އަކީޑް ފުޓްސަލް ފިއެސްޓާގެ ޗެމްޕިއަންކަން ބާރަނައާއި ކަޅުއޮށްފުންމިއަށް

ށ.ކޮމަންޑޫ އަކީޑް ޖަމްއިއްޔާއިން އެރަށުގައި ކުރިއަށްގެންދިޔަ "އަކީޑް ކިޑްސް ފުޓްސަލް ފިއެސްޓާ" ގެ ޗެމްޕިއަންކަން ކަޅުއޮށްފުންމި އާއި އެފްސީ ބާރަނަ ހޯދައިފިއެވެ.

ފިއެސްޓާގެ ގްރޭޑް 2-5 ގެ ދަރިވަރުންނަށް އަމާޒުކުރި ކެޓގަރީން ޗެމްޕިއަންކަން ހޯދީ ކަޅުއޮށްފުންމިއެވެ. އެޓީމް ޗެމްޕިއަންކަން ހޯދީ ފައިނަލް މެޗުގެ ފުރިހަމަ ވަގުތު ހަމަވިއިރު ދެޓީމް 2-2 ން އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި 7-6 ން ކުރިހޯދައިގެންނެވެ. ފައިނަލް މެޗުގެ މޮޅު ކުޅުންތެރިއަކީ ކަޅުއޮށްފުންމި ޓީމްގެ ލޫކް ޝަމީމްއެވެ. އެންމެގިނަ ލަނޑު ޖަހައިގެން ދެ ކުޅުންތެރިއަކު ރަންބޫޓް ޙިއްޞާކުރިއެވެ. އެއީ މާކިލި ޓީމްގެ ރާކިން އަހުމަދު ފަހުމީއާއި, ފުއްޓަރު ޓީމްގެ ޝައިމް ޝަރީފްއެވެ. މިކެޓަގަރީގެ އެންމެ މޮޅު ފަސް ކުޅުންތެރިންނަކީ ފުއްޓަރުގެ ޓީމްގެ ޝައިމް ޝަރީފް, ކަޅުއޮށްފުންމިގެ އަބުދުالله އައިކް, ލޫކް ޝަމީމް, އަޒީން އިބްރާހީމް އަދި މާކިލި ޓީމްގެ ރާކިން އަހުމަދު ފަހުމީއެވެ. މިކެޓަގަރީގެ އެންމެ މޮޅު ކުޅުންތެރިއަކީ މާކިލި ޓީމްގެ ރާކިން އަހުމަދު ފަހުމީއެވެ.

ފިއެސްޓާގައި ހިމެނޭ ގްރޭޑް 6-9 ގެދަރިވަރުންގެ ކެޓަގަރީގެ ޗެމްޕިއަންކަން އެފްސީ ބާރަނަ ހޯދީ ފައިނަލްގައި 2-0 ން އެފްސީ ނާގަބާޑި ބަލިކޮށްގެންނެވެ. ފައިނަލް މެޗުގެ މޮޅު ކުޅުންތެރިއަކީ ބާރަނަ ޓީމްގެ މުޙައްމަދު ޝުނާން އިސްމާއީލްއެވެ. މުބާރާތުގެ އެންމެ މޮޅު ކުޅުންތެރިއަކީވެސް އޭނާއެވެ. މީގެއިތުރުން އެންމެ މޮޅު ފަސް ކުޅުންތެރިންގެ ތެރޭގައިވެސް ޝުނާން ހިމެނެއެވެ. އެންމެ މޮޅު ފަސް ކުޅުންތެރިންގެ ތެރޭގައި ދެން ހިމެނެނީ ކިލާވަޅު ޓީމްގެ އަރީން އަރީފް, ނާގަބާޑި ޓީމްގެ އާޚިލް އަޙުމަދު, ހާއިޝް އަބުދުލްމާލިކް, އަދި ބާރަނަ ޓީމްގެ ޙުސައިން ނަޖާހުއެވެ.

މުބާރާތުގެ ކޮންމެ ކެޓަގަރީއެއްގައި ހަތަރު ޓީމް ވާދަކުރިއެވެ. ޖުމްލަ 76 ކުޅުންތެރިން 8 ޓީމްގައި ހިމެނިގެން ފިއެސްޓާގައި ކުޅުނެވެ.