މިސަރުކާރުން ދަނީ ބައިނަލްއަގްވާމީ ފެންވަރުގައި ތިމާވެށީގެ ކަންކަމުގައި އަންހެނުންގެ ދައުރު އިތުރުކުރުމަށްޓަކައި ކުރެވޭ މަޝްވަރާތަކުގައި ބައިވެރިވަމުން
ޖެންޑަރ މިނިސްޓަރ ޢާއިޝަތު މުޙައްމަދުދީދީ
ތިމާވެށީގެ ކަންކަމުގައި އަންހެނުންގެ ދައުރު މިހާރަށްވުރެ ފުޅާކުރުމަށް މަސައްކަތްތަކެއް ކުރަމުންދާކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދުދީދީ ވިދާޅުވެއްޖެއެވެ.
ހޯމަ ދުވަހުގެ ޖަލްސާގައި ޖެންޑާރ މިނިސްޓަރ ވަނީ ބައިނަލްއަގްވާމީ އަންހެނުންގެ ދުވަހާ ގުޅިގެން ވާހަކަދައްކަވާފައެވެ. އެގޮތުން ވާހަކަދައްކަވަމުން މިނިސްޓަރ ވިދާޅުވީ ދުނިޔޭގެ މަސްރަހަށް ބަލާއިރު ތިމާވެށީގެ ކަންކަމުގައި އަންހެނުންގެ ދައުރު އިތުރުކުރުމަށް މަސައްކަތްތަކެއް ކުރަމުންދާކަމަށެވެ. މިކަމަކީ ރާއްޖެ ފަދަ ކުދި އަދި ޖަޒީރާ ގައުމުތަކުން ޚާއްސަ ސަމާލުކަމެއް ދިނުން މުހިންމު ކަމެއްކަމަށް މިނިސްޓަރ ވިދާޅުވިއެވެ.
އެއީ އަންހެނުންނާއި އަންހެން ކުދިންނަށް ތިމާވެށީގެ ސަބަބުން ކުރިމަތިވާ ކަންތައްތައް ތަފާތުވެފައި އެ މީހުންގެ ތަޖުރިބާ ތިމާވެށި ހިމާޔަތްކުރުމުގެ މަސައްކަތްކުރާއިރު ބޭނުން ހިފުމުން ތިމާވެށި ހިމާޔަތްކުރުމުގަޔާއި ތިމާވެއްޓަށް އަންނަ ބަދަލުތަކާއި ގުޅިގެން ކުރާ މަސައްކަތުގައި ހެޔޮ ބަދަލުތަކެއް ފެނިގެންދާނެކަން ދިރާސާތަކުން ދައްކާތީކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިކަމުގެ މުހިންމުކަން އެނގި މިސަރުކާރުން ދަނީ ބައިނަލްއަގްވާމީ ފެންވަރުގައި ތިމާވެށީގެ ކަންކަމުގައި އަންހެނުންގެ ދައުރު އިތުރުކުރުމަށްޓަކައި ކުރެވޭ މަޝްވަރާތަކުގައި ބައިވެރިވެ، ތަޖުރިބާތައް ހިއްސާކޮށް އެފަދަ މަޝްވަރާތަކުގެ އަލީގައި ރާއްޖޭގައި ކުރެވޭނެ ކަންކަން ދިރާސާކުރަމުން ކަމަށެވެ. އެގޮތުން މިހިނގާ މަރޗް މަހުގެ 16 ވަނަ ދުވަހު އޮންލައިންކޮށް ބާއްވާ "ކޮމިޝަން އޮން ދަ ސްޓޭޓްސް އޮފް ވިމެން"ގެ 65 ވަނަ ސެޝަންގައި ހައި ލެވެލް ސައިޑް އިވެންޓު މޭކިންގ ކުލައިމެޓް ފައިނޭންސް ވޯރކް ފޯ ވިމެން އެންޑް ގާލްސް، އިނގިރޭސިވިލާތާއި ރާއްޖެ ގުޅިގެން ކޯހޯސްޓްކުރާ ގޮތަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ.
މި ސައިޑް އިވެންޓްގައި ތިމާވެށި ހިމާޔަތްކުރުމަށް ކުރެވޭ މަސައްކަތުގައި މިންތީގެ ހަމަހަމަކަން ގާއިމުކުރުމުގައި މާލީ އެހީތެރިކަން ފޯރުކޮށްދީ ޖަމިއްޔާތައް ބާރުވެރިކުރުވުމަށްޓަކައި ކުރެވޭ މަސައްކަތްތަކާއި އެޅޭނެ ފިޔަވަޅުތަކާމެދު މަޝްވަރާކުރެވިގެންދާނެކަމަށް މިނިސްޓަރ ވިދާޅުވިއެވެ.
