ކޮވިޑާއި ގުޅިގެން އެމެރިކާއިން ދަތުރުކުރުމުގައި ސަމާލުވުމަށް އެކުލަވާލި ލިސްޓުގައި 130 ޤައުމެއް
ޑިސެމްބަރު މަހުގެ މެދެއްހާ ހިސާބުން ފެށިގެން މިހާތަނަށް 60 ޤައުމަކާއި ސަރަހައްދެއް އެޤައުމުގެ ރައްޔިތުން ދަތުރުނުކުރުމަށް އެކުލަވާލާފައިވާ ލިސްޓުގައި ހިމަނާފައިވޭ
އެމެރިކާގެ ކޮލޮރާޑޯ އެއަރޕޯޓް
ކޮވިޑް-19ގެ ހާލަތާއި ގުޅިގެން ދަތުރުކުރުމުގައި ސަމާލުވުމަށް އެމެރިކާއިން އެކުލަވާލާފައިވާ ލިސްޓުގައި 130 ޤައުމަކާއި ސަރަހައްދެއް ހިމަނައިފިއެވެ.
އެމެރިކާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އިން އެންމެފަހުން މިލިސްޓަށް އިތުރުކުރި ޤައުމުތަކުގެ ތެރޭގައި ކޮވިޑްގެ ކޭސްތައް މިހާރު ރިކޯޑް މިންވަރަކަށް ފެންނަމުންދާ މެކްސިކޯ، ބްރެޒިލް، ސިންގަޕޫރު، އިކުއެޑޯ، ފިލިޕީންސް އަދި ޕެރެގުއޭ ވަނީ ހިމެނާފައެވެ.
ސީޑީސީން މިޤައުމުތައް ގިންތިކޮށްފައިވަނީ ލެވެލް 4 ގައެވެ. މާނައަކީ އެޤައުމުތަކަށް ދަތުރުނުކުރާށެވެ. ޑިސެމްބަރުމަހުގެ މެދެއްހާ ހިސާބުން ފެށިގެން މިހާތަނަށް އެމެރިކާ ސަރުކާރުން 60 ޤައުމަކާއި ސަރަހައްދެއް އެޤައުމުގެ ރައްޔިތުން ދަތުރުނުކުރުމަށް އެކުލަވާލާފައިވާ ލިސްޓުގައި ހިމަނާފައިވެއެވެ. މިޤައުމުތަކަށް ދަތުރުނުކުރުމަށް އިލްތިމާސްކޮށްފައިވާ މައިގަނޑު ސަބަބަކީ އޮމިކްރޯން ވޭރިއަންޓެވެ.
ސީޑީސީން ވަނީ ލެވެލް ތިނެއްގައި 11 ޤައުމަކާއި ސަރަހައްދެއް ހިމަނާފައެވެ. އެއީ ކޭސްތައް މަތި ޤައުމުތަކެވެ. އެޤައުމުތަކަށް ވެކްސިން ނުޖަހާ ތިބި އެމެރިކާ ރައްޔިތުން ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް ވަނީ އިލްތިމާސްކޮށްފައެވެ. އޭގެތެރޭގައި ހިމެނެނީ ބޫޓާން، ބުރޫނާއީ، ނޭޕާލް، އޮމާން ފަދަ ޤައުމުތަކެވެ.
ސީޑީސީން ލެވެލް 2 ގައި 16 ޤައުމެއް ހިމަނާފައިވެއެވެ. މާނައަކީ އެޤައުމުތަކުގެ ހާލަތު ހުރީ މެދުމިންވަރެއްގައެވެ. އަދި ލެވެލް 1 ނުވަތަ އެންމެ ދަށް ލެވެލްގައި 40 ސަރަހައްދެއް ހިމަނާފައިވެއެވެ.
އެމެރިކާއިން ވަނީ މިދިޔަ މަހު އެފްރިކާގެ 8 ޤައުމަކަށް ދަތުރުކުރުން މަނާކުރުމަށް ނޮވެމްބަރުމަހު ނިންމި ނިންމުމަށް ބަދަލު ގެނެސް އެޤައުމުތަކަށް ދަތުރުކުރުމުގެ ހުއްދަ ދީފައެވެ.
