ކޮމަންޑޫ އަކީޑް ކިޑްސް ފިއެސްޓާގެ ފައިނަލްގައި ވާދަކުރާނެ ޓީމްތައް ޔަގީންވެއްޖެ

ށ. ކޮމަންޑޫ އަކީޑް ޖަމްއިއްޔާއިން އެރަށުގައި ކުރިއަށްގެންދާ "އަކީޑް ކިޑްސް ފުޓްސަލް ފިއެސްޓާ"ގެ ފައިނަލްގައި ވާދަކުރާނެ ޓީމްތައް ޔަގީންވެއްޖެއެވެ.

ދެ ކެޓަގަރީއަށް ކުރިއަށްގެންދާ މުބާރާތުގެ ގްރޭޑް 2-5ގެ ދަރިވަރުންގެ މެދުގައި ކުރިއަށްގެންދާ މުބާރާތުގެ ފައިނަލުން ޖާގަ ހޯދީ މާކިލިއާއި ކަޅުއޮށްފުންމިއެވެ. ކަޅުއޮށްފުންމި ފައިނަލުން ޖާގަ ހޯދީ ލީގުބުރުން އެއްވަނަ ހޯދައިގެންނެވެ. ފައިނަލްގެ ސީދާ ޖާގަ ކަޅުއޮށްފުންމި ކަށަވަރުކުރީ، ލީގުބުރުގައި ކުޅުނު ތިން މެޗުން 6 ޕޮއިންޓް ހޯދައިގެންނެވެ. އެޓީމަށް ކުރި ލިބުނީ ފައިދާ ގޯލުންނެވެ. މާކިލި ފައިނަލުން ޖާގަ ހޯދީ ސެމީފައިނަލްގައި 4-3ން ފުއްޓަރު ބަލިކޮށްގެންނެވެ.

ގްރޭޑް 6-9ގެ ދަރިވަނުންގެ އަމާޒުކުރި ކެޓަގަރީން ފައިނަލުން ޖާގަހޯދީ ބާރަނައާއި, ނާގަބާޑިއެވެ. ބާރަނަ ފައިނަލުން ޖާގަހޯދީ ލީގު ބުރުގައި ކުޅުނު ތިން މެޗުން 7 ޕޮއިންޓް ހޯދައިގެން އެއްވަނަ ޓީމްގެ ގޮތުގައެވެ. ނާގަބާޑި ފައިނަލުން ޖާގަހޯދީ ދެވަނަ ޓީމާއި ތިންވަނަ ޓީމްގެ މެދުގައި ކުޅުނު ސެމީފައިނަލް މެޗުގައި 4-3ން ކިލާވަޅު ބަލިކޮށްގެންނެވެ.

ފިއެސްޓާގެ ފައިނަލް މެޗުތައް ކުޅޭނީ އީދުދުވަހުގެރެއެވެ. މުބާރާތުގައި ކޮމަންޑޫގައި ގްރޭޑް 2ން ފެށިގެން 9ގައި ތައުލީމް ހާސިލްކުރަމުންދާ 76 ދަރިވަރުން ވާދަކުރެއެވެ. ކޮންމެ ކެޓަގަރީއެއްގައި ހަތަރު ޓީމް ވާދަކުރެއެވެ.