ރަޝިޔާ-ޔޫކްރެއިން ހަނގުރާމައިގެ ސަބަބުން ޝިޕިންގއަށް ބަދަލެއް ނާދޭ: ސެންކޯ ޝަރީފު
3 މާރިޗު 2022 | ބުރާސްފަތި 01:48މި ހަނގުރާމަ ފެށިގެން ގާތްގަނޑަކަށް ހަފްތާއެއްވެފައި ވާއިރު، މީގެ ސަބަބުން ރާއްޖޭގެ ޝިޕިންގއަށް މިހާތަނަށް އެއްވެސް އަސަރެއް ކޮށްފައި ނުވޭ
ކެޕްޓަން މުހައްމަދު ޝަރީފް | ރާއްޖެއެމްވީ
ރަޝިޔާ އާއި ޔޫކްރެއިންއާއި ދެމެދު ކުރަމުންދާ ހަނގުރާމައިގެ ސަބަބުން ރާއްޖެއަށް ދަތުރުކުރާ ބޯޓުތަކަށް ބަދަލެއް ނާންނަކަމަށް އެމްޕީއެލްގެ ޗެއާރމަން މުހައްމަދު ޝަރީފު (ސެންކޯ ޝަރީފު) ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝަރީފު ވިދާޅުވީ ރަޝިޔާ އާއި ޔޫކްރެއިންއާއި ދެމެދު ކުރަމުންދާ ހަނގުރާމައިގެ ސަބަބުން ޝިޕިންގއަށް މާބޮޑު އަސަރެއް ކުރާނެކަމަށް ލަފާ ނުުރެއްވޭ ކަމަށެވެ. ސަބަބަކީ ޤައުމުތަކަށް ދަތުރުކުރާ ބޯޓުތައް ސީދާ އެޤައުމަށް ނުގޮސް އެހެން ޤައުމުތަކުންލާފައި ދަތުރުކުރާތީ ކަމުގައި ޝަރީފު ވިދާޅުވިއެވެ.
ޝަރީފު ވިދާޅުވީ މި ހަނގުރާމައިގެ ސަބަބުން ރާއްޖޭގެ ޝިޕިންގ ކުންފުނިތަކަށް ކުޑަ އަސަރެއް ކޮށްފާނެ ކަމަށެވެ. ނަމަވެސް މީގެ ސަބަބުން ބޮޑު ބަދަލެއް ނުވަތަ ދަތިތަކަކާއި ކުރިމަތިލާން ޖެހިދާނެކަމަށް ގަބޫލު ނުކުރައްވާކަމަށް ޝަރީފު ވިދާޅުވިއެވެ. އެގޮތުން ދުނިޔެއަށް މުދާ ގެންދާ ބޮޑެތި ކުންފުނިތަކުން މިހާލަތަށް ވިސްނާ ޑައިވާޝަންތަކެއް ގެންގުޅޭނެކަމަށް ވިދާޅުވިއެވެ. އަދި ރަޝިޔާ އާއި ޔޫކްރެއިންއަށް ގެންދާ މުދާތައް ކައިރި އެހެން ޤައުމަކަށް ބޭލުމަށް ހަމަޖެހިފައިވާނެތީ މީގެ ސަބަބުން މުޅި ދުނިޔޭގެ ޝިޕިންގއަށް ބޮޑު އަސަރެއް ނުކުރާނެކަމަށްވެސް ޝަރީފު ވިދާޅުވިއެވެ.
މި ހަނގުރާމަ ފެށިގެން ގާތްގަނޑަކަށް ހަފްތާއެއްވެފައި ވާއިރު، މީގެ ސަބަބުން ރާއްޖޭގެ ޝިޕިންގއަށް މިހާތަނަށް އެއްވެސް އަސަރެއް ކޮށްފައި ނުވާކަމަށްވެސް ޝަރީފު ވިދާޅުވިއެވެ.
ރަޝިޔާއިން ޔޫކްރެއިންއަށް ހަމަލާދޭން ފެށުމާއެކު ޔޫކްރެއިންގައި ތިބި ރާއްޖޭގެ ރައްޔިތުން ހަންގޭރީއަށް ބަދަލުކުރުމުގެ މަސައްކަތްވެސް ސަރުކާރުން ވަނީ ކޮށްފައެވެ. އެގޮތުން ޔޫކްރެއިންގައި ތިބި ހުރިހާ ދިވެހީން މިހާރު ވަނީ ހަންގޭރީއަށް ގެންގޮސްފައެވެ. އަދި ރަޝިޔާގައި ތިބި ދިވެހީންގެ ތެރެއިން މާލެއަށް އަންނަން ބޭނުންވާ ފަރާތްތަކަށް އެފުރުސަތު ހޯދައިދިނުމުގެ މަސައްކަތްވެސް ފޮރިން މިނިސްޓްރީން އަންނަނީ ކުރަމުންނެވެ.
