މުޅި ރާއްޖެއަށް ހުޅުވާލައިގެން ބާއްވާ ދިވެހި ޕްރިމިއާ ލީގުގެ ލޯގޯ ދައްކާލައިފި

މުޅި ރާއްޖެއަށް ހުޅުވާލައިގެން 2023/2024 ވަނަ އަހަރު ބާއްޗާ ދިވެހި ޕްރިމިއާ ލީގުގެ އައު ލޯގޯ ރަސްމީކޮށް އިފްތިތާހުކޮށްފިއެވެ.

ގައުމީ ފުޓުބޯޅަ ދަނޑުގައި ހުކުރު ދުވަހުގެރޭ ބޭއްވި ރަސްމިއްޔާތުގައި ލޯގޯ އިފްތިތާހުކޮށްދެއްވީ ކުޅިވަރާ ބެހޭ ވަޒީރު އަޙްމަދު މަޚްލޫފްއެވެ. މަޚްލޫފްގެ އިތުރުން މި ރަސްމިއްޔާތުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލާއި، ކޮމިޝަނަރ އޮފް ސްޕޯޓްސް ހީނާ އަޙްމަދު ސަލީމް އާއި އެފްއޭއެމްގެ އިސްވެރިން ބައިވެރިވެވަޑައިގެންނެވިއެވެ.

އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯން ލީގަކަށެވެ. ޒޯން އެކެއް ނުވަތަ ނޯތު ޒޯން ލީގުގައި ހިމެނެނީ ހއ، ހދ، ށ، ނ، ރ އެވެ. ޒޯން ދޭއް ނޫނީ ސެންޓްރަލް ޒޯން ލީގުގައި އޮތީ ބ، ޅ، ކ، އއ، އދ، ވ، މ، ފ، ދ އެވެ. ޒޯން ތިނެއް ނޫނީ ސައުތު ޒޯން ލީގުގައި އޮތީ ތ، ލ، ގއ، ގދ، ޏ، ސ އެވެ. އަދި ޒޯން ހަތަރަކީ މިހާރު މާލޭގައި ކުރިއަށްދާ ފުރަތަމަ ޑިވިޝަން ނޫނީ މާލޭ ޒޯންލީގް އެވެ މި ލީގުގައި ހިމެނޭނީ މާލެ، ހުޅުމާލެ، ވިލިމާލޭގެ ޓީމުތަކެވެ.

މި މަހުގެ ހަތްވަނަ ދުވަހުގެ ނިޔަލަށް 2023/2024 ލީގުގެ ކޮލިފިކޭޝަނުގައި ބައިވެރިވުމުގެ މުއްދަތު ހަމަވިއިރު، 53 ރަށަކުން 61 ޓީމު ވަނީ ބައިވެރިވެފައެވެ.

އެއީ ނޯތު ލީގުގައި 16 ރަށަކުން 17 ޓީމާއި، ސެންޓްރަލް ލީގުގައި 18 ރަށަކުން 19 ޓީމުގެ އިތުރުން ސައުތު ލީގުގައި 19 ރަށަކުން 25 ޓީމެވެ.

ލީގު ފޯމެޓަށް އަންނާނެ އެންމެ ބޮޑު ބަދަލަކީ ކޮންމެ ޒޯނެއްގައިވެސް ތިން ޑިވިޝަނެއް ކުރިއަށް ގެންދިއުމެވެ. ތިން ޑިވިޝަނަށް ޓީމުތައް ހޮވުމުގައި އެންމެ ފުރަތަމަ ބޭއްވިގެންދާނީ ރަށު ފެންވަރުގައި ބޭއްވޭ "އޯޕަން ޑިވިޝަން" އެކެވެ. އޯޕަން ޑިވިޝަނުގެ ބޭނުމަކީ ކޮންމެ ރަށެއްގައި ވެސް އޮންނަ ކޮންމެ ޓީމަކަށް އަދި ކޮންމެ ޖަމިއްޔާ އަކަށް ބައިވެރިވުމުގެ ފުރުސަތު ދިނުމުގެ ގޮތުންނެވެ. ފުރަތަމަ މުބާރާތުގައި ރަށަކުން ޒޯން ޑިވިޝަނަށް ދާނީ އޯޕަން ޑިވިޝަނަށް ފަހު ރަށަކުން އެއް ޓީމެވެ.

ދިވެހި ޕްރިމިއާ ލީގު 2023/2024 ފަށާއިރު، އޮންނާނީ މި ވަގުތުވެސް ޕްރިމިއާ ލީގުގައި އޮތް އަށް ޓީމުގެ އިތުރުން ހަތަރު ޒޯން ލީގުގެ ޗެމްޕިއަނުންނެވެ.