މެމްބަރުން ދަނީ ލޫޓުވުމުން، ހުރިހާ ކަމެއްގެ ޒިންމާ ނަގަންޖެހޭނެ: ސައުދުﷲ

ޤާނޫނު ހަދާ މަޖިލީހުގެ މެމްބަރުން ގެންދަވަނީ، އެކި ބިލްތައް ފާސްކޮށް ރައްޔިތުން "ލޫޓުވަމުން" ކަމަށާއި، ޤައުމު މިހާލަތައް ވައްޓާލުމުގެ ޒިންމާ ރައްޔިތުންގެ މަޖިލީހުގެ މެމްބަރުން ނަންގަވަންޖެހޭނެ ކަމަށް މޯލްޑިވްސް ޓްރޭޑް ޔޫނިއަންގެ ސެކެރެޓަރީ ޖެނެރަލް ސައުދުﷲ އަހުމަދު ވިދާޅުވެއްޖެ އެވެ.

ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ޓްރޭޑް ޔޫނިއަންގެ ސެކެރެޓަރީ ޖެނެރަލް ސައުދުﷲ އަހުމަދު ރިޔާސީ ބަޔާނުގައި ރާއްޖޭގެ އިޤްތިސާދު ކުރިއަރާފައިވާ ކަމަށް ރައީސް އަބްދުﷲ ޔާމީން ވިދާޅުވިއިރު، އެއީ އެންމެ ރަނގަޅު ވާހަކަފުޅެއް ނޫން ކަމަށެވެ. އިޤްތިސާދަކީ، ބޮޑު ހިލައާއި، ބަނދަރު މަތީގަިއ ހުންނަ ބާ ދަގަނޑެއް ނޫން ކަމަށާއި، އިޤްތިސާދަކީ އާންމު ރައްޔިތުންގެ ދިރިއުޅުމުގެ ހާލަތުގެ ފުދުންތެރިކަން ބައްޓަންވާ ގޮތް ކަމަށް އޭނާ ވިދާޅުވި އެވެ. އޭގެ އިތުރުން، ދަރަނި އިތުރު ވާއިރު އެއީ އިޤްތިސާދު ރަނގަޅުވުން ކަމަށް ނުބުނެވޭނެ ކަމަށާއި، ޤައުމުގެ މިއަދު ހާލަތަށް ބަލާއިރު، އާންމު ރައްޔިތު މީހާ ވަނީ ސަލާންޖަހަންޖެހިފައި ކަމަށް ސައުދުﷲ ވިދާޅުވި އެވެ.

"އިޤްތިސާދަށް ވާންޖެހޭނީ، ރައްޔިތު މީހާގެ ޖީބު ތަނަވަސްވާންޖެހޭނެ. ރައްޔިތު މިހާގެ ފުދުންތެރިކަން އިތުރުވާންޖެހޭނެ. އެއީ އަޅުގަނޑުމެން މިކިޔާ އިޤްތިސާދަކީ،" ސައުދުﷲ ވިދާޅުވި އެވެ.

ރައްޔިތުންގެ މަޖިލީހުގެ މެމްބަރުންނަކީ، ރައްޔިތުން "ލޫޓުވާ" ބައެއްކަން ފާހަގަ ކުރައްވައި ސައުދުﷲ ވިދާޅުވީ ސްޓިކާގެ ގޮތުގައި ދައުލަތަށް 150 މިލިއަން ރުފިޔާ ނެގުމަށް ރައްޔިތުންގެ މަޖިލީހުގެ މެމްބަރުން ފާސްކޮށްފައިވާ ކަމަށެވެ. މިފަދަ ކަންކަމަކީ ލޫޓުވުން ކަމަށް އޭނާ ވިދާޅުވި އެވެ. ރައީސް އަބްދުﷲ ޔާމީން ބޮޑެތި އިންސްވެޓްމެންޓްތައް ގެންނެވިކަމަށް ވިދާޅުވާއިރު، އެ އިންވެސްޓްމެންޓެއް ފެންނަން ނެތް ކަމަށާއި، އޭގެ ބަދަލުގައި ކުދި އަދި މެދުފަންތީގެ ވިޔަފާރިތައް ހަލާކުކުރަމުން އަންނަ ކަމަށް ސައުދުﷲ ވިދާޅުވި އެވެ.

"ރައްޔިތުންގެ މަންދޫބުންގެ ގޮތުގައި ތިއްބެވި ބޭފުޅުން މި ހުރިހާ ކަމެއް މި ކުރަނީ، މިގައުމުގައި މިހާރު މި ހިންގާ ހުރިހާ ކަމަކަށް މަޖިލީހުގައި ތިއްބެވި މެންބަރުން 100 ޕަސެންޓް ޒިންމާވާން ޖެހޭ، މަޖިލީހަކީ ޒިންމާދާރު ބައެއް ނަމަ، ވެރިމީހާ ބޭނުން ގޮތަކަށް ގާނޫނު އަސާސީ ބަދަލެއް ނުކުރެވޭނެ، އެބޭފުޅުންގެ ޒިންމާއަކަށް ވެގެން ނުވާނެ ދައުލަތުން ހުށައަޅާ ކޮންމެ ބިލަކަށް ވޯޓް ދޭން، މަޖިލީހަށް މެންބަރުން ޒިންމާދާރު ނަމަ މިއަދު މިގައުމުގައި ބިންވެސް ނުވިއްކޭނެ، ކޮރަަޕްޝަނަކަށް ޖާގައެއް ނޯންނާނެ، ޖުޑީޝަރީ މި ދަރަޖައަށް ނުދިޔައީސް, ނުބައިކޮށް ހުކުމެއް ވެސް ނުކުރެވޭނެ،" ސައުދުﷲ ވިދާޅުވި އެވެ.