ހަނގުރާމައާއި އެތެރޭގެ ހަމަނުޖެހުންތަކަށް އަހަރުތަކެއް ވެފައިވީނަމަވެސް، ލީބިޔާގެ ބެންގާޒީގައި އޮޅު ޖަނަވާރު ގެންގުޅޭ މީހުންނަށް ހިތްހަމަޖެހުމެއް ލިބި އުއްމީދެއް ގެނުވާފައިވަނީ އެ ސަހަރުގައި އަލަށް ހުޅުވި ޖަނަވާރުންގެ ހޮސްޕިޓަލް ނުވަތަ ވެޓެރިނަރީ ހޮސްޕިޓަލާއެކުގައެވެ. މިއާއެކު އެމީހުންނަށް އޮޅު ޖަނަވާރުތަކަށް ބޭނުންވާ ސިއްހީ ފަރުވާ ލިބިގެންދާނެއެވެ.

އަލް-ރަވާސީ އަކީ ލީބިޔާގެ އިރުމަތީގައި އަލަށް ހުޅުވުނުން ޖަނަވާރުންނާއި ބެހޭ ސިއްހީ ހިދުމަތްދޭ ހޮސްޕިޓަލު ކަމަށް ޑޮކްޓަރުންނާއި އޮޅު ޖަނަވާރު ގެންގުޅޭ ފަރާތްތަކުން ބުނެއެވެ. މީގެ ހަފްތާއެއްހާ ދުވަސް ކުރިން ހުޅުވި މި ހޮސްޕިޓަލަށް މިހާތަނަށް އައި އިރު، ބުޅާ، ކުއްތާ އަސް އަދި މިނިކާވަގަށް ވަނީ ފަރުވާދީފައެވެ.

ޖަނަވާރުން ގެންގުޅޭ ފަރާތްތަކުން ބުނެފައިވަނީ ބެންގާޒީގައި މި ހދުމަތް ލިބުމުން ހިތްހަމަޖެހުމެއް ލިބިއްޖެ ކަމަށެވެ. މީގެ ކުރިން ޖަނަވާރެއް ބަލިވެއްޖެ ނަމަ ފޮނުވަން ޖެހެނީ އެހެން ސަހަރުތަކުގެ ހޮސްޕިޓަލްތަކަށް ނުވަތަ ކުޑަ ކްލިނިކުތަކަށް ކަމަށާއި، އެކަމުގެ ސަބަބުން ބޮޑު ހަރަދެއް ދާ ކަމަށެވެ. އަދި އެ ތަންތަނުން އެންމެ އެކަށީގެންވާ ހިދުމަތެއް ނުލިބޭ ކަމަށެވެ.

ހޮސްޕިޓަލުން ހިދުމަތްދެނީ އަގުދައްކައިގެންނެވެ. ނަމަވެސް އޮޅު ޖަނަވާރު ނޫން އެހެންޖަނަވާރުތަކަށް ހޮސްޕިޓަލުން ހިލޭ ފަރުވާދެއެވެ.

އެތެރޭގެ ހަމަނުޖެހުންތަކާއި ހަނގުރާމައާއި ގުޅިގެން ބެންގާޒީގެ ސިއްހީ ދާއިރާއަށް ވަނީ ބޮޑެތި ލޮޅުންތަކެއް އައިސްފައެވެ. ހަނގުރާމައާއި ހަމަނުޖެހުންތަކުގައި ސިއްހީ ފަރުވާދޭ ތަންތަނަށް ބޮން އަޅާ އެތަންތަނަކީ ހަނގުރާމަވެރިން ފިލަން ބޭނުންކުރާ ތަންތަން ގޮތުގައި ބޭނުންކޮށްފައިވެއެވެ. މިކަމުގެ ސަބަބުން ބަލި މީހުންނަށް ފަރުވާ ދިނުމުގައި ގޮންޖެހުންތަކެއް ދިމާވެފައިވާ އިރު، ފަރުވާ ހޯދުމަށް ހަރަދު ކުރުން ވެސް ވަނީ ތަކުލީފަކަށް ވެފައެވެ.

މީގެ އިތުރުން ކޮވިޑް ފެތުރެން ފެށުމާއެކު، ބެންގާޒީގެ ސިއްހީ ދާއިރާގައި މަސައްކަތް ކުރާ ފަރާތްތަކަށް އިތުރު ފިއްތުންތަކާއި ކުރިމަތިލާން ޖެހިފައިވާ އިރު، އައިސީޔޫ އެނދާއި ވެންޓިލޭޓަރުގެ ދަތިކަން ވެސް އިންތިހާއަށް ވަނީ ކުރިމަތިވެފައެވެ.

ބެންގާޒީގެ އާންމު މީހަކަށް އޭނާގެ ސިއްހީ ފަރުވާ ހޯދުމަށް ނުކުޅެދިފައި ވީނަމަވެސް، ޖަނަވާރު ގެންގުޅޭ ފަރާތްތަކަށް މިހާރު ވަނީ އެމީހުންގެ ޖަނަވާރުންތަކަށް ރަނގަޅު ހިދުމަތެއް ދޭނެ ބަޔަކު ތިބިކަން ކަށަވަރުވެފައެވެ.