ހޭވައްލާ ގެ ނަމުގައި މީރާއިން މުޅި މާލެ ސާފުކުރުމުގެ ހަރަކާތެއް ބާއްވައިފި
2،500 ކުނި ކޮތަޅު މާލޭގެ އެކި ސަރަހައްދުތަކުން ނަގާފައިވޭ
ހޭވައްލާ ސާފު ކުރުމުގެ ޕްރޮގްރާމުގެ ތެރެއިން
މޯލްޑިވްސް އިންލެންޑް ރެވެނިއު އޮތޯރިޓީ މީރާއިން އިސްނަގައިގެން މާލެ ސާފު ކުރުމުގެ ހަރަކާތެއް ހޮނިހިރު ދުވަހު ކުރިއަށް ގެންގޮސްފި އެވެ.
ހޮނިހިރު ދުވަހު ހެނދުނު ހަތަކުން ބާރައަށް ކުރިއަށްގެންދިޔަ މި ހަރަކާތަކީ މީރާ އާއި ވޭސްޓް މެނޭޖްމެންޓް ކޯޕަރޭޝަން ވެމްކޯއާ ގުޅިގެން ކުރިއަށްގެންދިޔަ ހަރަކާތެކެވެ.
މިކަމާ ގުޅޭ ގޮތުން މީރާގެ ޑެޕިއުޓީ ޑިރެކްޓަރ ފާތިމަތު ރަޝާ ވިދާޅުވީ، މީރާއިން ހޭވައްލާގެ ނަމުގައި ކުރިއަށްގެންދިޔަ މި ހަރަކާތުގާ މިނިވަން މުއައްސަސާތަކާއި ސްކޫލުތަކުންނާއި ސަރުކާރުގެ އެކި އިދާރާތައް އެކުވެގެން ގާތްގަނޑަކަށް 43 ފަރާތަކުން ގިނަ އަދަދެއްގެ މީހުން ބައިވެރިވެފައިވާ ކަމަށެވެ.
އެގޮތުން 2،500 ކުނި ކޮތަޅު މާލޭގެ އެކި ސަރަހައްދުތަކުން ނަގާފައި ވާނެ ކަމަށް ރަޝާ ވިދާޅުވި އެވެ.
މި ހަރަކާތުގައި މާލޭގެ ހުރިހާ ސަރަހައްދެއް އެއްކޮށް ސާފުކޮށްފައިވާ އިރު ޓެރެކް ސަރަހައްދާ މަސްމާރުކޭޓު ސަރަހައްދުގެ މޫދު ސާފުކޮށްފައިވަނީ އެމްއެންޑީއެފްގެ އެހީތެރިކަމާ އެކު ކަމަށް އޭނާ ވިދާޅުވިއެވެ.
މާލޭގައި ހިންގި ސާފުކުރުމުގެ ހަރަކާތުގައި ފުލުހުންގެ އެހީތެރިކަން ވެސް ލިބިފައިވާ ކަމަށް މީރާ އިން ބުނެއެވެ.
