ޚިދުމަތްތައް ލާމަރުކަޒުކޮށް ރައްޔިތުންނަށް ވީހާވެސް ގާތުން ޚިދުމަތް ފޯރުކޮށްދެވޭނެ ނިޒާމެއް މީހުން އުޅޭ ކޮންމެ ރަށެއްގައި ގާއިމްކުރުމުގެ މަސައްކަތް ކުރަމުންދާ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ ވިދާޅުވެއްޖެއެވެ.

ބުރާސްފަތި ދުވަހުގެ ރޭ ދ. ވާނީގައި ބޭއްވި 33 ވަނަ ޕޮލިސް އިނީޝިއަލް ޓްރެއިނިންގ ކޯހުގެ ޕާސިންގ އައުޓް ޕެރޭޑް ރަސްމިއްޔާތު ޝަރަފުވެރިކޮށްދެއްވައި މިނިސްޓަރު ވިދާޅުވީ މިނިސްޓްރީގެ ޚިދުމަތްތައްފުޅާކޮށް ޚިދުމަތްތައް ލާމަރުކަޒުކޮށް ރައްޔިތުންނަށް ވީހާވެސް ގާތުން ޚިދުމަތް ފޯރުކޮށްދެވޭނެ ނިޒާމެއް މީހުން އުޅޭ ކޮންމެ ރަށެއްގައި ގާއިމްކުރުމުގެ މަސައްކަތް ކުރަމުންދާ ކަމަށެވެ.

އެގޮތުން، މީހުން ދިރިއުޅޭ ކޮންމެ ރަށެއްގައި "އިޖުތިމާއީ ބަދަހި މަދަދުވެރިން" (އިބަމަ) އުފެއްދުމުން، އެރަށެއްގެ މުއައްސަސާތައް ގުޅިގެން ރައްޔިތުންނަށް ރައްކާތެރިކަން ފޯރުކޮށްދީ، ޕްރިވެންޝަނަށް މަސައްކަތް ކުރުމަށް މަގުފަހިވެގެން ދާނެ ކަމަށް މިނިސްޓަރު ވިދާޅުވިއެވެ. އެއީ ފުލުހުންގެ ބައިވެރިވުމާއި އެކު ޙަވާސާގައި ތިބި ފަރާތްތައް އިތުރަށް ނިކަމެތިވިޔަ ނުދިނުމަށް އިބަމައިން ޙާސިލްކުރެވިގެންދާނެ އެންމެ މުހިންމު ތަޖުރިބާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ ގިނަ މުއައްސަސާތަކެއް ތަމްސީލު ކުރާ "އިބަމަ"އިގެ މުހިންމު ހިއްސާދާރެއްގެ ގޮތުގައި ދިވެހި ފުލުހުންގެ ޚިދުމަތް ވެގެންދާނެ ކަމަށާއި، އިބަމަގެ މަސައްކަތަކީ ދިވެހި ފުލުހުންގެ ޙިދުމަތުގެ 'ނެއިބަރހުޑް ޕޮލިސިންގ' އާއި ވަރަށް ގާތް މަސައްކަތެއް ކަމަށެވެ.

މުޅި މުޖުތަމައުގެ ރައްކާތެރިކަމާއި އޯގާތެރިކަން އޮންނާނެކަމުގެ ޔަގީންކަން ލިބިދިނުމަކީ އެއް އަމާޒުކަން ފާހަގަކުރައްވައި މިނިސްޓަރު ވިދާޅުވީ ދިވެހި ފުލުހުންގެ ޚިދުމަތުގައި މަސައްކަތްކުރާ ކޮންމެ ފަރާތަކުން ވެސް ގާނޫނު ތަންފީޒުކުރުމުގައި އިންސާނީ ހައްގާއި ކަރާމާތައް ހުރުމަތްތެރިކޮށް ހިތާ، ޚާއްސަ އެހީތެރިކަން ބޭންންވާ ފަރާތްތަކަށް އޯގާތެރިކަމާއި ކުލުނުނާއި ހަމްދަރުދީއާއެކު މުއާމަލާތްކުރަން ޖެހޭ ކަމަށެވެ. އަދި މިނިސްޓްރީގެ ބެލުމުގެ ދަށުން ކުޑަކުދިންގެ ހައްގުތައް ރައްކާތެރިކުރުމާއި ބެހޭ ގާނޫނާއި ގެވެށި އަނިޔާ ހުއްޓުވުމުގެ ގާނޫނު ތަންފީޒުކުރުމުގައި ފުލުހުންގެ ޚިދުމަތުން ދާއިމީ ގޮތެއްގައި ދެމުން ގެންދާ އެހީތެރިކަމާއި އެއްބާރުލުން މިނިސްޓަރު ވަނީ ފާހަގަކުރައްވާފައެވެ.

އަންހެނުންނަށް ހުރި ފުރުސަތުތަކަށް އިޝާރާތް ކުރައްވައި މިނިސްޓަރު ވިދާޅުވީ ފުލުހުންގެ ޚިދުމަތުގައި މަސައްކަތްކުރާ އަންހެނުން ބާރުވެރި ކުރުވުމަށާއި އަންހެނުންނަށް ހަމަހަމަ ފުރުސަތުތަކެއް ހޯދައިދިނުމަށާއި ހިންގުމުގެ ދާރާއިން މަތީފަންތީގައި އަންހެނުންގެ ބައިވެރިވުން އިތުރުކުރަމުންދާ ކަމަށެވެ. އަދި ވިދާޅުވީ އަންހެނުން ބާރުވެރި ކުރުވުމުގެ ސްޓެރެޓެޖީގެ މުހިންމު މަސައްކަތެއް ''ޖެންޑަރ އީކުއަލިޓީ އެކްޝަން ޕްލޭން ނިމިފައިވާ ކަމަށާއި، މި އެކްޝަން ޕްލޭންގެ މަސައްކަތް މިއަހަރު ފެށިގެންދާ ކަމަށެވެ.

މީގެ އިތުރުން ގެވެށި އަނިޔާގެ ޝިކާރައަށްވާ އަންހެނުންނާއި ފިރިހެނުންނަށް ލިބޭ އަނިޔާގެ މައްސަލަތައް ތަހުގީގު ކުރުމާއި، ޕްރޮސެކިއުޝަންގެ މަސައްކަތްތައް ހަރުދަނާކުރެވި، އިންސާފު ލިބޭ ފަރާތްތަކުގެ އަދަދު އިތުރުވާނެ ކަމަށެވެ. އަދި ދިވެހި ފުލުހުންގެ ޚިދުމަތުގެ ސްޓްރެޓެޖިކް ޕްލޭން 2019 – 2024 ގައި އެކުލަވާލެވިފައިވާ "ވިމަން އިން ޕޮލިސިންގ" ހަރަކާތުގެ ސަބަބުން މުޖުމައުގައި އަންހެނުންނަށް ދިމާވާ ޚާއްސަ މައްސަލަތައް، ނަމަވެސް އެހެން މީހުނާއި ހިއްސާނުކުރެވި ހުންނަ މައްސަލަތައް ފާހަގަކުރެވި އެމައްސަލަތަކަށް އަވަސް ހައްލެއް ހޯދުމަށް މަގުފަހިވާނެ ކަމަށެވެ. މިނިސްޓަރު ވިދާޅުވީ ކޮންމެ ދާއިރާއެއްގައި ވެސް ހަމަހަމަ ފުރުސަތު ހުޅުވާލާ އެ ފުރުސަތުތަކަށް ވާސިލްވުމަށް މަގު ފަހިކޮށްދީފިނަމަ، އަންހެނުން ސާބިތުކަން ދައްކައިދޭ ކަމަށެވެ. އަދި މަގުމަތީގެ ހަލަބޮލި މާހައުލުގައި އަންހެން ފުލުހުން ދައްކަމުންގެންދާ ނަމޫނާއަކީ މުޖުތަމައުގައި ވެސް އަންހެނުންނަށް ހުރި ފުރުސަތުތަކުގެ ހެއްކެއް ކަމަށާއި، އިޖުތިމާއީ ރައްކާތެރިކަން ފޯރުކޮށްދިނުމުގައި މުއައްސަސާތައް ގުޅިގެން މަސައްކަތްކުރުމަކީ ވަރަށް މުހިންމު ކަމެއް ކަމަށެވެ.

ޖެންޑަރ މިނިސްޓަރު ވިދާޅުވީ ބަވަނަވެފައިވާ ދުނިޔޭގައި ރާއްޖެއަކީ ކުޑަ ގައުމެއް ނަމަވެސް މަސައްކަތް ކުރަނީ ރާއްޖޭގެ ގާނޫނުއަސާސީ އާއި، ގާނޫނުތަކާއި ހެދިފައިވާ ގަވާއިދުތަކާއި އެއްގޮތަށް ދެމެހެއްޓެނިވި ތަރައްގީގެ ލަޑުދަނޑިތައް ހާސިލް ކުރުމަށާއި، ރާއްޖެއިން އެއްބަސްވެފައިވާ ބައިނަލްއަގްވާމީ މުއާޙަދާތަކުގައި އެއްބަސްވެފައިވާ ގޮތަށް އަމަލު ކުރުމަށް ކަމަށެވެ.