ނިއުރޭޑިއެންޓްގެ ޗެއާމަން ކާނަލް ރިޓަޔާޑް މުހައްމަދު ޒިޔާދު އާއި ތައިލޭންޑުގެ ކުންފުންޏެއް ގުޅިގެން މާލެ އަތޮޅު އެނބުދޫ ފަޅުގައި 10 ރިސޯޓު ތަރައްގީ ކުރުމުގެ މަސައްކަތް ފަށައިފި އެވެ.

ރިސޯޓްތައް ތަރައްގީކުރުމަށް އެނބޫދޫ ފަޅު ހިއްކުމުގެ މަސައްކަތް ކުރަނީ ބެލްޖިއަމްގެ ޑްރެޖިން، އެންވަޔަރަމެންޓަލް އެންޑް މެރިން އިންޖިނިއަރިން (ޑީއީއެމްއީ) ކުންފުނިންނެވެ.

ސަރުކާރުން 50 އަހަރުގެ މުއްދަތަކަށް އެނބޫދޫ ފަޅު ވިއްކާލާފައި ވަނީ ތައިލޭންޑުގެ ސިންހާ އެސްޓޭޓް ކުންފުންޏަށެވެ. ފަޅު ތަރައްގީ ކުރުމުގެ މަސައްކަތް ކުރަނީ ސިންހާ އެސްޓޭޓް އިން ރާއްޖޭގައި ހަދާފައިވާ ސަބްސިޑަރީ ކުންފުނި، ޑްރީމް އައިލެންޑްސް ކޮމްޕެނީންނެވެ.

ޑްރީމް އައިލެންޑް ކުންފުންޏަކީ ސިންހާ އެސްޓޭޓް އާއި ކާނަލް ޒިޔާދުގެ ހިއްސާ އޮންނަ ކުންފުންޏެކެވެ.

އެއާޕޯޓުގެ އާ ރަންވޭ އަދި އޭޕްރަންގެ މަޝްރޫއު ފެށުމުގެ ގޮތުން މިދިޔަ އަހަރުގެ އޭޕްރީލް ހަ ވަނަ ދުވަހު ބޭއްވި ރަސްމިއްޔާތުގައި ރައީސް އަބްދުﷲ ޔާމީން ވިދާޅުވެފައިވާ ގޮތުގައި އެނބޫދޫ ފަޅު ސިންހާ ކުންފުންޏަށް ވިއްކާލާފައި ވަނީ ގާތްގަނޑަކަށް 40 މިލިއަން ޑޮލަރު (616.8 މިލިއަން ރުފިޔާ) އަށެވެ.

ޓޫރިޒަމް މިނިސްޓްރީގެ ވެބްސައިޓުގައި ބުނެފައިވާ ގޮތުގައި ޑްރީމް އައިލެންޑްސް ކުންފުންޏަށް އެނބޫދޫ ފަޅު ދޫކޮށްފައި ވަނީ މިދިޔަ އަހަރުގެ ފެބްރުއަރީ 9 ވަނަ ދުވަހު އެވެ.

ޑީއީއެމްއީން މި ސަރަހައްދަށް ކަނޑައަޅާފައި ހުންނަވާ ބިޒްނަސް ޑިވެލޮޕްމެންޓް ހެޑް ބާޓް ރޫމްސްއާ ހަވާލާދީ ބޭރުގެ ބައެއް މީޑިއާތަކުގައި ބުނެފައިވަނީ އެނބޫދޫ ފަޅުގައި ތަރައްގީކުރާ 10 ރަށުގެ ތެރެއިން އެއް ރަށް މިހާރު ވަކިކޮށް ނިމިފައިވާ ކަމަށެވެ. އަދި މިހާރު ދެވަނަ ރަށުގެ މަސައްކަތް ކުރަމުންދާއިރު އޭޕްރީލް މަހުގެ މެދު ތެރެއާ ހަމައަށް 10 ރަށް ވަކިކޮށް ނިންމާލެވޭނެ ކަމަށް ރޫމްސް ވިދާޅުވެފައި ވެއެވެ.

ރޫމްސް ވިދާޅުވެފައިވާ ގޮތުގައި އެނބޫދޫ ފަޅުގައި 10 ރިސޯޓް ހެދުމަށް ދެ މިލިއަން ކިއުބިކް މީޓަރުގެ ވެލި ބޭނުންވާނެ އެވެ. އަދި ވެލި ނެގުމަށް ބޭނުންކުރަނީ ޓްރެއިލިން ސަކްޝަން ހޮޕާ ޑްރެޖަރެއް ކަމަށް ވެސް އޭނާ ވިދާޅުވެފައިވެ އެވެ. ރޫމްގެ ވިދާޅުވެފައިވާ ގޮތުގައި ދެ މިލިއަން ކިއުބިކް މީޓަރުގެ ވެލި ނެގުމަށް ގާތްގަނޑަކަށް ދެ މަހެއްހާ ދުވަސް ހޭދަވާއިރު ރަށްތައް ހިއްކުމުގެ މަސައްކަތް ޖޫން މަހު އެއްކޮށް ނިންމާލެވޭނެ ކަމަށެވެ.

ޑީއީއެމްއީ ކުންފުންޏަކީ ހުޅުމާލޭ 2 ވަނަ ފޭސް އަށް ބޭނުންވާ ބިން ހިއްކުމުގެ މަޝްރޫއު ވެސް ކުރިއަށް ގެންދިޔަ ކުންފުންޏެވެ. ހުޅުމާލޭ ދެވަނަ ފޭސް ހިއްކުމަށް ހަ މިލިއަން ކިއުބިކް މީޓަރުގެ ވެލި ނަގާފައިވެ އެވެ.

އެނބޫދޫ ފަޅު ހިއްކުމުގެ މަޝްރޫއުގެ އިތުރުން، އިންޑިއާގެ ކަރްނާޓަކާ ކަރްވާރް ސީބާދް ޕްރޮޖެކްޓުގެ މަސައްކަތާއި ކަރްވާރު ޕޯޓު ހިއްކުމުގެ މަސައްކަތް ވެސް އެ ކުންފުނިން ދަނީ ކުރަމުންނެވެ. އިންޑިއާގެ ލާސަން އެންޑް ޓޫބްރޯ ކުންފުންޏާއެކު ހަދާފައިވާ ޖޮއިންޓް ވެންޗާއެއްގެ ދަށުން ހިންގާ ސީބާޑް މަޝްރޫއާއި ޕޯޓް މަޝްރޫއުގެ އިތުރުން އެނބޫދޫ ފަޅު ހިއްކުމުގެ މަޝްރޫއިން ޑީއީއެމްއީ ކުންފުންޏަށް 107 މިލިއަން ޑޮލަރު ލިބޭނެ ކަމަށް އެ ކުންފުނިން ބުނެ އެވެ.