ފާޑު ކިއުމަކީ މައްސަލައެއް ނޫން ކަމަށާއި ފާޑުކީ ކަމުގައިވީ ނަމަވެސް އެމްޕީއެލް އިން އަމަލު ކުރާނީ އޮންނަ އުސޫލުތަކާ ގަަވައިދުތަކާ އެއްގޮތްވާގޮތުގެ މަތިން ކަމަށް ކުންފުނީގެ ސީއީއޯ މުހައްމަދު ޖުނައިދު ވިދާޅުވެއްޖެ އެވެ.
ސަރުކާރުގެ އުސޫލުތައް ތަންފީޒުކުރުމުގެ ގޮތުން ޚާއްސަ އެހީއަށް ބޭނުންވާ ފަރާތްތަކަށް އެމްޕީއެލް އިން ވަޒީފާގެ ފުރުސަތު ހުޅުވާލުމުން ވަޒީފާއަށް ވަނުމަށް އައްޑޫ ސިޓީ އިން މާލެ އަންނަ 20 ކުދިންނަށް މަރުހަބާ ދެއްނެވުމަށް ވެލާނާ އެއާޕޯޓުގައި ބޭއްވި ބައްދަލުވުމުގައި ވާހަކަ ދައްކަވަމުން ޖުނައިދު ވިދާޅުވީ، އެމްޕީއެލް އިން މިވީ ދުވަސްތަކުގައި 300 އަށް ވުރެ ގިނަ ވަޒީފާ އުފައްދާފައިވާ ކަމަށާއި ކުރިއަށް އޮތްތަނުގައި މަސައްކަތް ކުރައްވާނީވެސް ރައީސް ޔާމީންގެ ސިޔާސަތުތައް ތަންފީޒު ކުރުމައި ކަމަށެވެ.
ސްޕޯޓްސް ކޮމިޝަނަރު އަހްމަދު ނަޝީދު ދާދިފަހުން ސޯޝަލް މީޑިޔާގައި ޖުނެއިދުގެ އިސްތިއުފާއަށް ގޮވާލި ގޮވާލެއްވުމާ ގުޅޭ ގޮތުން އޭނާ ވިދާޅުވީ، ފާޑު ކިއުމަކީ މައްސަލައެއް ކަމަށް ގަބޫލު ނުކުރާ ކަމަށާއި ފާޑު ކިޔުންތަކުގެ ސަބަބުން އޭނާ އަށް ލިބޭނީ އިތުުރު ކުރިއެރުން ކަމަށެވެ. އަދި އެމްޕީއެލްގެ ތެެރެއިން ކަންކަން ކުރުމާއި އަބަދުވެސް އޮންނަ އުސޫލަށް ތަބާވާނެ ކަމަށް އޭނާ ވިދާޅުވި އެވެ.
ސަރުކާރުގެ ކުންފުނިތަކުން ޚާއްސަ އެއީއަށް ބޭނުންވާ ކުދިންނަށް ވަޒީފާ ދިނުމުގެ މަސައްކަތާއި ގުޅޭ ގޮތުން ޖުނައިދު ވިދާޅުވީ، މިއީ ރައީސުލްޖުމްހޫރިިއްޔާގެ އިސްނެންގެވުމުގެ ދަށުން ކުރައްވަމުން ގެންދަވާ ކަމެއް ކަމަށާާއި އެފަަދަ ކުދިންނަށް އެހީވެ އަޅާލުމަކީ ރައީސުލްޖުމްހޫރިއްޔާ ވަރަށް ބޮޑަށް ބޭނުންވާ ކަމެއް ކަމަށެވެ.
އައްޑު ސިޓީން މާލެ އައި 20 މީހުންނަށް އެމްޕީއެލް އިން ވަޒީފާ ދޭ އިރު އަދިވެސް އެމްޕީއެލްގެ އެހެން ސަރަހައްދު ތަކުންވެސް ޚާއްސަ އެހީ އަށް ބޭނުންވާ ކުދިންނަށް ވަޒީފާ ދެވިގެންދާނެ ކަމަށް އޭނާ ވިދާޅުވި އެވެ.
ޖުނެއިދު ވަނީ ޚާއްސަ އެހީ އަށް ބޭނުންވާ ފަރާތްތަކަށް އެމީހުން ދިރިއުޅޭ ތަނެއްގައި ތިބެެގެން ވަޒީފާ ލިބިގެން ދިއުމުން އެފަދަ ފަރާތްތަކުގެ ދިރިއުޅުމަށް ރަގަޅު ބަދަލުތަކެއް އައިސްގެންދާނެ ކަން ފާހަގަކުރައްވާފަ އެވެ.
އެޕްއީއެލް އިން ޚާއްސަ އެހީއަށް ބޭނުންވާ ކުދިންނަށް ވަޒީފާ ދިނުމުގެ މަސައްކަތް ފަށާފައިވާ އިރު ދާދިފަހުން ވަނީ ފެނަކަ ކޯޕަރޭޝަނުންވެސް ޚާއްސަ އެހީ އަށް ބޭނުންވާ 100 މީހުންނަށް ވަޒީފާގެ ފުރުސަތު ފަހިކޮށްދީފަ އެެވެ.
