ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައާއި ގުޅިގެން ރިޝްވަތު ދިނުމުގެ ކުށުގެ ދައުވާ އުފުލާފައިވާ ވ. ފެލިދޫ ހަނދުވަރީގެ ޔޫސުފް ނައީމު އަޑުއެހުމަށް ހާޒިރުވެފައެއް ނުވެއެވެ. އޭނާ ކޮވިޑް-19 އަށް ޕޮޒިޓިވްވެފައިވާކަން ކޯޓަށް ވަނީ އަންގާފައެވެ.

މި އަޑުއެހުން ފެށުމާއެކު ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ ޖަމީލް ވަނީ 4 ނުކުތާއެއް ޝަރީއަތުގެ ސަމާލުކަމަށް ގެނެސްފައެވެ.

ޝަރީއަތް ލައިވް ކުރުމާބެހޭ ގޮތުން އެންމެ ފަހުން ބޭއްވިއަޑުއެހުމުގައިރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ ހުށައެޅުމެއް ހުށައަޅުއްވާފައެވެ. އެކަމާ ގުޅޭގޮތުން ބުރާސްފަތި ދުވަހުގެ އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލާ ވިދާޅުވީ، ދައުލަތުގެ ސްޓޭންޑަކީ ކޮރަޕްޝަންގެ ހުރިހާ މައްސަލައެއްގެ ޝަރީއަތްވެސް ލައިވްކޮށްގެން ކުރިއަށް ގެންދިއުން ކަމަށެވެ.

އޭގެ އިތުރުން، މަހުލޫފުގެ ޝަރީއަތް ވަކި ގޮތަކަށް ކުރިއަށް ގެންދިއުމަށް ކޯޓުން ނިންމާފައިވާކަމަށް ދެކެވޭ ވާހަކައާއި ގުޅިގެން ދިފާއުން ބުރާސްފަތި ދުވަހުގެ އަޑުއެހުމުގައި ނެގިނުކުތާގައިދައުލަތުން ބުނީ، ދައުލަތުން އެކަމުގައި ދެކޭ ގޮތަކީ ޖިނާއީ އިޖުރާއަތުގެ ޤާނޫނަށް ގެނެސްފައިވާ އިސްލާޙުގެ ދަށުން ހުރިހާ މައްސަލައެއްވެސް ކޮވިޑުގެ ޙާލަތުގައި މެދުކެނޑުމެއް ނެތި ކުރިއަށް ގެންދެވެންޖެހޭނެކަން ކަމަށެވެ. އަދި ޔޫސުފް ނައީމާއި ރައީސް ޔާމީނުގެ މައްސަލަ އެއްކޮށް ކުރިއަށް ގެންދަން ބޭނުންވާކަަމަށް ދިފާއުން ނެގި ނުކުތާގައި ދައުލަތުންވެސް ދެކެނީ އެގޮތަށެވެ. އެގޮތުން ދައުލަތުގެ ވަކީލާ ވިދާޅުވީ، އިބްތިދާއީ މަރުޙަލާ ވަކިން ގެންދިޔަނަމަވެސް، މި މައްސަލައިގެ ޝަރީއަތް ކުރިއަށް ގެންދަން ދައުލަތުން ބޭނުންވަނީ އެކުއެކީގައި ކަމަށެވެ.

ދިފާއުން ފާހަގަކުރި ކަންކަމަށް ޝަރީއަތުންވެސް ވަނީ ޖަވާބު ދެއްވާފައެވެ. އެގޮތުން ޝަރީއަތް ލައިވް ނުކުރެވެނީ މިވަގުތު ކޯޓުގެ އިދާރީ އިންތިޒާމުތައް ހުރި ގޮތުގެ ސަބަބުން އެކަމުގައި ދަތިތަކެއް ހުރުމުންކަމަށް ގާޒީ އަހުމަދު ޝަކީލް ވިދާޅުވިއެވެ. ނަމަވެސް އެ އިންތިޒާމުތައް ހަމަޖެހުނުހާ އަވަހަށް މައްސަލަ ލައިވްކޮށްގެން ކުރިއަށް ގެންދިއުމަށް ހުރަހެއް ނެތްކަންވެސް ގާޒީ ވިދާޅުވިއެވެ.

މަހުލޫފުގެ މައްސަލައާ ގުޅިގެން ގާޒީގެސްޓޭންޑްސާފެވެ. އެގޮތުން މަހުލޫފްގެ މައްޗަށް އުފުލާފައިވާ ދައުވާގެ ޝަރީޢަތް ވަކި ގޮތަކަށް ކުރިއަށް ގެންދިއުމަށް ކްރިމިނަލް ކޯޓުގެ ގާޒީންގެ މަޖިލީހުން ނިންމާފައިނުވާނެކަމަށް ގާޒީ ވިދާޅުވެއެވެ.

އޭގެ އިތުރުން، ޝަރީއަތުގެ އަމާޒު ހުރި ގޮތާއި ދޭތެރޭގައި ކަންބޮޑުވެލައްވާކަން ފާހަގަކޮށް ދިފާއުން ނެގި ނުކުތާއަށްވެސް ގާޒީ ވަނީ ޖަވާބުދެއްވާފައެވެ. އެގޮތުން ކުރިއަށް އޮތް ރޯދަ މަހަށް ހަނދުބަލާއިރު ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހުންނަވާނީ ޖަލުގައި ކަމަށް އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވިދާޅުވެފައިވާކަން ފާހަގަ ކުރައްވައި ޔާމީންގެ ވަކީލުން ވަނީ އެއީ ޝަރީއަތަށް ނުފޫޒު ފޯރުވުންކަމަށް ވިދާޅުވެފައެވެ. އަދި އެއީ ކޯޓުގެ ޙުރުމަތް ކެނޑުންކަމަށް ވަކީލުން ވަނީ ސިފަ ކުރައްވާފައެވެ.

އެކަމާ ގުޅޭގޮތުން ގާޒީ ވިދާޅުވީ، ހުރިހާ މައްސަލައެއްވެސް ކޯޓުން ކުރިއަށް ގެންދާނީ ވަކި ފަރާތަކަށް ނުޖެހި، ހަމަހަމަކަމާއެކު ކަމަށެވެ. އަދި ކޯޓުން މައްސަލަތައް ކުރިއަށް ގެންދިއުމުގައި އެއްވެސް ފަރާތެއްގެ ބިރަކަށް، ނުފޫޒަކަށް ނުބައްލަވާނެ ކަމަށް ގާޒީ ވިދާޅުވިއެވެ.

އޭގެ އިތުރުން، މި މައްސަލައިގެ އިބްތިދާއީ މަރުޙަލާއާއި ޝަރީއަތުގެ މަރުޙަލާވެސް ކުރިއަށް ގެންދަން ބޭނުންވަނީ އެކުއެކީގައިކަން ގާޒީވެސް ފާހަގަ ކުރެއްވިއެވެ. ނަމަވެސް ޔޫސުފް ނައީމް ޕޮޒިޓިވްވެފައިވާތީ އޭނާއަށް ދައުވާ އިއްވުމަށް ވަކި އަޑުއެހުމެއް ވަނީ ތާވަލުކޮށްފައެވެ.

މި އަޑުއެހުމުގައި ދައުލަތުން ވަނީ ޔާމީނުގެ މައްޗަށް ކުރާ 2 ދައުވާ އިއްވާފައެވެ. ނަމަވެސް ޔާމީނުގެ ޤާނޫނީ ވަކީލުންގެ ޓީމުގެ ބައެއް މެމްބަރުން ކޮވިޑުގެ ސަބަބުން އަޑުއެހުމުގައި ބައިވެރިނުވެވޭ ކަމާއި، ދައުވާއަށް ޖަވާބުދާރީވުމަށް ވަގުތު ބޭނުންވާކަން ފާހަގަކޮށްފައިވާތީ ދައުވާއަށް ޖަވާބުދާރީވުމުގެ ބައި ކުރިއަށް ގެންދަވާފައެއް ނުވެއެވެ. އަދި ވަކީލުންގެ ޓީމު އެއްކޮށް ނެތުމުގެ ސަބަބުން ދައުވާ ސާފުނުވާކަމަށް ރައީސް ޔާމީނުވެސް ވިދާޅުވެފައިވާތީ ގާޒީވެސް ނިންމެވީ މައްސަލައަށް ޖަވާބުދާރީވުމަށް އެކަށީގެންވާ ވަގުތާއި ފުރުސަތު ދެއްވާނެ ކަމަށެވެ.

ދެން އޮންނަ އަޑުއެހުމުގައި ދައުވާ ސާފު ކުރުމާއި، ޖަވާބުދާރީވުން އޮންނާނެކަމަށް ގާޒީ ވިދާޅުވިއެވެ.

ގާޒީ ވަނީ މި މައްސަލަ ކުރިއަށްދާނެ ގޮތުގެތާވަލެއްވެސްދެފަރާތަށް ހިއްސާ ކުރައްވާފައެވެ.