ކ. މާލެ
|
1 މާރޗް 2022 | އަންގާރަ 17:43
ރަޝިޔާއަށް އަޅަމުންދާ އިގުތިސާދީ ދަތިކުރުމުގެ ފިޔަވަޅުތަކާއެކު، ރަޝިޔާގެ އިގުތިސާދު ނަގާ ކޮޅަށްޖެހޭނެ ގޮތެއް ހޯދަންޖެހޭ
ރަޝިޔާއަށް އަޅަމުންދާ އިގުތިސާދީ ދަތިކުރުމުގެ ފިޔަވަޅުތަކާއެކު، ރަޝިޔާގެ އިގުތިސާދު ނަގާ ކޮޅަށްޖެހޭނެ ގޮތެއް ހޯދަންޖެހޭ
ޕީޓީއައި
ރަޝިޔާއާ ދެކޮޅަށް އަޅާ ދަތިކުރުމުގެ ފިޔަވަޅުތައް
ކްރިޕްޓޯ ކަރަންސީއަށް ރަޝިޔާ ސަލާމަތްކޮށެއްނުދެވޭނެ
 
ދަތިކުރުމުގެ ފިޔަވަޅުތަކާއެކު އެންމެ ބޮޑަށް ބެލެވެނީ، ރަޝިޔާއިން ފައިނޭންޝަލް ސިސްޓަމްގެ އިތުރު ގޮތްތަކެއް ތައާރަފްކޮށް އެ ނިޒާމުތައް ބޭނުންކުރުމާ ދިމާއަށް ދާނެކަމަށް
 
ރަޝިޔާގެ 80 އިންސައްތަ ފޮރިން އެކްސްޗޭންޖް ޓްރާންސްސެކްޝަންތަކާއި ބައިނަލްއަގުވާމީގޮތުން ކުރާ ވިޔަފާރިތަކުގެ ދެބައިކުޅަ އެއްބައި މުއާމަލާތްކުރަނީ ޑޮލަރުން
 
ފިޔަވަޅުތައް އަޅަމުންދަނީ ޕުޓިންއަށް ރަޝިޔާގެ 630 ބިލިއަން އެމެރިކާ ޑޮލަރުގެ ފޮރިން ރިޒަރވް ބޭނުންކުރުމުގެ ފުރުސަތު ވީހާވެސް ކުޑަކުރެވޭނެ ގޮތްތައް ބަލައިގެން

ރަޝިޔާއިން ޔޫކްރެއިނަށް ހަމަލާދޭން ފެށުމާއެކު އެމެރިކާއާއި އެމެރިކާގެ ބައިވެރިން ވަނީ ރަޝިޔާއާ ދެކޮޅަށް އިގުތިސާދީގޮތުން ވަރުގަދަ ފިޔަވަޅުތަކެއް އަޅާފައެވެ. ރަޝިޔާގެ ސެންޓްރަލް ބޭންކާއި، އެކި ބޭންކުތަކާއި، ރަޝިޔާގެ ރައީސް ވްލަޑްމިއަރ ޕުޓިންއާއި ޕުޓިންގެ އެންމެ ގާތް މީހުންނާއި، ރަޝިޔާގެ އެންމެ މުއްސަނދި މީހުންނަށެވެ. މިހެން ގޮސް މިލިސްޓް ކިތަންމެ ދިގުކޮށްވެސް ކީދާނެއެވެ.

އެމެރިކާ، އިނގިރޭސިވިލާތް، ޔޫރަޕިއަން ޔޫނިއަން އަދި ކެނެޑާއިން ވަނީ ހޯމަ ދުވަހު އިތުރު ފިޔަވަޅުތަކެއް ރަޝިޔާގެ ސެންޓްރަލް ބޭންކާއި ވެލްތު ފަންޑަށް އަމާޒުކޮށް އަޅާފައެވެ. އެމެރިކާގެ ޓްރެޝަރީ ޑިޕާޓްމަންޓުން ބުނާގޮތުގައި ފިޔަވަޅުތައް އަޅަމުންދަނީ ޕުޓިންއަށް ރަޝިޔާގެ 630 ބިލިއަން އެމެރިކާ ޑޮލަރިގެ ފޮރިން ރިޒަރވް ބޭނުންކުރުމުގެ ފުރުސަތު ވީހާވެސް ކުޑަކުރެވޭނެ ގޮތްތައް ބަލައިގެންނެވެ.

ސްވިފްޓު ޕޭމަންޓުން ރަޝިޔާގެ ބޭންކުތަކެއް އުނިކުރަން ނިންމި ނިންމުމާއެކު ރަޝިޔާގެ ކަރަންސީގެ އަގުވަނީ ވަރަށް ބޮޑަށް ދަށްވެފައެވެ.

ދަތިކުރުމުގެ ފިޔަވަޅުތައް އެޅުމުގެ މާނައަކީ ބޭންކިންގ ސިސްޓަމް މެދުވެރިކޮށް ޓްރާންސްސެކްޝަންތައް ޓްރެކް ކުރެވުމެވެ. މީގެކުރިން އެމެރިކާގެ ދަތިކުރުމުގެ ފިޔަވަޅުތަކާއި ކުރިމަތިވެފައިވާ ދެ ގައުމު ކަމުގައިވާ އީރާނާއި އުތުރުކޮރެއާއިން ދަތިކުރުމުގެ ފިޔަވަޅުތަކުން ސަލާމަތްވުމަށް ފައިނޭންޝަލް ސިސްޓަމްގެ ތެރޭގައި ބޭނުންކުރަނީ ކްރިޕްޓޯކަރަންސީއެވެ.

ކޮއިންފަރމްގެ ފްރައުޑް އިންވެސްޓިގޭޝަން ހެޑް ރޯމަން ބިއެޑާ އަލްޖަޒީރާއާ ވާހަކަދައްކަވަމުން ވިދާޅުވީ އަޅާފައިވާ ދަތިކުރުމުގެ ފިޔަވަޅުތަކުން ސަލާމަތްވެ ލިބިފައިވާ މުއްސަނދިކަން ފޮރުވުމަށް ކްރިޕްޓޯ ބޭނުންކުރެވޭނެކަމަށެވެ. ނަމަވެސް ކްރިޕްޓޯގެ މާހިރަކު އަލްޖަޒީރާއާ ވާހަކަދައްކަވަމުން ވިދާޅުވީ, އެ ހާލަތު, އިގުތިސާދީ ގޮތުން ދަތިކުރުމުގެ ފިޔަވަޅުތައް އަޅައި އެބަޔަކު ބޭނުންވާ ގޮތަށް ކަންކަން ނިންމުމުގެ ފުރުސަތު ކުޑަ, އަދި ޑިޖިޓަލް ކަރަންސީއަށް ދިޔުމުގައި ވަކި މިންގަނޑުތަކެއް ގެންގުޅޭ ގައުމެއްގައި ތަފާތުވާނެއެވެ. އެހެންކަމުން ކްރިޕްޓޯކަރަންސީއަށް އެކަނި ރަޝިޔާގެ އިގުތިސާދު މިފިޔަވަޅުތަކުން ސަލާމަތެއް ނުކުރެވޭނެއެވެ.

އެތައް ބިލިއަން ޑޮލަރެއް ބަދަލުކުރަންޖެހޭނެ

އުތުރުކޮރެއާ، ވެނެޒުއޭލާ އަދި އީރާނާ ޚިލާފަށް ރަޝިޔާއަކީ ބައިނަލްއަގުވާމީ ފައިނޭންޝަލް ސިސްޓަމްގެ އެތެރޭގައި އެތައް އަހަރުތަކެއް ހޭދަކޮށްފައިވާ ގައުމެކެވެ. ބްލޮކްޗެއިން އިންޓެލިޖެންސްގެ ކޮމްޕެނީގެ ފަރާތުން ވާހަކަދައްކަވަމުން އެރި ރެޑްބޮރޑް ވިދާޅުވީ, ރަޝިޔާގެ 80 އިންސައްތަ ފޮރިން އެކްސްޗޭންޖް ޓްރާންސްސެކްޝަންތަކާއި ބައިނަލްއަގުވާމީ ގޮތުން ކުރާ ވިޔަފާރިތަކުގެ ދެބައި ކުޅަ އެއްބައި މުއާމަލާތްކުރަނީ ޑޮލަރުންކަމަށެވެ.

ރެޑްބޮރޑް ވިދާޅުވީ އެހާ ގިނަ އަދަދެއްގެ ކްރިޕްޓޯ, މޫވްކޮށް ބޭނުންކުރެވޭ ކަރަންސީއަކަށް ބަދަލުކުރުމަކީ ވަރަށް އުނދަގޫ ކަމެކެވެ. ފްރީޒްކޮށްފައިވާ އެތައް ބިލިއަން ޑޮލަރެއް ކްރިޕްޓޯ ބޭނުންކޮށްގެން ބޭނުންކުރެވޭ ގޮތަށް ބަދަލުނުކުރެވޭނެކަމަށް ރެޑްބޮރޑް ވިދާޅުވިއެވެ.

ނަމަވެސް ދަތިކުރުމުގެ ފިޔަވަޅުތަކާއެކު ލިބޭ ގެއްލުންތަކުން ސަލާމަތްވުމަށް ކްރިޕްޓޯގެ ބޭނުން އަންނަނީ ކުރަމުންނެވެ. ކްރިޕްޓޯކަރަންސީ ބޭނުންކޮށްގެން ކުރެވޭ މުއާމަލާތްތައް ހުންނަނީ އާންމުކޮށް ފެންނާށެވެ. އެގޮތުން ކޮންމެ ޓްރާންސްސެކްޝަނަކާއެކު އެ ޓްރާންސްސެކްޝަންގައި ހަރަކާތްތެރިވާ ފަރާތްތަކުގެ އެޑްރެސް އާއެކު އެޓްރާންސްސެކްޝަނެއް އެނގިގެންދާނެއެވެ.

ދަތިކުރުމުގެ ފިޔަވަޅުތައް އަޅާފައިވާތީ ސަރުކާރުތަކަށް ކްރިޕްޓޯ ފޮނުވަނީ ކޮންބައެއްކަން ދެނެއެއް ނުގަނެވޭނެއެވެ. ނަމަވެސް ފޮނުވާ އަދަދުތައް ފެންނާނެއެވެ. އެހެންކަމުން ބޮޑެތި އަދަދުތަކުން އެކްސްޗޭންޖްކުރާނަމަ އެކަމެއް މޮނިޓަރ ކުރެވޭނެއެވެ.

ދުނިޔޭގައި ޑޮލަރު އަދާކުރާ ރޯލު ކުޑަކުރުން

އެމެރިކާގެ ޓްރެޝަރީ ޑިޕާޓްމަންޓުން ދާދިފަހުން ވަނީ ޑިޖިޓަލް ކަރަންސީއާއި ޕޭމަންޓްކުރެވޭ އިތުރު ޕްލެޓްފޯމުތަކުގެ ސަބަބުން އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ އަސަރު ކުޑަވެދާނެކަމުގެ އިންޒާރު ދީފައެވެ.

އައު ޓެކްނޮލޮޖީއާއެކު ކުރީއްސުރެ ބޭނުންކުރަމުން އަންނަ ފައިނޭންޝަލް ސިސްޓަމްގެ ބޭރުން ފައިސާ ޓްރާންސްފަރ ކުރެވޭނެއެވެ. އެއާއެކު ދުނިޔޭގައި ޑޮލަރު އަދާކުރަމުން އަންނަ ދައުރު ކުޑަވެ އެހެން ޕޭމަންޓް ސިސްޓަމްތައް އުފެދި އެބޭނުންކުރުމުގެ މަގުފަހިވެގެންދާނެއެވެ.

ރަޝިޔާގެ ބޭންކުތައް ވަނީ ސްވިފްޓް ޕޭމަންޓުން އުނިކޮށްފައެވެ. އެއާއެކު ރަޝިޔާއަށް ޕޭމަންޓްތައް އަދާކޮށް ވިޔަފާރީގެ މުއާމަލާތްތައް ކުރުމަށް އިތުރުގޮތެއް ވަރަށް އަވަހަށް ބޭނުންވާނެއެވެ. އެހެންކަމުން ރަޝިޔާއާ ގާތްގުޅުމެއް އޮންނަ ގައުމުތައް ގުޅިގެން އެފަދަ ނިޒާމެއް ވަރަށް އަވަހަށް އުފައްދައި ހިންދެމިލުމުގެ ފުރުސަތު ބޮޑެވެ.

މާހިރުން ލަފާކުރާ ގޮތުގައި ދަތިކުރުމުގެ ފިޔަވަޅުތަކާއެކު އެންމެ ބޮޑަށް ބެލެވެނީ ރަޝިޔާއިން ފައިނޭންޝަލް ސިސްޓަމްގެ އިތުރު ގޮތްތަކެއް ތައާރަފްކޮށް އެ ނިޒާމުތައް ބޭނުންކުރުމާ ދިމާއަށް ދާނެކަމަށެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: އައިޝަތު ރިޔާޒް
43%
14%
0%
14%
14%
14%
ކޮމެންޓް