އަންހެނުންގެ ބާރުވެރިކަން ކުޑަކުރުމަށް ގޮވާލާ ފަލްސަފާއެއްގެ އަޑުދަނީ ބާރުވަމުން: ރައީސް ނަޝީދު
އަންހެނުންގެ ބައިވެރިވުން މިހާރަށްވުރެ ބޮޑަށް އެކި ދާއިރާތަކުގައި އިތުރުކުރުމަށް މަޖިލީހުން މަސައްކަތްކުރައްވާނެ ކަމަށް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
އަންހެނުން ބާރުވެރިކުރުވުމާއި އަންހެނުންގެ ބައިވެރިވުން ކުޑަކުރުމަށް ގޮވާލާ ފަލްސަފާއެއްގެ އަޑު މިފަހަކުން އިވެމުންދާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މަރޗް މަހުގެ 8 ވަނަ ދުވަހަކީ ބައިނަލްއަގްވާމީ އަންހެނުންގެ ދުވަހުގެ ގޮތުގައި ފާހަގަކުރަމުން އަންނަ ދުވަހަށްވާއިރު އެދުވަހާ ގުޅުވައިގެން ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް، ރައީސް މުހައްމަދު ނަޝީދު ވަނީ އަންހެނުންގެ ބައިވެރިވުން މިހާރަށްވުރެ ބޮޑަށް އެކިދާއިރާތަކުގައި އިތުރުކުރުމަށް މަޖިލީހުން މަސައްކަތްކުރައްވާނެ ކަމަށް ވިދާޅުވެ އެކަމަށް ވައުދުވެވަޑައިގެންފައެވެ.
އެ މޭރުމުން ވާހަކަދައްކަވަމުން ރައީސް ނަޝީދު ވިދާޅުވީ މަޖިލީހާއި މަޖިލީހުގެ މެމްބަރުންގެ ނަމުގައި ވައުދުވާން ބޭނުންފުޅުވަނީ ރާއްޖޭގެ ސިޔާސީ ކަންކަމުގައި ޚާއްސަކޮށް އަންހެނުން ބައިވެރިވާ މިންވަރު އިތުރުކުރުމަށް އެންމެން މަސައްކަތްކުރުމަށް ކަމަށެވެ. ވަކިން ޚާއްސަކޮށް ސިޔާސީ ޕާޓީތަކުގެ ދައުރު މިކަމުގައި ފުޅާކުރަންޖެހޭ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މަޖިލީހުގައި އަންހެނުންގެ ދައުރު މިހާރަށްވުރެ ފުޅާކުރުމަށް ޕާޓީތަކުން ޓިކެޓް ދޭއިރު ފަސޭހައިން އަންހެނުންނަށް ޓިކެޓް ލިބޭނެ އިންތިޒާމެއް ހަމަޖެހިފައި އޮންނަ ނަމަ އަންހެނުން މަޖިލީހުގައި ހިމެނޭ މިންވަރު އިތުރުވާނެކަމަށެވެ.
ރައީސް ނަޝީދު ވިދާޅުވީ މާގިނައިން މިހާރު އިވޭ އަޑަކީ އަންހެނުންގެ ބާރުވެރިކަން ކުޑަކުރުމަށާއި އަންހެނުންގެ ބައިވެރިވުން ކުޑަކުރުމަށް އެހެން ފަލްސަފާއެއް ގޮވަމުންދާ އަޑުކަމަށެވެ.
ރައީސް ނަޝީދު ވިދާޅުވީ އަންހެނުންގެ ހައްގުތަކައިގެން ވީ އެންމެ ބޮޑަށް މަޖިލީހުގެ މެމްބަރުން ނިކުންނަވާނެކަމަށެވެ.
