ޕީޕީއެމްގެ އާންމު މެމްބަރުންނާއި ރައީސް މައުމޫނު ބައްދަލުކުރައްވައިފި

ޕީޕީއެމްގެ އާންމު މެމްބަރުންނާއި ބައްދަލުކުރުން މަނާކޮށްފައިވަނިކޮށް، ޕީޕީއެމްގެ ރައީސް މައުމޫނު އަބްދުއް ޤައްޔޫމް އެ ޕާޓީގެ އާންމު މެމްބަރުންނާއި ބައްދަލުކުރައްވައިފި އެވެ.

ރައީސް މައުމޫނު ޕީޕީއެމްގެ އާންމު މެމްބަރުންނާއި ބައްދަލުކުރައްވާފައިވަނީ ހޯމަ ދުވަހުގެ ރޭ ގައެވެ. އެ ބައްދަލުވުމުގައި ޕާޓީގެ އާންމު މެމްބަރުން ބައިވެރިވެފައިވެއެވެ. ރައީސް މައުމޫނު އެ ބައްދަލުވުން ކުރިއަށްގެންގޮސްފައިވަނީ، ޕީޕީއެމްގެ ރައީސްގެ އޮފީސްކަމަށްވާ، ހ. ތެމާގަ އެވެ.

އެ ބައްދަލުވުން ކުރިއަށްގެންގޮސްފައިވަނީ، މީޑިއާއަށްވެސް ދައުވަތު ނުދެއްވައެވެ. ރައީސް މައުމޫނުގެ ފެކްޝަނަށް ނިސްބަތްވެވަޑައިގަންނަވާ ޕީޕީއެމްގެ އިސް އޮފިޝަލަކު ރާއްޖެޓީވީއަށް މައުލޫމަތު ދެއްވަމުން ބުނީ، މީޑިއާއަށް ދައުވަތު ނުދެއްވާ ބައްދަލުވުން ކުރިއަށް ގެންގޮސްފައިވަނީ ފުލުހުން ހުރަސްއަޅާތީ ކަމަށެވެ.

އޮފިޝަލް ވިދާޅުވީ ބައްދަލުވުމުގައި ޕާޓީގެ ހަރަކާތްތައް ކުރިއަށްގެންދާނެ ގޮތާ ގުޅޭގޮތުން މަޝްވަރާކުރެވުނެވެ. އަދި ލޯކަލް ކައުންސިލް އިންތިހާބާ ގުޅޭ ގޮތުންވެސް ގިނަ މަޝްވަރާތަކެއް ކުރެވުނު ކަމަށާއި، ރާއްޖޭގެ ސިޔާސީ މައިދާނުގައި ޕާޓީގެ ހަރާކާތްތައް އިތުރުކުރާނެ ގޮތްތަކާއި ގުޅޭގޮތުންވެސް މަޝްވަރާކުރެއްވި ކަމަށް އޭނާ ވިދާޅުވި އެވެ. އަދި މިފަދަ ސިލްސިލާ ބައްދަލުވުންތައް ބާއްވަމުންގެންދާނެ ކަމަށް އޮފިޝަލް ވިދާޅުވި އެވެ.

ހޯމަ ދުވަހުގެ ރޭ ބޭއްވި ބައްދަލުވުމުގައި ރައީސް މައުމޫނުގެ ދަރިކަނބަލުންކަމަށްވާ، ޔުމްނާ މައުމުނާއި، ދަރިކަލުން އަހުމަދު ފަރިޝް މައުމޫނު ބައިވެރިވެވަޑައިގެންފައިވެއެވެ. ނަމަވެސް މިހާރު ހެލްތު މިނިސްޓްރީގެ ސްޓޭޓް މިނިސްޓަރަކަށް ހުންނެވި ދުންޔާ މައުމޫނައި، ރައީސް އޮފީހުގެ ސްޓޭޓް މިނިސްޓަރަކަށް ހުންނެވި ޣައްސާން މައުމޫނު ބައިވެރިވެވަޑައިގެންފައެއް ނުވެއެވެ. އެ ދެ ބޭފުޅުންނަކީ ރައީސް އަބްދުﷲ ޔާމީންގެ ފެކްޝަނަށް ތާއީދުކުރައްވާ ދެ ބޭފުޅުންނެވެ.

މީގެކުރިން ރައީސް މައުމޫނު ޕީޕީއއެމްގެ މެމްބަރުންނާއި ބައްދަލުކުރުމަށް މަސައްކަތްކުރެއްވުމުން އެކަމަށް ފުލުހުން ވަނީ ހުރަސްއަޅާފަ އެވެ. އަދި ފުލުހުން ވަނީ އެ ބައްދަލުވުން ނުބޭއްވޭނެ ކަން އަންގާފަ އެވެ. "ޕީޕީއެމްގެ ދިރުން، މެމްބަރުންގެ ހިޔާލު"ގެ ނަމުގައި ރައީސް މައުމޫން ބާއްވަން އުޅުއްވި ހަފުލާ ނުބޭއްވޭނެކަން އޭރު ފުލުހުން އެންގީ މައުމޫން ފައުންޑޭޝަންގެ އޮފީސް ހިންގާ ހ. ފުލިދޫގެ އަށް ފުލުހުންގެ ޓީމެއް ގޮސްގެންނެވެ. އެ މައްސަލަ ރައީސް މައުމޫނުގެ ފަރާތްޕުޅުން މިހާރު ވަނީ އެޗްއާރުސީއެމްއަށާއި، ނޭޝަނަލް އިންޓެގްރިޓީ ކޮމިޝަނަށް ހުށަހަޅާފަ އެވެ.