ބައިނަލްއަގުވާމީ ފުރަތަމަ ކްލަބް ތަށްޓާއެކު ޓީސީ އެނބުރި ރާއްޖެއަށް
ޓީސީ އެނބުރި ރާއްޖެ އައުމުން އެޓީމަށް ހޫނު މަރުހަބާއެއް ވަނީ ކިޔާފަ
ޓީސީ ސްޕޯޓްސް ކްލަބް އެނބުރި މާލެ އައުން
ބައިނަލްއަގުވާމީ ފުރަތަމަ ކްލަބް ތަށްޓާއެކު ޓީސީ ސްޕޯޓްސް ކްލަބް އެނބުރި ރާއްޖެއަށް އަތުވެއްޖެ އެވެ.
ހޮނިހިރު ދުވަހުގެ ރޭ ޓީސީ ރާއްޖެ އައިސްފައިވާއިރު، ވެލާނާ އިންޓަނޭޝަނަލް އެއާޕޯޓުން އެ ކްލަބަށް މަރުހަބާކީ ޔޫތް މިނިސްޓަރު އިރުތިޝާމް އާދަމް، ފިޝަރީސް މިނިސްޓަރު މުހައްމަދު ޝައިނީ، ސްޕޯޓްސް ކޮމިޝަނާ އަދި ޓީސީގެ ކުރީގެ ރައީސް އަހުމަދު ނަޝީދުގެ އިތުރުން އެފްއޭއެމްގެ ރައީސް ބައްސާމް އަދީލް ޖަލީލް އެވެ.
ޓީސީ ޓީމް މާލެ އައުމުން ކުޅިވަރަށް ލޯބިކުރާ ފަރާތްތަކުގެ އިތުރުން ސަރުކާރުގެ އިސްވެރިން ވަނީ ހޫނު މަރުހަބާއެއް ކިޔާފައެވެ. ޓީސީ ކުޅުންތެރިންނާއި ސަޕޯޓަރުން ވަނީ އެއް ނަންބަރު ފާލަމުން ހިނގާފައި "ޓީސީ ގޯޅި" އަށް ގޮސް، ހަރުބީ ބޮޑުބެރު ގްރޫޕާއެކު އެ ޓީމު ހޯދި ކާމިޔާބީ ފާހަގަކޮށްފައެވެ.
ޝައިހް ކަމާލް އިންޓަނޭޝަނަލް ކްލަބް ކަޕްގައި ކުޅުނު އެއްވެސް މެޗަކުން ބަލިނުވެ މުބާރާތުގެ ޗެމްޕިއަންކަން ޓީސީ ހޯދާފައިވާއިރު، އެ ޓީމު ވަނީ ކިރިގިސްތާން، ނޭޕާލް، ބަންގްލަދޭޝް އަދި ދެކުނު ކޮރެއާގެ ކްލަބްތައް ވެސް ބަލިކޮށްފައެވެ.
ބައިނަލްއަގުވާމީ މުބާރާތެއްގެ ތަށްޓާ އެންމެ ކައިރިޔަށް ދަތުރުކުރެވުނު ކްލަބަކީ ނިއުރޭޑިއަންޓް ސްޕޯޓްސް ކްލަބެވެ. އެހެންނަމަވެސް އެޓީމަށް ދެވުނީ ސެމީފައިނަލާ ހަމައަށެވެ.
