ބައިނަލްއަގުވާމީ އަންހެނުންގެ ދުވަސް ފާހަގަކުރުމުގެ ގޮތުން, ބްރިޖިންގ ދަ ކޮމިއުނިޓީސް މޯލްޑިވްސް (ބީސީއެމް)ގެ ފަރާތުން "ކޮންފަރެންސް އޮން ވިމެން އެމްޕަވަރމަންޓް" ބާއްވައިފިއެވެ.

އަންގާރަ ދުވަހުގެ ރޭ މެންހެޓަން ބިޒްނަސް ހޮޓެލްގައި ބޭއްވި ހަފްލާގައި ގިނަ އަދަދެއްގެ އަންހެނުން ބައިވެރިވިއެވެ. މި ހަރަކާތަކީ މެންހެޓަން ބިޒްނަސް ހޮޓެލާއި މެންހެޓަން ފިޝް މާކެޓްގެ އެހީތެރިކަމާއެކު ހިންގުނު ހަރަކާތެކެވެ.

ބީސީއެމުން ބުނީ މި ހަރަކާތުގެ މަގުސަދަކީ އަންހެނުން ބާރުވެރިކުރުވައި އަންހެނުންނަށް އެންމެ ބޮޑެތި ގޮންޖެހުންތައް ހުރި ދާއިރާތައް ދެނެގަނެ، އެ ދާއިރާތަކުގެ ފަންނީ ފަރާތްތަކުގެ ތަޖުރިބާއާއި އިރުޝާދު ބައިވެރިންނަށް ފޯރުކޮށްދިނުން ކަމަށެވެ. އެ ގޮތުން މަޝްވަރާކުރެވުނު މައުޟޫއުތަކުގެ ތެރޭގައި ވިމެން އިން މީޑިއާ، ވިމެން އެންޑް ދަ އިކޮނޮމީ، ވިމެންސް ހެލްތު އަދި ވިމެން އެންޑް އެންވަޔަރަމަންޓް ހިމެނެއެވެ.

ޕެނަލިސްޓުގެ ގޮތުގައި މި މައުޟޫއުތަކަށް ވާހަކަ ދެއްކެވީ އެޑިއުކޭޓަރ އެންޑް ޓީވީ ޕްރެޒެންޓަރ އައިމިނަތު ނަމްޒާ، މެޑިފްލެކްސްގެ ޑައިރެކްޓަރ އޮޕަރޭޝަންސް އެންޑް މާކެޓިންގ އައިމިނަތު ޝާޔަން ޝާހިދު، މިޕްސްޓަރގެ ކޮންސަލްޓަންޓް ކްލިނިކަލް ސައިކޮލޮޖިސްޓް ޑރ. އާއިޝަތު އަލީ ނާޒް, އަދި ޕެޑީ ކޯސް ޑިރެކްޓަރ ޒޫނާ ނަސީމެވެ.

އަންހެނުންގެ ހައްގުތައް ހޯދައިދިނުމަށާއި އަންހެނުން ބާރުވެރިކުރުވުމުގެ މަގުސަދުގައި 14 ޖަނަވަރީ 2022ގައި އިފުތިތާހުކުރެވުނު ބީސީއެމްގެ ފަރާތުން އަންނަނީ ފުޅާ ދާއިރާއެއްގައި ހަރަކާތްތައް ހިންގައި، އަންހެނުންނަށް ގިނަ ފުރުސަތުތައް ފަހިކޮށްދެމުންނެވެ.