ދެ މުބާރާތް ހިމެނޭ ކިޑްސް ފިއެސްޓާއެއް ކޮމަންޑޫގައި ފަށައިފި
ފިއެސްޓާގައި 76 ކުޅުންތެރިން ކުޅޭނެ
އަކީޑްސް ކިޑްސް ފިއެސްޓާގެ ޓީމްތައް
ދެ މުބާރާތް ހިމެނޭ ކިޑްސް ފިއެސްޓާއެއް ށ. ކޮމަންޑޫގައި ފަށައިފިއެވެ.
އެސޯސިއޭޝަން ފޮރ ކޮމަންޑޫ ޔޫތު ޑިވެލޮޕްމަންޓް (އަކީޑް)އިން އިންތިޒާމްކޮށްގެން މިފިއެސްޓާ ބާއްވަނީ ދެ މުބާރާތެއްގެ ގޮތުގައެވެ. އެއް މުބާރާތް ޚާއްސަކޮށްފައިވަނީ ގްރޭޑް 2-5ގެ ދަރިވަރުންނަށެވެ. ދެވަނަ މުބާރާތުގައި ވާދަކުރާނީ ގްރޭޑް 6-9ގެ ދަރިވަރުން ހިމެނޭ ޓީމްތަކެވެ. ކޮންމެ އުމުރުފުރައެއްގައި ހަތަރު ޓީމް ވާދަކުރެއެވެ. މުބާރާތުގައި ޖުމްލަ 76 ކުޅުންތެރިން ވާދަކުރެއެވެ.
މުބާރާތުގައި ފުރަތަމަ ދެ މެޗުގައި ކުޅުނީ ގްރޭޑް 2-5ގެ ދަރިވަރުން ހިމެނޭ ކެޓަގަރީގެ ދެމެޗެވެ. ފުރަތަމަ މެޗު ބޮޑު އާނު އެފްސީއާ ވާދަކޮށް 5-2ން ކާމިޔާބުކުރީ ފުއްޓަރު އެފްސީއެވެ. މެޗުގެ މޮޅު ކުޅުންތެރިއަކީ ފުއްޓަރު އެފްސީގެ ޝައިމްއެވެ. މެޗުގައި ޝައިމް ހަތަރު ލަނޑު ޖެހިއެވެ.
ދެވަނަ މެޗު މާކިލި އެފްސީއާ ވާދަކޮށް 6-2ން ކާމިޔާބުކުރީ ކަޅުއޮށްފުންމިއެވެ. މެޗުގެ މޮޅު ކުޅުންތެރިއަކީ ހަތަރު ލަނޑުޖެހި އައިކްއެވެ. މުބާރާތް ކުރިއަށްގެންދަނީ ލީގު ބުރެއް ކުޅެ އެއްވަނަ ހޯދާ ޓީމަށް ފައިނަލްގެ ސީދާ ޖާގަ ލިބޭގޮތަށެވެ. ފައިނަލްގެ ދެވަނަ ޖާގަ ލިބޭނީ ދެވަނަ ޓީމާއި ތިންވަނަ ޓީމް ވާދަކޮށް މޮޅުވާ ޓީމަކަށެވެ.
