ކޮމަންޑޫ ދާއިރާގެ ބައި އިލެކްޝަންގެ ވޯޓް ފޮށިތައް ގުނަނީ
ގިނަ ވޯޓު ފޮށިތައް 4:30ހާއިރު ވަނީ ގުނަން ފަށާފައި
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ވޯޓުލުން
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ވޯޓް ފޮށިތައް ގުނަން ފަށައިފިއެވެ.
ހޮނިހިރު ދުވަހުގެ ހެނދުނު 8:00ގައި ވޯޓުލުން ފަށާފައިވާއިރު، ގިނަ ވޯޓު ފޮށިތައް 4:30ހާއިރު ވަނީ ގުނަން ފަށާފައެވެ.
މިއިންތިޚާބާއި ބެހޭ ގޮތުން އިލެކްޝަން ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވީ, މި އިންތިޚާބަކީ 100 އިންސައްތަ އިންސާފުވެރި އިންތިޚާބެއް ކަމަށެވެ. އަދި ހުރިހާ އިންތިޒާމްތަކެއް ވަރަށް ފުރިހަމައަށް ގޮސްފައިވާއިރު، އިންތިޚާބަށް އަސަރުކުރާފަދަ ޝަކުވާއެއް މިހާތަނަށް ހުށަހަޅާފައިނުވާ ކަމަށެވެ.
އިންތިޚާބުގައި ކަންކަން ހިނގާފައިވާ ގޮތަށް ބަލާއިރު، ށ. ފޯކައިދޫއަށް ފޮނުވާފައިވާ އިލެކްޝަންސް ކޮމިޝަން (އީސީ)ގެ އޮފިޝަލުން އިންތިޚާބަށް ނުފޫޒު ފޯރުވާކަމުގެ ވާހަކަތައް ވަނީ ފެންމަތިވެފައެވެ. މީގެ އިތުރުން މާލޭ ވޯޓު ފޮށި ބަހައްޓާފައި ހުރި އިސްކަންދަރު ސްކޫލް ކުރިމައްޗަށް ގިނަ ބަޔަކު އެއްވެ ހިތްހަމަނުޖެހުން ފާޅުކޮށްފައިވެއެވެ. އެމީހުން އަޑު ގަދަކޮށް، އެއްބަޔަކު އަނެއް ބަޔަކަށް ވަގަށް ގޮވާފައިއެވެ. އަދި ވޯޓު ވިއްކުމަށް މަސައްކަތް ކުރަމުންދާ ކަމަށް ވެސް އެސަރަހައްދުގައި ހަރަކާތްތެރިވާ ބައެއް މީހުން ތުހުމަތުކޮށްފައިވެއެވެ. އަދި ހަމަނުޖެހުން ހިންގަފާނެކަމަށް ބެލެވޭތީ އެސްއޯ ފުލުހުން އެތަނަށް ގޮސް ސްކޫލް ގޭޓް ސަރަހައްދުން މީހުން ދުރަށް ޖައްސާފައިވެއެވެ.
މީގެ އިތުރުން ވޯޓުލުމުގެ ކަންތައްތައް ކޮމަންޑޫގައި ވަރަށް އަމާންކަމާއެކު ކުރިއަށް ގެންގޮސްފައިވެއެވެ.
މި އިންތިޚާބުގައި ވާދަ ކުރަނީ އެމްޑީޕީގެ ފަރާތުން މުހައްމަދު ރާޝިދާއި، ޕީޕީއެމްގެ ފަރާތުން މޫސާ ފަތުހީ އާދަމް އަދި އެމްއެންޕީގެ އަބްދުލްހަންނާނު އިދުރީސްއެވެ.
ކޮމަންޑޫ ދާއިރާގެ ދިރިއުޅޭ 4618 މީހުންގެ ތެރެއިން ވޯޓުލުމުގެ ހައްގު ލިބެނީ 3309 މީހުންނަށެވެ.
