ލީބިޔާގެ ބޮޑުވަޒީރު އަވަހާރަކޮށްލަން މަސައްކަތްކޮށްފި
11 ފެބުރުއަރީ 2022 | ހުކުރު 02:01މިހަމަލާއާ ގުޅޭ އެއްވެސް މައުލޫމާތެއް މިހާތަނަށް ލީބިޔާ ސަރުކާރުން ހާމަކޮށްފައެއްނުވޭ
ލީބިޔާގެ ވަގުތީ ބޮޑުވަޒީރު އަބްދުލްހަމީދު މުޙައްމަދު ދްބައިބާ
ލީބިޔާގެ ވަގުތީ ބޮޑުވަޒީރު އަވަހާރަކޮށްލުމަށް ދިން ހަމަލާއަކުން ބޮޑުވަޒީރު ސަލާމަތްވެ ވަޑައިގަންނަވާފައިވާ ކަމަށް ރޮއިޓަރސް އިން ރިޕޯޓްކޮށްފިއެވެ.
މިހަމަލާ އާއި ގުޅޭ އެއްވެސް މައުލޫމާތެއް މިހާތަނަށް ލީބިޔާ ސަރުކާރުން ހާމަކޮށްފައެއްނުވެއެވެ. ނަމަވެސް ލީބިޔާގެ ވަގުތީ ބޮޑުވަޒީރު އަބްދުލްހަމީދު މުޙައްމަދު ދްބައިބާ އާ އަރިސް ބޭފުޅަކާއި ހަވާލާދީ ރޮއިޓަރސް އިން ރިޕޯޓްކޮށްފައިވާ ގޮތުގައި ހަމަލާދީފައިވަނީ ގެއަށް ވަޑައިގެންނެވި މަގުމަތީގައެވެ. އަދި އެއީ ބޮޑުވަޒީރު އަވަހާރަކޮށްލުމަށް ދިން ހަމަލާއެއްކަން ސާފުކަމަށް ރޮއިޓަރސްގައި ރިޕޯޓްކޮށްފައިވެއެވެ.
ރޮއިޓަރސް އިން ބުނެފައިވަނީ ހަމަލާދިން މީހުން ވަނީ ފިލާފައެވެ. އަދި މިހަމަލާ އަންނަނީ އިތުރަށް ތަހުގީގުކުރަމުންނެވެ.
އަލްޖަޒީރާއިން ހާމަކޮށްފައިވާ ފޮޓޯތަކަށް ބަލާލާއިރު ވަޒަން އަރާފައިވަނީ އަބްދުލްހަމީދު ދަތުރުކުރެއްވި ވެހިކަލަށެވެ. ވެހިކަލަކީ ބުލެޓް ޕްރޫފް ވެހިކަލެކެވެ. ވެހިކަލްގެ ތިން ތަނަކަށް ވަޒަން އަރާފައިވާކަމުގެ ނިޝާން ހުއްޓެވެ.
ލީބިޔާގައި މިހާރު އުފެދިފައިވަނީ ވަގުތީ ސަރުކާރެކެވެ. ގަވަރމަންޓް އޮފް ނޭޝަނަލް ޔުނިޓީގެ ނަމުގައި އުފެދިފައިވާ ސަރުކާރަކީ އދ ގެ ބެލުމުގެ ދަށުން އެކުލަވާލާފައިވާ ސަރުކާރެކެވެ. މިދިޔަ އަހަރުގެ ޑިސެމްބަރ މަހުގެ ތެރޭގައި ލީބިޔާގައި އައު ސަރުކާރެއް އިންތިޚާބު ކުރުމަށް މަސައްކަތްތަކެއް ކޮށްފައިވެއެވެ. ނަމަވެސް ޑިސެމްބަރ 24 ގައި އިންތިޚާބު ނުބޭއްވި ފަސްވެފައިވާއިރު އަލުން އިންތިޚާބު ބޭއްވޭނެ ދުވަހެއް އަދި ނޭންގެއެވެ.
