3،000 މެމްބަރުން ހަމަނުވާ 4 ޕާޓީއަކަށް ނޯޓިސް ދެނީ
18 މާރިޗު 2022 | ހުކުރު 08:49ސިޔާސީ ޕާޓީތަކުގައި 3،000 މެމްބަރުން ހަމަވާންޖެހޭ
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއް
ރާއްޖޭގައި ގާއިމްކޮށްފައިވާ ސިޔާސީ ޕާޓީތަކުގެ ތެރެއިން 3،000 މެމްބަރުން ހަމަނުވާ 4 ޕާޓީއަކަށް ނޯޓިސް ދޭން ނިންމައިފިއެވެ.
ރާއްޖޭގެ ސިޔާސީ ޕާޓީތަކުގެ ގާނޫނުގައި ވާގޮތުން ކޮންމެ ޕާޓީއެއްގައިވެސް މަދުވެގެން 3،000 މެމްބަރުން ހަމަވާންޖެހެއެވެ. މެމްބަރުން ހަމަނުވާނަމަ އެ އަދަދު ހަމަކުރުމަށް ވަކި މުއްދަތެއް ދެވެއެވެ. އެ މުއްދަތުގެ ތެރޭގައި މެމްބަރުން ހަމަނުކުރާނަމަ އެ ޕާޓީއެއް އުވިގެންދާނެއެވެ. އެހެންނަމަވެސް ސިއްހީ ކުއްލި ނުރައްކަލުގެ ހާލަތާއި ގުޅިގެން މިގޮތަށް މެމްބަރުން ހަމަކުރުމަށް މުއްދަތު ދިނުމާއި، ޕާޓީ އުވާލުން ވަނީ މެދުކަނޑާލާފައެވެ.
އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ ސިއްހީ ކުއްލި ނުރައްކަލުގެ ހާލަތު ނިމުމާއި ގުޅިގެން ގާނޫނާ އެއްގޮތަށް 3،000 މެމްބަރުން ހަމަނުވާ ޕާޓީތަކަށް މެމްބަރުން ހަމަކުރުމަށް މުއްދަތު ދޭން ނިންމާފައިވާކަަމަށެވެ. މިގޮތުން 3،000 މެމްބަރުން ހަމަނުވާ 4 ޕާޓީއަކަށް ޤާނޫނުގައިވާ ގޮތުގެމަތިން، 3 މަސްދުވަހުގެ ނޯޓިސް ދޭން ނިންމާފައިވާކަމަށް ހަބީބު ވިދާޅުވިއެވެ.
2021 ވަނަ އަހަރު ނިމުނު އިރު 10،000 މެމްބަރުން ހަމަވެފައިވަނީ 4 ޕާޓީއެއްގައި ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވަނީ މީގެ ކުރިން ވިދާޅުވެފައެވެ. އެއީ އެމްޑީޕީ، ޕީޕީއެމް، ޖުމްހޫރީ ޕާޓީ އަދި އަދާލަތު ޕާޓީގައި ކަމަށް ފުއާދު ވިދާޅުވިއެވެ. އަދި އެމްއެންޕީއާއި، އެމްޑީއޭގައި 10،000 މެމްބަރުން ހަމަވާން ކައިރިވެފައިވާކަމަށް ފުއާދު ވިދާޅުވިއެވެ.
ބާކީ ޕާޓީތަކުގައި މެމްބަރުން ތިބީ ވަރަށް މަދުން ކަމަށް ފުއާދު ވިދާޅުވިއެވެ. 3،000 މެމްބަރުން ހަމަނުވާ ޕާޓީވެސް އެބަހުރި ކަމަށް ފުއާދު ވިދާޅުވިއެވެ.
