މެންޗެސްޓަރ ޔުނައިޓެޑްއަކީ ކެރިއަރު ކުރިއަށްގެންދަން އެންމެ ރަނގަޅުތަން- އެރިކްސަން
16 ޖުލައި 2022 | ހޮނިހިރު 03:42ޔުނައިޓެޑް އާއިއެކު އެރިކްސަން ސޮއިކުރީ ތިން އަހަރުގެ އެއްބަސްވުމެއްގައި
ެއެރިކްސަން
މެންޗެސްޓަރ ޔުނައިޓެޑް އަކީ ކެރިއަރު ކުރިއަށްގެންދަން އެންމެ ރަނގަޅު ތަންކަމަށް ޑެންމާކްގެ ފޯވާޑް ކްރިސްޓަން އެރިކްސަން ބުނެފިއެވެ.
ހިލޭ އެއްބަސްވުމެއްގެ ދަށުން މެންޗެސްޓަރ ޔުނައިޓެޑްއަށް ސޮއިކުރުމަށްފަހު އެރިކްސަން ބުނީ އެއީ ޚާއްޞަ ކްލަބެއްކަމަށާއި, އެކްލަބާއެކު ފަށަން ކެތްމަދުވެފައި ހުރިކަމަށެވެ. އޭނާ ބުނީ އަދިވެސް ހާސިލްކުރެވޭނެ ވަރަށްގިނަ ކަންތައްތައް އެބަހުރި ކަމަށާއި, އެކަމަށް ޔުނައިޓެޑްއަކީ އެންމެ ރަނގަޅު ތަން ކަމަށެވެ. 30 އަހަރުގެ ފޯވާޑް ވަނީ ޔުނައިޓެޑްގެ އާ ކޯޗު އެރިކް ޓެންހާގް އަށްވެސް ތައުރީފްކޮށްފައެވެ. އަޔެކްސްގައި ޓެންހާގް ކުރި މަސައްކަތް ގާތުން ފެނުނު ކަމަށާއި, އެއީ މޮޅު ކޯޗެއްކަމަށް އެރިކްސަން ބުންޏެވެ. ޔުނައިޓެޑްއަށް ސޮއިކުރުމުގެ ކުރިން ކޯޗު ޓެންހާގުގެ ޕްލޭން އާއި, ކުޅެން ބޭނުންވާ ސްޓައިލް އޮޅުންފިލުވައި ދިންކަމަށާއި, އެއާއެކު އިތުރަށް ހިތްހަމަޖެހުނުކަމަށް މިދިޔަ ސީޒަންގެ ފަހު ބައިގައި ބްރެންޓްފޯޑަށް ކުޅުނު ފޯވާޑް ބުންޏެވެ.
މިދިޔަ ސީޒަންގެ ފަހުބައިގައި އެރިކްސަން ކުޅުމުގެ ތެރެއަށް އައީ ޔޫރޯ ފުޓްބޯޅަ މުބާރާތުގައި ޑެންމާކް ކުޅުނު ފުރަތަމަ މެޗުގައި ހިތް ހުއްޓި ދަނޑު މައްޗަށް ވެއްޓުމުގެ ސަބަބުން ކުޅުމާއި ދުރުގައި މަސްތަކެއް ހޭދަކުރުމަށްފަހުއެވެ. އެރިކްސަން އެނބުރި އައީ އައިސީޑީއެއް ލައްވައިގެންނެވެ. އޭރު އެރިކްސަން ކުޅެމުން ދިޔައީ އިންޓަރ މިލާން އަށެވެ. އެކަމަކު އައިސީޑީ ލައްވައިގެން އިޓަލީގައި ނުކުޅެވޭތީ އެކްލަބް ދޫކޮށްލަން މަޖުބޫރުވީއެވެ. އެރިކްސަން އެނބުރި އައީ ޕްރިމިއަރ ލީގުގެ ބްރެންޓްފޯޑާއެކުއެވެ. އެކްލަބާއެކު ރަނގަޅު ކުޅުމެއް ދެއްކުމުން ޔުނައިޓެޑްގެ އިތުރުން އެހެން ބައެއް ކްލަބްތަކުގެ ހުށަހެޅުންވެސް އެރިކްސަންއަށް ލިބުނެވެ.
ކުރިން ޓޮޓެންހަމްއަށްވެސް ކުޅުނު އެރިކްސަން މެންޗެސްޓަރ ޔުނައިޓެޑް އާއިއެކު ސޮއިކުރީ ތިން އަހަރުގެ އެއްބަސްވުމެއްގައެވެ.
