އާރަށް މައްސަލައިގައި ޔާމީނަށް ކުރާ ދައުވާގެ އަޑުއެހުމެއް ބުރާސްފަތި ދުވަހު
އަޑުއެހުން ތާވަލުކޮށްފައިވަނީ ހެނދުނު 9:30ށް
ކުރީގެ ރައީސް އަބްދުﷲ ޔާމީން
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ތާވަލުކޮށްފިއެވެ.
ރައީސް ޔާމީންގެ ޝަރީއަތް ބުރާސްފަތި ދުވަހަށް ތާވަލުކޮށްފައިވަނީ ހެނދުނު 9:30އަށެވެ. ޕީޖީ އޮފީހުން ބުނެފައިވަނީ މއ. ކާމިނީހުޅަނގުގެ އަބްދުﷲ ޔާމީން އަބްދުލްގައްޔޫމާއި ވ. ފެލިދޫ ހަނދުވަރީގެ ޔޫސުފް ނައީމް، މިނިސްޓްރީ އޮފް ޓުއަރިޒަމްއާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްގީ ކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން, އޭރުގެ ރައީސުލްޖުމްހޫރިއްޔާ މަގާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާ ކަމަށް ތުޙުމަތުކުރެވޭ ކަމަށެވެ.
ރިސޯޓެއްގެ ގޮތުގައި ތަރައްގީކުރުމަށް ވ. އާރަށް ބޭރުގެ ބަޔަކަށް ވިއްކައިގެން ލިބުނު ފައިސާ، ރައީސް ޔާމީނުގެ އަމިއްލަފުޅު އެކައުންޓަކަށް ޖަމާކުރައްވާފައިވާ ކަމަށް ބުނާ މައްސަލައެއްގައި ދައުވާ ކޮށްދިނުމަށް އެދި އެ މައްސަލަ ޕީޖީއަށް ފޮނުވާފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައެވެ. އާރަށުގެ އަގުގެ ގޮތުގައި ލިބުނު 1 މިލިއަން ޑޮލަރު އަމިއްލަފުޅު އެކައުންޓަކަށް ޖަމާކުރައްވާފައިވާ ކަަމަށް ތަހުގީގު ރިޕޯޓުގައިވެއެވެ.
ވ. ތިނަދޫ ކައިރީގައި އޮތް އާރަށަކީ ޕިކްނިކް ދާ ކުޑަރަށެކެވެ. އެ ރަށަކީ ޑީއާރްޕީގެ ކުރީގެ ލީޑަރު އަހުމަދު ތަސްމީން އަލީގެ ހިއްސާ އޮންނަ ކުންފުންޏަކަށް ކުރިން ދީފައި އޮތް ރަށެކެވެ. އޮގަސްޓް 2015ގައި ތަސްމީންގެ އަތުން އެރަށް އަތުލައި، ހަމަ އެ އަހަރުގެ ސެޕްޓެމްބަރު މަހު އެ ރަށް ހަވާލުކޮށްފައިވަނީ ވ. ފެލިދޫ ދާއިރާގެ ކުރީގެ މެމްބަރު ޔޫސުފް ނައީމާއެވެ.
އާރަށް މައްސަލާގައި ޔާމީންގެ މައްޗަށް އުފުލާފައިވަނީ މަނީލޯންޑަރިންގެ ދައުވާއާއި ރިޝްވަތު ގަބޫލުކުރުމުގެ ދައުވާއެވެ. އަދި ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވަނީ ރިޝްވަތު ދިނުމުގެ ދައުވާ އުފުލާފައެވެ.
އެންމެ ފަހުން ބޭއްވި މި މައްސަލައިގެ އަޑުއެހުން ފެށުމާއެކު ރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ މި މައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިއުމަށް އެދިފައެވެ. އެގޮތުން އިންސާފުވެރިކަމާއި ހަމަހަމަކަމާއެކު ޝަރީއަތްތައް ކުރިއަށް ގެންދަންޖެހޭނެކަމަށް ގާނޫނުއަސާސީގެ 42 ވަނަ މާއްދާގައި ބަޔާންކޮށްފައިވާއިރު، ހާމަކަން ބޮޑު ގޮތެއްގައި ޝަރީއަތްތައް ކުރިއަށް ގެންދިއުން އޭގެ ތެރޭގައި ހިމެނޭކަމަށް ރައީސް ޔާމީނުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުހައްމަދު ޖަމީލް އަހުމަދު ވިދާޅުވިއެވެ.
ޝަރީއަތްތައް ލައިވް ކުރުމަށް ދައުލަތުންވެސް އިއުތިރާޒް ނުކުރާކަމަށް ދައުލަތުގެ ވަކީލާ ވިދާޅުވެއެވެ. އަދި ސުޕްރީމް ކޯޓުގައިވެސް ކޮންމެހެން އާންމުކޮށް ހުޅުވާނުލައި ކުރިއަށް ގެންދަންޖެހޭ އަޑުއެހުންތައް ފިޔަވައި ދެން ހުރި އަޑުއެހުންތައް ކުރިއަށްގެންދަނީ ލައިވްކޮށްގެންކަން ފާހަގަކުރައްވައި ދައުލަތުގެ ވަކީލާ ވަނީ، ދައުލަތުން އަޑުއެހުންތައް ލައިވް ކުރުމަށް ކުރިންވެސް އެދިފައިވާނެކަން ބަޔާން ކުރައްވާފައެވެ.
މި މައްސަލައާ ގުޅިގެން, ރިޝްވަތު ދިނުމުގެ ކުށުގެ ދައުވާ އުފުލާފައިވާ ވ. ފެލިދޫ ހަނދުވަރީގެ ޔޫސުފް ނައީމު ވަނީ ޝަރީއަތްތައް ލައިވްކޮށްގެން ކުރިއަށް ގެންދިއުމަށް އިއުތިރާޒު ކުރައްވާފައެވެ. އޭނާގެ ވަކީލު ވިދާޅުވީ، ލައިވްކޮށް މި މައްސަލައިގެ އަޑުއެހުން ކުރިއަށް ގެންދަވާނަމަ، ޔޫސުފު ނައީމްގެ ބައި ވަކިން ކުރިއަށް ގެންދެވުމަށް އެދޭ ކަމަށެވެ.
އެކަމާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަހުމަދު ޝަކީލް ވިދާޅުވީ، މި މައްސަލައިގެ އަޑުއެހުންތައް ލައިވް ކުރުމާމެދު ނިންމަވާ ގޮތެއް ޖެނުއަރީ މަހުގެ 20 ވަނަ ދުވަހުގެ ކުރިން ދެފަރާތަށްވެސް އަންގަވާނެ ކަމަށެވެ.
