ނިމިގެންދިޔަ 2020 ވަނަ އަހަރުގެ ކުރީކޮޅުން ފެށިގެން ފެނިފައިވާ ކޮވިޑް-19ގެ ސަބަބުން ދޭންޖެހުނު އެކި ކަހަލަ ޚިދުމަތްތައް ދިނުމުގަޔާއި ފްރޮންޓްލައިންގައި ސާބިތުކަމާއެކު އެންމެ ބޮޑަށް ހަރަކާތްތެރިވަމުންދަނީ އަންހެނުންކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދުދީދީ ވިދާޅުވެއްޖެއެވެ.

ހޯމަ ދުވަހުގެ ޖަލްސާގައި ޖެންޑާރ މިނިސްޓަރ ވަނީ ބައިނަލްއަގްވާމީ އަންހެނުންގެ ދުވަހާ ގުޅިގެން ވާހަކަދައްކަވާފައެވެ. އެގޮތުން ވާހަކަދައްކަވަމުން މިނިސްޓަރ ވިދާޅުވީ މިއަހަރުގެ އަންހެނުންގެ ދުވަސް ފާހަގަކުރަމުންދާއިރު މިއަހަރުގެ ޝިއާރާމެދު ވިސްނާލުން މުހިންމުކަމަށެވެ. މިއަހަރުގެ ޝިއާރަކީ " ވިމެން އިން ލީޑަރޝިޕް: އެޗީވިންގ އެން އީކުއަލް ފިއުޗަރ އިން ކޮވިޑް-19 ވޯރލްޑް" ނުވަތަ އިސް ސަފުގައި އަންހެނުން: ކޮވިޑް-19ގެ ދުނިޔޭގައި ހަމަހަމަ މުސްތަގްބަލެއް ހޯދުން މިއެވެ.

މިނިސްޓަރ ވިދާޅުވީ މިޝިއާރު ރާއްޖޭގައި މުހިންމުވާ ސަބަބަކީ ރާއްޖޭގައިވެސް އަންހެނުން ލީޑަރޝިޕަށް ނުވަތަ ބަސްބުނުމާ ހަމައަށް އައުމުގައި ހުރި ގޮންޖެހުންތަކަކީ ދުނިޔޭގެ އެހެން ގައުމުތަކުގައިވެސް ހުރި ގޮންޖެހުންތައްކަމަށް ވުން ކަމަށެވެ. އަދި އެގޮންޖެހުންތައް ބިނާވެފައިވަނީ އިގްތިޞާދީގޮތުންނާއި އިޖުތިމާއީގޮތުން އަންހެނުންނާއި ފިރިހެނުންގެ ދައުރާމެދު ޒަމާނުއްސުރެ މުޖުތަމަޢުގައި ހުރި ވިސްނުންތަކާއި މުޖުތަމަޢު ދެކޭގޮތުގެ ސަބަބުންކަމަށް މިނިސްޓަރ ވިދާޅުވިއެވެ.

އެހެންކަމުން ގައުމެއް ބިނާކުރުމުގައި އަންހެނުންގެ ހިއްސާ އިތުރުވެ ދެ ޖިންސުގެ ބައިވެރިވުން އެއް ހަމައެއްގައި ލިބުމުން ދިމިގްރާތީ ނިޒާމުގައި ހެޔޮވެރިކަމުގެ ސިފަ ޖެހި މުޖުތަމައުގެ ހަމަޖެހުން ގާއިމުވެގެންދާނެ ކަމަކީ ޝައްކެއްވެސް ނެތްކަމެއްކަމަށް މިނިސްޓަރ ވިދާޅުވިއެވެ. އަދި ކޮވިޑްގެ މިހާލަތުގައި ރާއްޖޭގައި ފްރޮންޓްލައިންގައި މަސައްކަތްކުރާ މީހުންގެ ތެރެއިން ގިނައީ އަންހެނުންކަން ފަހުރުވެރިކަމާއި އުފަލާއެކު ފާހަގަކުރައްވަން ބޭނުންފުޅުވާ ކަމަށް މިނިސްޓަރ ވިދާޅުވިއެވެ.

މީގެއިތުރުން މިނިސްޓަރ ވިދާޅުވީ ކޮވިޑްގެ ބަލިމަޑުކަމާއެކު އިޖުތިމާއީ އަސާސީ ޚިދުމަތް ފޯރުކޮށްދިނުމާއި ވޭސްޓް މެނޭޖްނަންޓް ކޯޕަރޭޝަން (ވެމްކޯ)ގެ ހީވާގި މުވައްޒަފުން ވަރުބަލިކަމެއްނެތި ދެމުންގެންދާ ޚިދުމަތް ފާހަގަކޮށްލަންޖެހޭ ކަމަށެވެ. އެމީހުންނަކީ އެންމެ ނާޒުކު ވަގުތުގައި ވެސް ފްރޮންޓްލައިންގައި މަސައްކަތްކުރި މީހުންކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ކޮވިޑާއެކު ލޮކްޑައުންގައި އެޅި ފިޔަވަޅުތަކުގެ ސަބަބުން ގޭތެރޭގައި ކުރެވޭ އިގްތިޞާދީ މަސައްކަތްތައް އިތުރުވެގެންދިޔަ ކަމަށެވެ. އެގޮތުން ގޭގައި ކުދިން ބެލުމާއި ކުދިންނަށް ކިޔަވައިދިނުމުގައި އިސްދައުރެއް އަދާކުރަމުން ދިޔައިރު ގޭތެރޭގެ ކަންކަމުގައި ފިރިހެނުންގެ ހަރަކާތްތެރިވުން އެދުވަސްވަރު އިތުރުވެފައިވާކަން ފާހަގަކުރެވިފައިވާކަމަށް މިނިސްޓަރ ވިދާޅުވިއެވެ.

މީގެއިތުރުން ކޮވިޑާއެކު ނޭދެވޭ އަސަރެއްކުރި އެއް ބަޔަކީ ކުދި ވިޔަފާރިތައް ކަމަށާއި އެހެންނަމަވެސް އަންހެނުންގެ ފަރާތުން ފެނިގެންދިޔަ އިނޮވޭޓިވް ގޮތްތަކާއެކު ކުދި ވިޔަފާރިތައް ހުއްޓުމަކަށް ނުގެނެސް ކުރިޔަށްދިޔަކަން ފާހަގަކޮށްލެވޭކަމަށް މިނިސްޓަރ ވިދާޅުވިއެވެ.