ސްޓާމަރ، މެކްރޮން، ޒެލެންސްކީ އަދި މާޒްގެ ބައްދަލުވުމެއް އިނގިރޭސިވިލާތުގައި
7 ޖޫން 2026 | އާދީއްތަ 07:57މި ބައްދަލުވުން ބޭއްވުމަށް ހަމަޖެހިފައި ވަނީ އިނގިރޭސިވިލާތުގެ ވެރި ރަށް ލަންޑަންގައި. ޤައުމު ތަކުގެ ލީޑަރުން އިނގިރޭސިވިލާތަށް ކުރައްވާ މި ދަތުރުފުޅަކީ، ރަޝިޔާ އިން ޔޫކްރެއިން އަށް ދެމުންދާ ހަމަލާތައް ވަރުގަދަ ކޮށްފައިވާ ދަނޑިވަޅެއްގައި ކުރައްވާ ދަތުރުފުޅެއް.
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އާއި، ޔޫކްރެއިނުގެ ރައީސް ވުލޮޑިމިއަރ ޒެލެންސްކީ އާއި، ފްރާންސްގެ ރައީސް އިމަނުއެލް މެކްރޮން އަދި ޖަރުމަނުގެ ޗާންސެލަރު ފްރެޑްރިކް މާޒް. | ގެޓީ އިމޭޖަސް
ޔޫކްރެއިން އަށް އެހީތެރިކަން ފޯރުކޮށްދިނުމާ ގުޅޭ ގޮތުން މަޝްވަރާ ކުރެއްވުމަށްޓަކައި، އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ އާއި، ޔޫކްރެއިނުގެ ރައީސް ވުލޮޑިމިއަރ ޒެލެންސްކީ އާއި، ފްރާންސްގެ ރައީސް އިމަނުއެލް މެކްރޮން އަދި ޖަރުމަނުގެ ޗާންސެލަރު ފްރެޑްރިކް މާޒް ބައްދަލު ކުރައްވާ ގޮތަށް ހަމަޖެހިއްޖެ އެވެ.
މި ބައްދަލުވުން ބޭއްވުމަށް ހަމަޖެހިފައި ވަނީ އިނގިރޭސިވިލާތުގެ ވެރި ރަށް ލަންޑަންގައި އެވެ. ޤައުމު ތަކުގެ ލީޑަރުން އިނގިރޭސިވިލާތަށް ކުރައްވާ މި ދަތުރުފުޅަކީ، ރަޝިޔާ އިން ޔޫކްރެއިން އަށް ދެމުންދާ ހަމަލާތައް ވަރުގަދަ ކޮށްފައިވާ ދަނޑިވަޅެއްގައި ކުރައްވާ ދަތުރުފުޅެކެވެ. އަދި މިއީ ހަނގުރާމައާ ގުޅޭ ގޮތުން ސީދާ ބައްދަލު ކުރެއްވުމަށް ޒެލެންސްކީ ހުށަހެޅުއްވި ހުށަހެޅުއްވުމަށް، ރަޝިޔާގެ ރައީސް ވްލަޑިމިއަރ ޕުޓިން އިންކާރު ކުރައްވާފައިވާ ވަގުތެއްކަން ވެސް ފާހަގަ ކުރެވެ އެވެ.
އިނގިރޭސިވިލާތާއި ފްރާންސް އަކީ ޔޫކްރެއިން އަށް ސަލާމަތީ ރައްކާތެރިކަން ކަށަވަރު ކޮށްދިނުމަށް މަސައްކަތް ކުރާ، "ކޯލިޝަން އޮފް ދަ ވިލިންގް" ގައި އިސްކޮށް ޙަރަކާތްތެރިވާ ދެ ޤައުމެވެ. މި ބައްދަލުވުމުގެ ތައްޔާރީތައް ކުރިއަށްދާއިރު، ހޮނިހިރު ދުވަހު ޔޫކްރެއިން އިން ވަނީ ރަޝިޔާގެ ދެ ވަނަ އަށް އެންމެ ބޮޑު ސިޓީ ކަމަށްވާ ސެއިންޓް ޕީޓާސްބަރގް އަށް ޑްރޯން ހަމަލާ ތަކެއް ދީފައި އެވެ. މި ހަމަލާތައް އެ ސިޓީގެ ތެޔޮ ޓަރމިނަލް އަކަށް އަމާޒު ކޮށްފައިވާއިރު، މިއީ ރަޝިޔާގެ އެތެރޭގެ ސަރަހައްދު ތަކަށް ހަމަލާ ދިނުމުގެ ޤާބިލުކަން ޔޫކްރެއިން އަށް ލިބިފައިވާ މިންވަރު ހާމަ ކޮށްދޭ ކަމެކެވެ.
ހަނގުރާމައިގެ މައިދާނުގެ އެންމެ ފަހުގެ ތަފާސް ހިސާބު ތަކަށް ބަލާއިރު، ރަޝިޔާގެ ސިފައިން ޔޫކްރެއިންގެ ބައެއް ސަރަހައްދު ތަކަށް ޑްރޯން އާއި އާޓިލަރީ ބޭނުން ކޮށްގެން 30 ހަމަޅާ ދީފައިވެ އެވެ. މި ހަމަލާ ތަކުގައި އެކަކު މަރުވެ، ތިން މީހަކު ޒަޚަމުވެފައިވާ ކަމަށް އެ ސަރަހައްދުގެ އިސްވެރިޔާ އޮލެކްސަންޑަރ ހަންޒާ ވަނީ ވިދާޅުވެފައި އެވެ. މީގެ އިތުރުން، މި ހަފުތާގެ ކުރީ ކޮޅު ރަޝިޔާ އިން ދިން ހަމަލާ ތަކުގައި އެކަކު މަރުވެ، 15 މީހަކު ޒަޚަމުވެފައިވާއިރު، އޭގެ ތެރޭގައި ތިން ކުޑަ ކުދިން ވެސް ހިމެނެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ، ރަޝިޔާގެ ރައީސް ޕުޓިން އާއި ޔޫކްރެއިންގެ ރައީސް ޒެލެންސްކީ ބައްދަލު ކުރެއްވުމަކީ ރަނގަޅު ކަމެއް ކަމަށް ވިދާޅުވެފައި އެވެ. ނަމަވެސް، ޓްރަމްޕްގެ ސަމާލުކަން މިވަގުތު ހުރީ އެމެރިކާ އާއި އީރާންއާ ދެމެދު ކުރިއަށް ގެންދާ މަޝްވަރާ ތަކަށެވެ. މިދިޔަ ބުދަ ދުވަހު އިނގިރޭސިވިލާތުގެ ބޮޑު ވަޒީރު ސްޓާމަރ ވަނީ ޒެލެންސްކީ އަށް ފޯނުން ގުޅުއްވައި، ރަޝިޔާ އިން ދެމުންދާ ހަމަލާތައް ކުށްވެރި ކުރައްވައިފަ އެވެ.
މަސްދަރު: ދި ގާޑިއަން
