ކުލަބަކާ ގުޅެންދެން ފިޓްނަސް ރަނގަޅު ފެންވަރެއްގައި ބެހެއްޓުމުގެ ބޭނުމުގައި ޑެންމާކުގެ މިޑްފީލްޑަރު ކްރިސްޓިއަން އެރިކްސަން އޭނާގެ ކުރީގެ ޓީމު އަޔަކްސްގެ ފަރިތަކުރުންތަކަށް ނުކުމެއްޖެއެވެ.

މިދިޔަ އަހަރުގެ ޔޫރޯ ފުޓްބޯޅަ މުބާރާތުގައި ޑެންމާކުން ކުޅުނު ފުރަތަމަ މެޗުގައި އުމުރުން 29 އަހަރުގެ އެރިކްސަން ހިތް ހުއްޓިގެން ދަނޑު މައްޗަށް ވެއްޓުނެވެ. އެއާއެކު ދަނޑު މަތީގައި އެތައް އިރެއް ވަންދެން އެރިކްސަނަށް ފަރުވާދިންއިރު، އޭނާ ވަނީ ފަހުން ހޮސްޕިޓަލަށް ގެންގޮސް އޮޕަރޭޝަނެއް ކޮށްފައެވެ. އެ އޮޕަރޭޝަނަކީ އެރިކްސަނުގެ ހިތަށް އިމްޕްލާންޓަބަލް ކާޑިއޮވާޓާ ޑެފިބްރިލޭޓާ (އައިސީޑީ) އެއް ލެއްވުމަށް ކުރި އޮޕަރޭޝަނެކެވެ.

އެކަމަކު އައިސީޑީ ލައްވައިގެން ހުރެ އިޓަލީގައި ޕްރޮފެޝަނަލް ފުޓްބޯޅަ ކުޅުމަކީ މަނާ ކަމެކެވެ. އެހެންކަމުން އައިސީޑީ ނުލައްވައި އެރިކްސަނަށް އިޓާލިއަން ލީގުގައި ކުޅެވޭތޯ ބަލަން ޓެސްޓުތަކެއް ހެދި ނަމަވެސް، މި ވަގުތުގެ ސިއްހީ ހާލަތު ހުރި ގޮތުން އޭނާއަށް މި ސީޒަނުގެ އިޓާލިއަން ލީގުގައި ނުކުޅެވޭނެ އިންޓައިން ވަނީ ބުނެފައެވެ. އެހެންކަމުން ހުރިހާ ބައެއްގެ މަޝްވަރާގެ މަތިން އެރިކްސަންގެ އެއްބަސްވުން އިންޓައިން މިހާރު ވަނީ އުވާލާފައެވެ.

ޕްރޮފެޝަަނަލް ފުޓްބޯޅައިން ކުރިއަށްދާން ނިންމައި އެރިކްސަން މީގެ ކުރިން ވަނީ ޒުވާން އުމުރު އޭނާ އެންމެ ފުރަތަމަ ކުޅުނު ކުލަބު ކަމަށްވާ ޑެންމާކުގެ އޮޑެންސީ ބޯލްޑްކްލުބް (އޯބީ) ގެ ފަރިތަކުރުންތަކުގައި ބައިވެރިވެފައެވެ. އަދި ދާދި ފަހުން އެރިކްސަން ވަނީ އޭނާ ސީނިއާ ކެރިއަރު ފެށި ކުލަބު ކަމަށްވާ އަޔަކްސްގެ ފަރިތަކުރުންތަކުގައި ބައިވެރިވާން ފަށާފައެވެ.

ޕްރޮފެޝަަނަލް ފުޓްބޯޅައިން ކުރިއަށްދާން އެރިކްސަން ނިންމާފައިވާއިރު، އަޔަކްސްއާ ގުޅެން އޭނާ ބޭނުންވާ ކަމަށް މީގެ ކުރިން ބައެއް މީޑިއާތަކުން ރިޕޯޓުކުރިއެވެ. އެކަމަކު އިނގިރޭސި މީޑިއާ ރިޕޯޓުތައް ބުނާ ގޮތުން އެރިކްސަން ހޯދަން އިނގިރޭސި ކުލަބު ބްރެންޓްފޯޑުން އަންނަނީ މަސައްކަތްކުރަމުންނެވެ. އެގޮތުން ބްރެންޓްފޯޑުން އެރިކްސަނަށް ހަ މަސް ދުވަހުގެ އެއްބަސްވުމެއް ހުށަހަޅާފައިވާއިރު، އެ މުއްދަތުގެ ތެރޭގައި އެރިކްސަންގެ ފަރާތުން ރަނގަޅު ކުޅުމެއް ފެނިއްޖެނަމަ، އިތުރު އެއް އަހަރަށް އެއްބަސްވުން އާކުރާ ގޮތަށް ހަމަޖެހިފައިވާ ކަމަށްވެސް ރިޕޯޓުތައް ބުނެއެވެ.

އެރިކްސަން ހޯދަން ބްރެންޓްފޯޑުން މަސައްކަތްކުރަމުން އަންނައިރު، އޭނާ ވިދާލާފައިވަނީ އިނގިރޭސި ކުލަބު ޓޮޓެންހަމް ހޮޓްސްޕާއިންނެވެ. ޓޮޓެންހަމް ދޫކޮށް 2020 ވަނަ އަހަރުގެ ޖެނުއަރީ މަހު 16.9 މިލިޔަން ޕައުންޑަށް އެރިކްސަން އިންޓައަށް ބަދަލުވި ނަމަވެސް، އެ ޓީމުގައި އެރިކްސަނަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.