ރައީސް މުއިއްޒު ކޮމަންޑޫ ރައްޔިތުންނަށް: ރިޔާސީ ކެންޕޭންގައި ވައުދުވެވަޑައިގެންނެވި ގޮތަށް މިއަހަރު ވެސް ދެއްވީ އެއަރޕޯޓު ތަރައްގީ ކޮށްދެއްވާނެ ކަމުގެ ޔަގީންކަން

ށ.ކޮމަންޑޫ އެއަރޕޯޓުގެ މަޝްރޫއު ގިނަވަގެން 30 މަސް ދުވަހުގެ ތެރޭގައި ނިންމާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.

އެމަނިކުފާނު މިޔަގީންކަން ދެއްވީ، އަންގާރަ ދުވަހުގެ ރޭ އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ވަނީ، މޯލްޑިވްސް އެއަރޕޯޓްސް ކޮމްޕެނީ ލިމިޓަޑް (އެމްއޭސީއެލް) އާ ހަވާލުކުރައްވައިގެން ކުރިއަށް ގެންދަވާ ބިންހިއްކުމާއި އެއަރޕޯޓް ތަރައްގީކުރުމުގެ ކަންކަން ހިނގަމުންދާނެ ގޮތުގެ ތަފްސީލުތައްވެސް ހިއްސާކުރައްވާފައެވެ.

Advertisement

ކޮމަންޑޫގައި އެއަރޕޯޓް ތަރައްގީ ކުރުމަށް ބޭނުންވާ ބިން ހިއްކުމަށް އަމަލީގޮތުން ކުރަންޖެހޭ މަސައްކަތްތައް ފެށިފައިވާއިރު، އެންމެ ލަސްވެގެން 8 މަސްދުވަހުގެ ތެރޭގައި ބިންހިއްކުމުގެ މަސައްކަތް ނިމޭނެކަމުގެ ޔަގީންކަން ރައީސް މުއިއްޒު ދެއްވިއެވެ. އެމްއޭ.ސީއެލުން ބިންހިއްކުމުގެ މަޝްރޫއުތައް ކުރިއަށްގެންދަނީ، އެރޮނގުން ކުރިއަރާފައިވާ، އެންމެ ފެންވަރު ރަނގަޅު، ބޭރުގެ 2 ކުންފުންޏަކާއެކު ހެދިފައިވާ އެއްބަސްވުންތަކުގެ ދަށުން ކަމަށާ، ގާތްގަނޑަކަށް 11،000 ޓަނުގެ ޑްރެޖަރެއް މިމަސް ނިމޭއިރު ރާއްޖެ ގެނެވޭނެކަމުގައި ރައީސް މުއިއްޒު ވިދާޅުވިއެވެ. އަދި ކުރިއަށް އޮތް ނޮވެމްބަރު މަހުގެ 3 ވަނަ ހަފުތާގެ ތެރޭގައި 40000 ޓަނުގެ ޑްރެޖަރެއް ރާއްޖެ ގެންނާނެ ކަމަށް އެމަނިކުފާނު ވިދާޅުވިއެވެ. އެ ޑްރެޖަރު މަސައްކަތް ކުރާނީ ރަސްމާލޭގައި ކަމަށާ، 3 ވަނަ ޑްރެޖަރު ޑިސެމްބަރު މަހުގެ ތެރޭގައި ގެނަސް، ހއ. ދިއްދޫގެ ޕްރޮޖެކްޓު 3 ހަފުތާއެއްހާ ދުވަހުގެ ތެރޭގައި ނިންމުމަށްފަހު ދެން ފަށާނީ ށ. ކޮމަންޑޫ އެއަރޕޯޓް ތަރައްގީ ކުރުމަށް ބޭނުންވާ ބިންހިއްކުމުގެ މަސައްކަތް ކަމުގައި ވިދާޅުވެ، މަޝްރޫއުގެ ތަފްސީލުތައް، ރައީސް މުއިއްޒު ހިއްސާކުރެއްވިއެވެ.

އެއަރޕޯޓް ތަރައްގީކުރުމުގެ މަޝްރޫ އަކީ ކޮމަންޑޫއަށް އެންމެ މުހިންމު މަޝްރޫއުކަން ފާހަގަކުރައްވައި ރައީސް މުއިއްޒު ވާހަކަފުޅު ދެއްކެވިއިރު، 28 ފެބްރުއަރީ 2024 ގައި ވެސް އެރަށުގެ ރައްޔިތުންނާ ބައްދަލުކުރައްވައި އެމަނިކުފާނު ވަނީ އެއަރޕޯޓު އަޅައިދޭނެ ޔަގީންކަން ދެއްވާފައެވެ. މި ބައްދަލުކުރެއްވުމުގައި، 2024 ވަނަ އަހަރުގެ ތެރޭގައި، ބޮޑެތި ހުރިހާ ކަމެއް ނިންމައިދީ، ދެންހުރި ކަންކަންވެސް 2025 ވަނަ އަހަރުގެ ތެރޭގައި ނިންމައިދޭނެ ކަމަށް ވިދާޅުވިއެވެ.

ނަމަވެސް 2024 ވަނަ އަހަރު ނިމި، 2025 ވަނަ އަހަރު ނިމެންދާއިރު، އެރަށުގައި ތަރައްގީގެ ބޮޑު އެއްވެސް މަޝްރޫއެއްގެ އަމަލީ މަސައްކަތް ފެށިފައިނުވެއެވެ.

މިއަހަރު ވެސް ވައުދުފުޅުތައް ތަކުރާރުކުރައްވައި ރައީސް މުއިއްޒު ވިދާޅުވީ، ރަށުގެ ބޯހިޔާވަހިކަމުގެ މައްސަލައަށް ހައްލު ހޯއްދަވައިދެއްވުމުގެ ގޮތުން، 2026 ވަނަ އަހަރު ކޮމަންޑޫގައި 50 ހައުސިންގް ޔުނިޓް ތަރައްގީ ކޮށްދެއްވާނެ ކަމަށެވެ. އަދި، އަންނަ އަހަރުގެ ކުރީކޮޅު، މި މަޝްރޫއުގެ އަމަލީ މަސައްކަތް ފެށޭނެ ކަމުގެ ޔަގީންކަން ވެސް އެމަނިކުފާނު ވަނީ ދެއްވާފައެވެ.

2026 ވަނަ އަހަރުގެ ބަޖެޓުގައި ހިމަނުއްވައިގެން ރަށުގެ ސްކޫލުގެ މަރާމާތުގެ މަސައްކަތްތައް ކުރިއަށްގެންގޮސްދެއްވާނެ ކަމަށާ، ހަމައެއާއެކު އަހަރުގެ ކުރީކޮޅު، އިންޑޯ ސްޕޯޓްސް ކޮމްޕްލެކްސް އެއް ތަރައްގީކުރުމުގެ އަމަލީ މަސައްކަތްތައް ފެށޭނެކަމުގެ ޔަގީންކަން ރައީސް މުއިއްޒު ދެއްވިއެވެ.

މީގެއިތުރުން ރައީސް މުއިއްޒު ވަނީ، 2025 ވަނަ އަހަރު ނިމުމުގެ ކުރިން ކޮމަންޑޫގައި ޑައެލަސިސް ޚިދުމަތް ގާއިމު ކޮށްދެއްވާނެ ކަމުގައި ވިދާޅުވެފައެވެ.

ހުއްޓިފައިވާ ފެނާއި ނަރުދަމާގެ މަސައްކަތްތައް ނިންމަވައިދެއްވައި، އެނޫންވެސް އެކި ދާއިރާތަކުން ރަށަށް ބޭނުންވާ މުހިންމު ތަރައްގީ ހޯއްދަވައި ދެއްވާނެ ކަމުގައި ރައީސް މުއިއްޒު ވިދާޅުވިއެވެ. އަދި ކުރިމަތިވާ މައްސަލަތަކަށް ހައްލު ހޯއްދަވައިގެން، އެމަނިކުފާނު ވެވަޑައިގެންފައިވާ ވައުދުތައް ހަގީގަތަކަށް ހައްދަވައިދެއްވައި، ރައްޔިތުންނާ ހިސާބަށް އެކަންކަން ގެނެސް ދެއްވޭނެ ކަމުގެ ޔަގީންކަން އެމަނިކުފާނު ވަނީ ތަކުރާރުކޮށްދެއްވާފައެވެ.