ކޮމަންޑޫގެ އިހުތިސާސް ތެރޭގައި މަތިކޮމަންޑޫ ހިމަނައިފި

ށ. ކޮމަންޑޫގެ އިހުތިސާސްގެ ތެރޭގައި މަތިކޮމަންޑު އާއި އިތުރު ފަޅުރަށެއް ހިމަނައިފިއެވެ.

މިގޮތަށް ނިންމެވީ ރައީސް އިބްރާހިމް މުހައްމަދު ސާލިހުގެ ގަރާރަކުން ބުރާސްފަތި ދުވަހުއެވެ. މިގަރާރުގައި ރައީސް ވިދާޅުވެފައިވަނީ، އިދާރީ ދާއިރާތަކުގައި ހިމެނޭ ސިޓީ ކައުންސިލާއި ރަށު ކައުންސިލްތަކުގެ އިހުތިސާސް ކަނޑައެޅުމުގެ މަސްއޫލިއްޔަތު ރައީސްއާއި މަތިކޮށްފައިވާތީ، ކޮމަންޑޫގެ އިދާރީ ދާއިރާގެ އިހުތިސާސްގެ ތެރޭގައި އެ ރަށް ކައިރީގައި އޮންނަ ދެ ފަޅުރަށް ކަމަށްވާ މަތިކޮމަންޑު އާއި ކުޑަފަރުފިނޮޅު ހިމަނަން ފެނިވަޑައިގަންނަވާތީ އެގޮތަށް ނިންމަވާފައިވާ ކަމަށެވެ.

ކުޑަފަރުފިނޮޅަކީ ކޮމަންޑޫ ރައްޔިތުން އާންމުކޮށް ޕިކްނިކް ދިއުމަށް ބޭނުން ކުރާ ރަށެކެވެ.

މަތިކޮމަންޑޫގެ ބިން ހިއްކުމުން ކުޑަފަރުފިނޮޅުވެސް ކޮމަންޑޫގެ އިހުތިސާސްގެ ތެރޭގައި ހިމަނައިދިނުމަށް އެރަށުގެ ކައުންސިލުން ވަނީ ރައީސަށް ދަންނަވާފައެވެ.

ބިން ހިއްކައިގެން ކޮމަންޑު އާއި މަތިކޮމަންޑޫ ގުޅާލުމުގެ ބޮޑު މަޝްރޫއު ސަރުކާރުންވަނީ ފަށާފައެވެ. މި މަސައްކަތް އެމްޓީސީސީއާއި ހަވާލުކުރީ މިދިޔަ ޖެނުއަރީ މަހުގެ 12ވަނަ ދުވަހުއެވެ. އެ މަޝްރޫއުގެ ދަށުން މަތިކޮމަންޑޫން 16.7 ހެކްޓަރުގެ ބިން ހިއްކުމަަށްފަހު ކޮމަންޑޫއާއި ގުޅާލުމަށް ހަމަޖެހިފައިވަނީ ބްރިޖަކުންނެވެ. މިއީ ދައުލަތުގެ ބަޖެޓުން 249 މިލިއަނަށް ވުރެ ގިިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެކެވެ. މަސައްކަތް ނިންމުމަށް ހަމަޖެހިފައިވަނީ 2 އަހަރުގެ ތެރޭގައެވެ.