މެމްބަރުން ހަމަކުރުމަށް މުއްދަތު ދިން 4 ޕާޓީއަށް މީގެ ކުރިންވެސް ފުރުސަތު ދިނިން: ފުއާދު

3،000 މެމްބަރުން ހަމަނުވެގެން މެމްބަރުން ހަމަކުރުމަށް ނޯޓިސް ދީފައިވާ ޕާޓީތަކަށް މީގެ ކުރިންވެސް ނޯޓިސް ދީފައިވާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެމްބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އިލެކްޝަންސް ކޮމިޝަނުން މިހާރު ވަނީ 3،000 މެމްބަރުން ހަމަނުވާ 4 ސިޔާސީ ޕާޓީއަކަށް މެމްބަރުން ހަމަކުރުމަށް 3 މަސް ދުވަހުގެ ނޯޓިސްއެއް ދީފައެވެ. އެ ޕާޓީތަކަކީ ޑީއާރުޕީ، އެމްއާރުއެމް، އެމްޓީޑީ އަދި ލޭބަރ ޕާޓީއެވެ.

Advertisement

މިކަމާއި ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ފުއާދު ވިދާޅުވީ ކޮވިޑް-19 ގެ ހާލަތުގެ ކުރިންވެސް މެމްބަރުން ހަމަ ކުރުމަށް އެ ޕާޓީތަކަށް މުއްދަތު ދީފައިވާނެ ކަމަށެވެ. އެހެންނަމަވެސް ކޮވިޑް-19ގެ ހާލަތާއި ގުޅިގެން އިއުލާނުކުރި ސިއްހީ ކުއްލި ނުރައްކަލުގެ ހާލަތާއެކު މި ނޯޓިސް އުވާލީކަމަށް ފުއާދު ވިދާޅުވިއެވެ. އަދި މި ހާލަތު އުވާލުމުން މުއްދަތު ގުނަން ފަށާނެ ކަމަށް ފުއާދު ވިދާޅުވިއެވެ.

ފުއާދު ވިދާޅުވީ ޕާޓީތައް އުވިގެންދާއިރު ޕާޓީތަކުގައި ހުންނަ އެކި މައްސަލަތަކަށްވެސް ބައްލަވާނެ ކަމަށެވެ. މިގޮތުން ދަރަނީގެ މައްސަލަތައް ފަދަ މައްސަލަތަކުގައި އެ ޕާޓީއެއްގެ އަސާސީ ގަވާއިދުގައި އޮންނަ ގޮތުގެ މަތިން އަމަލުކުރައްވާނެ ކަމަށާއި، އަދި ގާނޫނީ ބޭފުޅުންގެ ލަފާ މި ކަންކަމުގައި ހޯއްދަވާނެ ކަމަށް ފުއާދު ވިދާޅުވިއެވެ.

ނޯޓިސް ދީފައިވާ ޕާޓީތަކުގެ ތެރެއިން ޑިއާރުޕީގެ މައްސަލައެއް މިހާރުވެސް ކޯޓުގައި ކުރިއަށްދާއިރު، މިކަމަށް އިޝާރާތްކުރައްވައި ފުއާދު ވިދާޅުވީ އެ ޕާޓީ އުވާލަންޖެހޭ ހާލަތެއް ދިމާވެއްޖެނަމަ އެކަމުގައި އަމަލުކުރާނެ ގޮތެއް ގާނޫނީ ލަފާގެ މަތިން ހޯއްދަވާނެ ކަމަށެވެ