ހިނގައްޖެ އައިޝަތު ނާޒް ކަމަށެވެ.

ނާޒް ވިދާޅުވީ 2021 ވަނަ އަހަރު އެޗްއާރްސީއެމުން ފާހަގަކޮށްފައިވާ ކަންތައްތަކުގެ ތެރެއިން 80 އިންސައްތަ ކަންތައްތައް މިހާރު ހާސިލްކޮށްފައިވާ ކަމަށެވެ. ބައެއް ކަންތައްތަކަކީ އެއްމަހުން ނުވަތަ ދެ މަހުން ކުރެވޭނެ ކަންތައްތައް ނޫން ކަމަށާއި ކޮވިޑުގެ ހާލަތާއި ގުޅިގެން ވަރަށް ގިނަ ގޮންޖެހުންތައް ދިމާވި ކަމަށް އޭނާ ވިދާޅުވިއެވެ.  

ގުރައިދޫ މަރުކަޒުގައި ކުޑަކުދިން ވަކިން ބެހެއްޓުމަށް ކުރަން ޖެހޭ މަސައްކަތް މިހާރު ފަށާފައިވާކަން ފާހަގަކުރައްވާ ނާޒް ވިދާޅުވީ، ކުޑަކުދިންގެ ވާރޑުގެ މަސައްކަތްވެސް ކުރިއަށްދާ ކަމަށެވެ. އަދި އޮމްބަޑްސްޕާރސަންގެ ރިކޮމެންޑޭޝަންތައް ޖޫން މަހުގެ ނިޔަލަށް ހާސިލް ކުރުން އެއީ އަމާޒެއްކަމުގައިވެސް ނާޒް ވިދާޅުވިއެވެ.

ޕްރޮގްރާމުގައި ޒައުފިޝާން އިތުރަށް ވިދާޅުވީ ގުރައިދޫ މަރުކަޒަކީ 160 ޖާގައިގެ މީހުންގެ ކެޕޭސިޓީގެ ތަނެއް ކަމަށާއި އެތަނުގައި 195 މީހުން މިވަގުތު ބަލަހައްޓަމުން ގެންދާ ކަމަށެވެ. އަދި އެންމެ ގިނައިން ބަލަހައްޓަނީ ނަފްސާނީ ގޮތުން ނުކުޅުދުންތެރިކަން ހުރި މީހުން ކަމަށްވާއިރު 86 މީހުން ފަރުވާ ފުރިހަމަ ކުރުމަށްފަހު އާއިލާ އާއި ހަވާލުކުރެވުނު ކަމަށެވެ.

މީގެއިތުރުން ފަރުވާ ފުރިހަމަ ކުރުމަށްފަހު އާއިލާތަކުން ހަވާލުވާން ބޭނުންނުވާ 20 މީހުން ތިބި ކަމަށާއި ވެއިޓް ލިސްޓުގައި ވެސް 15 މީހުން އެބަތިބި ކަމަށް އޭނާ ވިދާޅުވިއެވެ.

ޒައުފިޝާން ވިދާޅުވީ ތަނުގެ ޓެކްނިކަލް ކެޕޭސިޓީ އިތުރުކުރަން ޖެހޭ ކަމަށާއި އެތަނުގެ އޮނިގަނޑު ބަދަލު ކުރުމަށްފަހު، ގިނަ ކަންތައްތައް ކަނޑައަޅާފައިވާ ކަމަށެވެ.

ގުރައިދޫ މަރުކަޒަކީ ދައުލަތުގެ އެހީ ކޮންމެހެން ބޭނުންވާ މީހުންނަށް އެ ހައްގު ކަށަވަރުކޮށްދިނުމަށް 1970 ގެ އަހަރުތަކުގައި ހުޅުވި މަރުކަޒެކެވެ.