ހިލޭ ޓްރާންސްފާއެއްގައި އެރިކްސަން ޔުނައިޓެޑަށް ބަދަލުވެއްޖެ

ޑެންމާކުގެ މިޑްފީލްޑަރު ކްރިސްޓިއަން އެރިކްސަން މެންޗެސްޓަރ ޔުނައިޓެޑަށް ސޮއިކޮށްފިއެވެ.

އޭނާ ޔުނައިޓެޑަށް ބަދަލުވީ ހިލޭ ޓްރާންސްފާއެއްގައެވެ. އެ ޓީމާ އޭނާ ގުޅުނީ އެންމެ ފަހުން ކުޅުނު ކުލަބް ބްރެންޓްފޯޑް އާއިއެކު ހަދާފައިވާ އެއްބަސްވުމުގެ މުއްދަތު ހަމަވުމުންނެވެ.

އެރިކްސަން ޔުނައިޓެޑަށް ބަދަލުވީ ތިން އަހަރު ދުވަހުގެ އެއްބަަސްވުމެއްގެ ދަށުންނެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ޓީމުގައި މަޑުކުރާނެއެވެ. މީގެ ކުރިން އެރިކްސަން ވަނީ ގިނަ ދުވަސްތަކެއް ވަންދެން ފުޓުބޯޅަ ކުޅުމާއި ދުރުގައި ހުރެފައެވެ. އެއީ އެންމެ ފަހުން އޮތް ޔޫރޯ މުބާރާތުގައި ޑެންމާކު ކުޅުނު ފުރަތަމަ މެޗުގައި ހިތް ހުއްޓިގެން ދަނޑުން ބާލަން ޖެހިގެންނެވެ.

ޔުނައިޓެޑަށް ބަދަލުވުމަށްފަހު އެރިކްސަން ބުނީ، ޔުނައިޓެޑުގައި ކުޅެން ފަށަން އޭނާ ކެތް މަދުވެފައި ހުރި ކަމަށާއި، އެ ޓީމަކީ ޚާއްސަ ޓީމެއް ކަމަށެވެ. މީގެ އިތުރުން އެރިކްސަން ބުނީ ޔުނައިޓެޑުގެ ކޯޗު އެރިކް ޓެން ހާގަކީ މޮޅު ކޯޗެއް ކަމަށެވެ. އަދި ޓެން ހާގާ ވާހަކަ ދެއްކިކަން ފާހަގަކޮށް އެރިކްސަން ބުނީ ކުރިމަގުގައި ރަނގަޅު ކާމިޔާބީތަކެއް ހޯދަން ބޭނުންވާކަމަށެވެ.

އެރިކްސަން އޭނާގެ ސީނިއަރ ކެރިއަރު ފަށާފައިވަނީ އަޔެކްސް އިން 2010 ވަނަ އަހަރުއެވެ. އެ ޓީމަށް ތިން އަހަރު ކުޅެދިނުމަށްފަހު، 2013 ވަނަ އަހަރު އޭނާ ބަދަލުވީ ޓޮޓެންހަމް އަށެވެ. ޓޮޓެންހަމްއަށް 305 މެޗު ކުޅެދީ، 69 ލަނޑު ޖަހައިދިނުމަށްފަހު 2019 ވަނަ އަހަރު އޭނާ ބަދަލުވީ އިންޓަރ މިލާން އަށެވެ. އިންޓަރ މިލާނުގައި ދެ އަހަރު ހޭދަކުރުމަށްފަހު އެންމެ ފަހުން ކުޅުނު ބްރެންޓްފޯޑަށް ބަދަލުވީ 2022 ވަނަ އަހަރުއެވެ.

އެރިކްސަން އަންނަނީ 2010 ވަނަ އަހަރުން ފެށިގެން ޑެންމާކުގެ ޤައުމީ ޓީމަށް ވެސް ކުޅެމުންނެވެ. އެގޮތުން މިހާތަށް ޤައުމީ ޓީމަށް ކުޅެދިން 115 މެޗުގައި އޭނާ ވަނީ 38 ލަނޑު ޖަހާފައެވެ.