ހަ އަހަރު ފަހުން ކިނބުލުގެ ކަރުގައި އެޅިފައި އޮތް ޓަޔަރު ނައްޓާ ކިނބޫ ދޫކޮށްލައިފި
މިކިނބުލުގެ ދިގު މިނުގައި 13 ފޫޓް ހުރޭ
ކިނބުލުގެ ކަރުގައި އެޅިފައިވާ ޓަޔަރު ނައްޓާލުމަށްފަހު ކިނބޫ ކޯރަށް ދޫކޮށްލަން ތައްޔާރުވަނީ
ހަ އަހަރު ދުވަސްވަންދެން ކިނބުލެއްގެ ކަރުގައި އެޅިފައި އޮތް ޓަޔަރު ނައްޓާލާ ކިނބޫ ދޫކޮށްލައިފިއެވެ.
މިކިނބޫ އޮތީ އިންޑޮނޭޝިޔާގެ ސުލެވެސީގައެވެ. ކިނބުލުގެ ކަރުގައި އެޅިފައި އޮތް ޓަޔަރު ނައްޓާލީ ޖަނަވާރުން ދެކެ ލޯބިވާ ޖަނުވާރުންގެ އުޅުމާއި އެނޫންވެސް ކަންކަން ދިރާސާކުރަމުން އަންނަ އިންޑޮނޭޝިޔާގެ ރައްޔިތެއްކަމުގައިވާ ޓިލީއެވެ.
މިކިނބުލުގެ ދިގު މިނުގައި 13 ފޫޓް ހުންނައިރު ޓަޔަރުގެ ސަބަބުން އޭތި ހެދިބޮޑުވަމުން އަންނަވަރަކަށް ދަތިތައް ދިމާވެދާނެތީ އާންމުން ވަނީ ކަންބޮޑުވުން ފާޅުކޮށްފައެވެ. ނަމަވެސް އެކިނބޫ ހިފުމަކީ ވަރަށް އުނދަގޫކަމެކެވެ. މީގެކުރިން އޮސްޓްރޭލިއާގެ ކަމާބެހޭ މާހިރެއް ވަނީ ކިނބޫގެ ކަރުގައި އެޅިފައިވާ ޓަޔަރު ނައްޓާލުމަށް މަސައްކަތްތަކެއްކޮށްފައެވެ. ނަމަވެސް އެމަސައްކަތް ވަނީ ނާކާމިޔާބުވެފައެވެ.
ކިނބުލުގެ ކަރުން ޓަޔަރު ނައްޓާލި ޓިލީ ބުނީ ކިނބޫ ހިފީ އަމިއްލައަށްކަމަށެވެ. އެކަމަށް އާންމުންގެ އެހީތެރިކަން އެދުނު ކަމަށާއި ނަމަވެސް އެމީހުން ތިބީ ބިރުންކަމަށް ޓިލީ ބުންޏެވެ.
ކިނބޫ ހިފުމަށް ދިގު ވާގަނޑެއް ބޭނުންކުރިއިރު ކިނބޫ އޭނާ ކައިރިއަށް ގެނައުމަށް ބޭނުންކުރީ ދިރި ހުރި ކުކުޅާއި އަސްދޫންޏެވެ. އެގޮތަށް އެކިނބޫ ހިފާފައި ބޭއްވިފަހުން ތިން ހަފްތާތެރޭގައި ދެފަހަރެއްގެ މަތިން ކިނބޫ ވަނީ ދޫވެފައެވެ. ނަމަވެސް ފަހުން އަނެއްކާވެސް ޓިލީ ވަނީ ކިނބޫ ހިފާފައެވެ.
ޓިލީ ބުނީ ކިނބޫ ނޫނަސް ހަރުފައަކަށްވެސް އަނިޔާވާތަން ބަލަން އޭނާއަށް ކެތްނުކުރެވޭނެ ކަމަށެވެ. އެއްވެސް ޖަނަވާރަކަށް އަނިޔާއެއް ވާނަމަ އެއަނިޔާއަކުން އެޖަނަވާރެއް ސަލާމަތްކުރާނެ ކަމަށެވެ.
2020 ވަނަ އަހަރު އިންޑޮނޭޝިޔާގެ ކަމާބެހޭ އިދާރާތަކުން ވަނީ ކިނބުލުގެ ކަރުގައި އެޅިފައިވާ ޓަޔަރު ނައްޓާލަދޭ މީހަކަށް އަގު ބޮޑު އިނާމެއްދޭނެކަން ހާމަކޮށްފައެވެ.
މިކިނބޫ ވަނީ ހަ އަހަރު ފަހުން ޓަޔަރުގެ އުނދަގުލުން ސަލާމަތްވެފައެވެ. އަދި ކިނބޫ މިހާރު ވަނީ ކޯރަށް ދޫކޮށްލާފައެވެ.
