!ޕީޕީއެމް ގެ ޓީމުތައް ޕާޓީގެ މެމްބަރުން އިތުރު ކުރުމަށް މާލޭގެ އެކި ސަރަހައްދުތަކުގައި ހަރަކާތްތެރިވަނީ
މިއީ 150،000 މެންބަރުން އިތުރު ކުރުމަށް ފަށައިގެން އުޅޭ ހަރަކާތެއް
ޕީޕީއެމް މެމްބަރުން އިތުރުކުރުން
ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމްގެ މެންބަރުން އިތުރު ކުރުމަށް ޚާއްސަ ހަރަކާތްތަކެއް ހޮނިހިރު ދުވަހު އެޕާޓީން ފަށައިފި އެވެ.
ރައީސް ޔާމީންގެ އަނބިކަނބަލުން ފާތިމަތު އިބްރާހިމް އިސްނެންގެވުމުގެ ދަށުން ޕާޓީ މެންބަރުން އިތުރު ކުރުމަށް ފަށާފައިވާ ޚާއްސަ ކެމްޕެއިންގެ ދަށުން، ހޮނިހިރު ދުވަހު ވަނީ މާލޭގެ އެކި ސަރަހައްދުތަކުގައި މެމްބަރުން އިތުރު ކުރުމަށް ހަރަކާތްތެރިވަމުންނެވެ.
އެގޮތުން މާލޭގެ ބައެއް ސްކޫލުތައް ކަމަށްވާ ޖަމާލުއްދީން ސްކޫލާއި ތާޖުއްދީން ސްކޫލުގައިވެސް ވަނީ ޕީޕީއެމް މެންބަރުން އިތުރު ކުރުމަށްޓަކާއި ހަރަކާތްތެއް ކުރިއަށްގެންދަމުންނެވެ.
މީގެ އިތުރުން މަގުތަކުގަ އާއި މާލޭގެ އެކި ހިސާބުތަކުގެ ގެތަކަށް ގޮސް މެންބަރުން އިތުރު ކުރުމުގެ ހަރަކާތްތައް ވަނީ ކުރިއަށްގެންގޮސްފަ އެވެ.
މި ހަރަކާތަކީ ސަރުކާރު ހިންގާ މައި ޕާޓީ، ޕީޕީއެމް އަށް 150،000 މެމްބަރުން ހަމަކުރުން އަމާޒަކަށް ކަނޑައަޅައި، މެމްބަރުން ހޯދުމަށް ކުރިއަށްގެންދާ ހަރަކާތެކެވެ.
ރައީސް އަބްދުﷲ ޔާމީންގެ ފެކްޝަންގެ ޕީޕީއެމްގެ އޮފީސް، ހުޅުވުމަށް ބުރާސްފަތި ދުވަހުގެ ރޭ ބޭއްވި ޖަލްސާގައި އެ ފެކްޝަންގެ ސެކްރެޓަރީ ޖެނެރަލް، ނިލަންދޫ ދާއިރާގެ މެމްބަރު ޑރ. އަބްދުﷲ ހަލީލް ވިދާޅުވީ، ރިޔާސީ އިންތިހާބަށް އެ ޕާޓީން ކުރިމަތިލާނީ 150،000 މެމްބަރުންނާއެކު ކަމަށެވެ.
އެރޭގެ ޖަލްސާގައި ޕީޕީއެމްގެ އިތުރު މެންބަރުންވެސް ވަނީ އެޕާޓީއަށް މެންބަރުން އުތުރު ކުރުމަށްޓަކާ ރައީސް ޔާމީންގެ އަނބިކަނބަލުން ފާތިމަތު އިބްރާހިމް ކުރައްވަމުންގެންދާ މަސައްކަތް ފާހަގަކުރައްވާފަ އެވެ.
މި ކެމްޕޭނުގެ ފުރަތަމަ ހަރަކާތެއްގެ ގޮތުގައި، ރައީސް އަބްދުﷲ ޔާމީންގެ އަނބިކަނބަލުންގެ އޮފީހުން އިންތިޒާމުކޮށްގެން، ހޮނިހިރު ދުވަހު 10،000 މެމްބަރުން އިތުރުކުރުމުގެ މަސައްކަތް ވަނީ ފަށައިފަ އެވެ.
އެންމެ ގިނަ ފޯމް ހޯދާ ފަރާތަކަށް ބެންކޮކް ދެކޮޅު ޓިކެޓާއި ތިން ދުވަހުގެ ހުރުން ދޭއިރު، ދެ ވަނަ އަދި ތިން ވަނަ އަށް ވެސް ބެންކޮކް ދަތުރެއް ދެއެވެ. މީގެ އިތުރުން 300 ފޯމް ހަމަކުރާ ކޮންމެ މީހަކަށް 7،500 ރުފިޔާ ހުށަހަޅާފައިވާ ކަމަށް މިކެމްޕޭނުގައި ހަރަކާތްތެރިވާ ޕީޕީއެމްގެ މެމްބަރަކު ވަނީ ބުނެފަ އެވެ.
މި ކެމްޕޭނަށްޓަކައި މިނިސްޓަރުން ވެސް ވަނީ ދެ ގްރޫޕަކަށް ބަހާލައިފަ އެވެ. މިނިސްޓަރުންގެ އިތުރުން ކުންފުނިތަކުގެ ވެރިންނާއި ލީޑަރުންގެ ގޮތުގައި އެހެން ބައެއް މުވައްޒަފުން އެ ގްރޫޕްތަކުގައި ހަރަކާތްތެރިވެ އެވެ.
ޕީޕީއެމްގެ މެންބަރުން އިތުރު ކުރުމުގެ ހަރަކާތްތައް ފަށާފައިވާ އިރު ޕީޕީއެމް ވަނީ ދެ ފެކްޝަނަކަށް ބެހިފަ އެވެ. އެގޮތުން ރައީސް ޔާމީން ޕެކްޝަނާއި ކުރީގެ ރައީސް މައުމޫން ފެކްޝަނެއް ޕާޓީގެ ތެރޭގައި އުފެދިފައިވާ އިރު މައުމޫން ފެކްޝަނުން ދަނީ ފާޅުގައި ސަރުކާރުން ނިންމާ ނިންމުންތަކަށް ފާޑުވިދާޅުވަމުންނެވެ.
