އިލެކްޝަންސް ކޮމިޝަނަށް ސިޔާސީ ނުފޫޒު ވަދެފައި ކަމަށް އޭނާ ވިދާޅުވި
އިލެކްޝަންސް ކޮމިޝަންގެ އިދާރާ: އެ ކޮމިޝަންގެ މިނިވަންކަމާމެދު ގިނަ ފަރާތްތަކުން އަންނަނީ ސުވާލު އުފައްދަމުން
އިލެކްޝަންސް ކޮމިޝަންގެ މެމްބަރުން މިހާރުން މިހާރަށް އިސްތިއުފާދެއްވަންެޖެހޭ ކަމަށް އަދާލަތު ޕާޓީގެ ނައިބް ލީޑަރު އަލީ ޒާހިރު ވިދާޅުވެއްޖެ އެވެ.
އަލީ ޒާހިރު ކުރައްވާފައިވާ ޓްވީޓެއްގައި ވިދާޅުވެފައިވަނީ، އިލެކްޝަންސް ކޮމިޝަނަށް ސިޔާސީ ނުފޫޒު ވަދެ، އެ ކޮމިޝަން ވަނީ މިނިވަން އިންސާފުވެރި އިންތިހާބެއް ބޭއްވޭނެ ފަދަ ހާލަތެއްގައި ނޫން ކަމަށެވެ. އެހެންކަމުން ކޮމިޝަންގެ މެމްބަރުން މިހާރުން މިހާރަށް އިސްތިއުފާދޭން ޖެހޭ ކަމަށް އޭނާ ވިދާޅުވި އެވެ.
އަލީ ޒާހިރު މިގޮތަށް ވިދާޅުވިއިރު، އިލެކްޝަންސް ކޮމިޝަނުން ވަނީ އޭޕްރީމް މަހުގެ 8 ވަނަ ދުވަހު ލޯކަލް ކައުންސިލް އިންތިހާބު ބާއްވާނެކަން އިއުލާނުކޮށް، ކެންޑިޑޭޓުންނަށް ވުމުގެ ފުރުސަތު އަލުން ހުޅުވާލާނެ ކަމަށް ވަނީ ބުނެފަ އެވެ.
އާދިއްތަ ދުވަހުގެ ރޭ ނޫސްވެރިންނަށް މައުލޫމާތުދެއްވަމުން އިލެކްޝަންސް ކޮމިޝަންގެ ނައިބް ރައީސް އަމްޖަދު މުސްތަފާ ވިދާޅުވީ އިންތިހާބު ބާއްވާ ތާރީހު އަލުން އިއުލާންކުރީ އިންތިހާބު ބާއްވަން އޮތް ތާރީހުން ފެށިގެން ދެމަސް ދުވަހަށް އިންތިހާބު ފަސްކުރުމަށް ސިވިލް ކޯޓުން ހުކުމެއް ކުރުމުން ކަމަށާއި އިންތިހާބު ފަސްވި ނަމަވެސް އިންތިހާބުގެ މިނިވަންވެފައި އިންސާފުވެރިވާނެ ކަމަށެވެ.
ލޯކަލް ކައުންސިލްގެ އިންތިހާބު ބާއްވަން ފުރަތަމަ ކަނޑައެޅީ މި މަހުގެ 14 އެވެ. ނަމަވެސް ޕީޕީއެމްއަށް ތައްޔާރުވެވިފައި ނުވާ ކަމަށް ބުނެ ޕީޕީއެމްގެ މުސްތަޝާރު އަދި ރައީސުލްޖުމްހޫރިއްޔާ އަބްދުﷲ ޔާމީންގެ ފެކްޝަނުން ސިވިލް ކޯޓަށް ހުށަހެޅި މައްސަލައާ ގުޅިގެން އިންތިހާބު ދެމަސް ދުވަހަށް ފަސްކުރަން ސިވިލް ކޯޓުން ހުކުމްކުރީ މިދިޔަ ނޮވެމްބަރު މަހުގެ ތެރޭގަ އެވެ.
