ލީބިޔާއަށް މިހާރު ކުރިމަތިވެފައިވާ ސިޔާސީ މައްސަލަތަކުން އަރައިގަތުމަށް ވީއެންމެ އަވަހަށް އިންތިޚާބެއް ބޭއްވުމަށް އިންތިޚާބާއި ބެހޭ ޤާނޫނެއް ވަރަށް އަވަހަށް ޑްރާފްޓް ކުރައްވާނެކަމަށް ލީބިޔާގެ ވަގުތީ ބޮޑުވަޒީރު އަބްދުލްހަމީދު މުޙައްމަދު ދްބައިބާ ވައުދުވެވަޑައިގަންނަވައިފިއެވެ.
ލީބިޔާގެ ބޮޑުވަޒީރު މިމޭރުމުން ވައުދުވެ ވަޑައިގަންނަވާފައި މިވަނީ އދގެ ސެކެޓްރީ ޖެނެރަލް އެންޓޯނިއޯ ގުޓަރޭސް ހުރިހާ ޕާޓީތަކަކުންވެސް ލީބިޔާގެ ސަލާމަތާއި އަމާންކަމާއި ހަމަޖެހުމަށް އިސްކަންދިނުމަށް ގޮވާލެއްވިތާ އެއް ދުވަސްފަހުންނެވެ.
ލީބިޔާގައި މިހާރު ވަނީ ދެ ބޮޑުވަޒީރެއް އުފެދި ދެ ސަރުކާރެއް އުފެދި ހަމަނުޖެހުންތައް އަލުން ހިނގަންފަށާނެކަމުގެ ބިރު ހީވެފައެވެ.
ގުޓަރޭސް ނެރުއްވި ބަޔާނެއްގައި ވަނީ ހުރިހާ އިދާރާތަކަށްވެސް އެންމެ އިސްކަމެއްދީގެން ކުރަންޖެހޭ ކަމަކީ ވީ އެންމެ އަވަހަކަށް އިންތިޚާބެއް ބޭއްވުންކަން ހަނދާންކޮށްދީފައެވެ.
ވަގުތީ ބޮޑުވަޒީރު އަބްދުލްހަމީދު އަވަހާރަކޮށްލުމަށް ދިން ހަމަލާއިން ސަލާމަތްވެ ވަޑައިގަންނަވާފައިވާއިރު ލީބިޔާގެ އަލް އަހްރާރް ޓީވީއަށް ދެއްވި އިންޓަރވިއުއެއްގައި އަބްދުލްހަމީދު ވިދާޅުވީ އިންތިޚާބާއި ބެހޭ ޤާނޫނުގެ ބިލް ފުރަތަމަ ހުށަހަޅުއްވާނީ ހައުސް އޮފް ރެޕްރެޒެންޓޭޓިވް އަށްކަމަށެވެ. އެއަށްފަހު ޕްރެޒިޑެންޝިއަލް ކައުންސިލަށް އެ ޤާނޫނު ތަސްދީޤުކުރުމަށް ފޮނުވާނެކަމަށެވެ.
ލީބިޔާގައި މިހާރު އުފެދިފައިވަނީ ވަގުތީ ސަރުކާރެކެވެ. ގަވަރމަންޓް އޮފް ނޭޝަނަލް ޔުނިޓީގެ ނަމުގައި އުފެދިފައިވާ ސަރުކާރަކީ އދ ގެ ބެލުމުގެ ދަށުން އެކުލަވާލާފައިވާ ސަރުކާރެކެވެ. މިދިޔަ އަހަރުގެ ޑިސެމްބަރ މަހުގެ ތެރޭގައި ލީބިޔާގައި އައު ސަރުކާރެއް އިންތިޚާބު ކުރުމަށް މަސައްކަތްތަކެއް ކޮށްފައިވެއެވެ. ނަމަވެސް ޑިސެމްބަރ 24 ގައި އިންތިޚާބު ނުބޭއްވި ފަސްވެފައިވާއިރު އަލުން އިންތިޚާބު ބޭއްވޭނެ ދުވަހެއް އަދި ނޭންގެއެވެ.
ތިން މިލިއަނެއްހާ މީހުން ވަނީ އިންތިޚާބުގައި ވޯޓުލުމަށް ރަޖިސްޓްރީކޮށްފައެވެ. ނަމަވެސް އިންތިޚާބު ލަސްވުމާއެކު އަނެއްކާވެސް ވަނީ ލީބިޔާގެ އެތެރޭގައި ކަންބޮޑުވުންތައް އިތުރުވެފައެވެ.
ލީބިޔާގެ ސިޔާސީ މަޝްރަހު އިތުރަށް ހޫނުވެގެންދިޔައީ ބުރާސްފަތި ދުވަހު ލީބިޔާގެ ޤާނޫނު ހަދާ މަޖިލީހުން ކުރީގެ އިންޓީރިއަރ މިނިސްޓަރ ފާތި ބަޝާގާ އަކީ އައު ބޮޑުވަޒީރުކަމަށް ކަނޑައެޅުމުންނެވެ.
މިކަމާއި ގުޅިގެން ލީބިޔާގެ ވަގުތީ ބޮޑުވަޒީރު އަބްދުލްހަމީދު ވަނީ އިންތިޚާބެއް ބާއްވާ އިންތިޚާބު ކުރެވޭ ސަރުކާރަކަށް ބާރުތައް ބަދަލުކުރައްވާނެކަމަށް ވިދާޅުވެފައެވެ.
