ވިސްނަންވީ ވާދަވެރި ލިވަޕޫލާމެދު ނޫންކަމަށާއި, އަދިވެސް ފުރުޞަތު އޮތީ ސިޓީއަށްކަމަށް މިޑްފީލްޑަރ ބާނާޑޯ ސިލްވާ ބުނެފިއެވެ. އިނގިރޭސި ޕްރިމިއަރ ލީގުގައި ރޭ ކްރިސްޓަލް ޕެލަސްއާއި ލަނޑެެއް ނުޖެހި އެއްވަރުވި މެޗަށްފަހު ބާނާޑޯ ބުނީ އަދި ކޮންޓްރޯލް ސިޓީ އަތުގައި އެބައޮތްކަމަށާއި, ހާސްވާން ނުޖެހޭކަމަށެވެ.
މެޗުން ސިޓީއަށް މޮޅުނުވެވުމުން, ލިވަޕޫލަށް އޮތީ ފަރަޤު ޕޮއިންޓަކަށް ކުޑަކުރުމުގެ ފުރުޞަތު ލިބިފައެވެ. އަދި ސިޓީގެ ދަނޑުގައި ލިވަޕޫލާ ވާދަކުރަންޖެހޭ މެޗުވެސް އޮތުމުން ލީގު ހޯދުމުގެ އަމިއްލަ ބާރު މިހާރު ލިވަޕޫލަށްވެސް އެބައޮތެވެ. އެކަމަކު މެންޗެސްޓަރ ސިޓީގެ މިޑްފީލްޑަރ ބާނާޑޯ ސިލްވާ ބުނީ އެފުރުޞަތު އަދިވެސް ބޮޑީ ސިޓީއަށް ކަމަށާއި, ސިޓީގެ ދަނޑުގައި ލިވަޕޫލާ ދެކޮޅަށް ކުޅޭ މެޗަކީ ފޯރިގަދަ މެޗަކަށްވާނެކަމަށެވެ.
"އަހަރެމެންނަށް ލަނޑެއް ނުޖެހުން. އަހަރެމެން ލަނޑު ޖަހަން ޖެހޭ." ކްރިސްޓަލް ޕެލަސްއާ އެއްވަރުވި މެޗަށްފަހު ބާނާޑޯ ސިލްވާ ބުނެފައިވެއެވެ.
ބާނާޑޯ ސިލްވާ ބުނީ ޕްރިމިއަރ ލީގުގައި ރަށުން ބޭރުގައި އެއްވެސް ޓީމަކާ ދެކޮޅަށް ކުޅުމަކީ ފަސޭހަކަމެއް ނޫންކަމަށެވެ. މެޗުން މޮޅުނުވުމުން ލިވަޕޫލްގެ މައްޗަށް 6 ޕޮއިންޓްގެ ލީޑް ނަގަން ލިބުނު ފުރުޞަތު ގެއްލުނީއެވެ. އަދި ލިވަޕޫލަށްވުރެ އިތުރަށް ސިޓީން މެޗެއް ކުޅެފައިވާތީ އެފަރަޤު ޕޮއިންޓަކަށް ކުޑަކުރުމުގެ ފުރުޞަތު ލިވަޕޫލަށް ފަހިވީއެވެ. އެކަމަކު ލީގުގައި ލިވަޕޫލަށް ކުރިއަށް އޮތީ އުނދަގޫ މެޗެކެވެ. އެއީ ފޯމްގައި އޮތް އާސެނަލްއާ ވާދަކުރަންޖެހޭ މެޗެވެ.
